ໃນວັນທີ 28 ມີນາ 2023 ທ່ານ ຫຼີ້ ລີ ຫົວໜ້າກອງບັນຊາການ ປກສ ກິງແຂວງສິບສອງພັນນາ ສາທາລະນະລັດປະຊາຊົນຈີນ ພ້ອມດ້ວຍຄະນະ ໄດ້ເຂົ້າພົບປະຢ້ຽມຢາມ ແລະ ເຮັດວຽກກັບ ພົຈວ ປອ ບົວພັນ ຟອງມະນີ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ພ້ອມດ້ວຍຄະນະ ນໍາກອງບັນຊາການ ປກສ ນະຄອນຫຼວງວຽງຈັນ ສປປ ລາວ ເຂົ້າຮ່ວມ.
ໃນການພົບປະຢ້ຽມຢາມ ແລະເຮັດວຽກ ຄັ້ງນີ້, ພົຈວ ປອ ບົວພັນ ຟອງມະນີ ໄດ້ລາຍງານສະພາບ ຈຸດພິເສດ, ທີ່ຕັ້ງ ຂອງນະຄອນຫຼວງວຽງຈັນ ໃຫ້ຄະນະຜູ້ແທນ ກອງບັນຊາການ ປກສ ກິ່ງແຂວງສິບສອງພັນນາ ສປ ຈີນ ຮັບຮູ້ວ່າ: ປັດຈຸບັນ ມີພົນລະເມືອງຈີນ ມາພັກເຊົາ, ຄ້າຂາຍ ແລະ ດໍາເນີນທຸລະກິດ ຢູ່ນະຄອນຫຼວງວຽງຈັນ ມີປະມານ 7500 ກ່ວາຄົນ, ມີ 31 ບໍລິສັດ ຈາກ ສປ ຈີນ ມາລົງທຶນ, ມີ 20 ໂຄງການ ເປັນຕົ້ນແມ່ນໂຄງການລົງທຶນສຳປະທານພັດທະນາເຂດເສດຖະກິດພິເສດບຶງທາດຫຼວງ, ໂຄງການລົງທຶນພັດ ທະນາ ເຂດເສດຖະກິດກວມລວມໄຊເສດຖາ, ໂຄງການລົງທຶນສ້າງສູນການຄ້າ-ຕະຫຼາດ 6 ແຫ່ງ, ໂຄງການລົງທຶນສ້າງໂຮງໝໍ, ຂົງເຂດພະລັງງານໄຟຟ້າ, ບໍ່ແຮ່, ໂຮງງານອຸດສະຫະກຳ ກະສິກຳ-ປູກຝັງລ້ຽງສັດ ແລະ ອື່ນໆ. ນອກນັ້ນ ສປ ຈີນ ໄດ້ໃຫ້ການຊ່ວຍເຫຼືອລ້າ ໃນການກໍ່ສ້າງໂຮງໝໍສູນກາງ ມະໂຫສົດ, ໂຄງການສ້າງໂຮງຮຽນ ມັດຖະຍົມເພຍວັດ ກໍ່ສ້າງສຳເລັດແລ້ວ ແລະ ກໍາລັງກຽມພິທີ ມອບຮັບຢ່າງເປັນຢ່າງເປັນທາງການ ໃນໄວໆນີ້, ນີ້ຖືວ່າເປັນການປະກອບສ່ວນສໍາຄັນໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງສີວິໄລ.
ຄຽງຄູ່ກັນນີ້ ຍັງມີຄົນຕ່າງປະເທດຈໍານວນໜຶ່ງລັກລອບເຂົ້າເມືອງແບບຜິດກົດໝາຍ, ປະກອບອາຊີບບໍ່ຖືກຕ້ອງ, ສໍ້ໂກງຊັບ ແລະອື່ນໆ; ເຊິ່ງຕະຫຼອດໄລຍະຜ່ານມາ ປກສ ນວ ໄດ້ເອົາໃຈໃສ່ແກ້ໄຂຢ່າງຕັ້ງໜ້າ ເພື່ອໃຫ້ປະກົດການຫຍໍ້ທໍ້ຫຼຸດໜ້ອຍລົງ.
ແຫຼ່ງຂ່າວ ປ້ອງກັນຄວາມສະຫງົບນະຄອນຫຼວງວຽງຈັນ