ວັນທີ 22 ພະຈິກ 2014 ຜ່ານມາ ບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ໄດ້ຈັດພິທີຖະແຫຼງຂ່າວເພື່ອນຳ
ສະເໜີຂໍ້ມູນບໍລິສັດ ໃຫ້ແກ່ນັກລົງທຶນທີ່ຈະຈັບຈອງຮຸ້ນຂອງຕົນ ຂຶ້ນທີ່ໂຮງແຮມເມີກຽວ ນະຄອນຫຼວງວຽງຈັນ
ເຊິ່ງຄະນະຜູ້ບໍລິຫານບໍລິສັດ ແລະ ນັກທຸລະກິດເຂົ້າຮ່ວມ.
ທ່ານ ຈັນທອນ ສິດທິໄຊ ຮອງປະທານສະພາບໍລິຫານບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ໄດ້ກ່າວວ່າ:
ປີໂຕຣລ້ຽມເປັນບໍລິສັດແຫ່ງທີ 4 ຂອງລາວ ທີ່ໄດ້ຮັບອະນຸຍາດໃຫ້ມາຈົດທະບຽນຢູ່ຕະຫຼາດຫຼັກຊັບລາວ ພາຍຫຼັງ
ຜ່ານການກວດສອບຈາກພາຍນອກກ່ຽວກັບຜົນສຳເລັດ ແລະ ຄວາມປອດໃສໃນການດຳເນີນທຸລະກິດ ບໍລິສັດ
ເປັນທຸລະກິດຈຳໜ່າຍນ້ຳມັນເຊື້ອໄຟຂອງລາວ ລົງທຶນໂດຍຄົນລາວ 100%ສ້າງຕັ້ງຂຶ້ນກາງປີ 2008 ດ້ວຍທຶນ
ຈົດທະບຽນເລີ່ມຕົ້ນ 28,8 ຕື້ກີບ ແລະ ໄດ້ເພີ່ມທຶນຈົດທະບຽນເປັນ 350 ຕື້ກີບ ໃນປີ 2013 ປັດຈຸບັນ ຖືເປັນຜູ້
ຈັດຈຳໜ່າຍນ້ຳມັນລາຍໃຫຍ່ຂອງ ສປປ ລາວ ທັດຈາກລັດວິສາຫະກິດນ້ຳມັນເຊື້ອໄຟລາວ.
ປີໂຕຣລ້ຽມ ເປັນຜູ້ນຳເຂົ້າ-ສົ່ງອອກ ແລະ ຈຳໜ່າຍນ້ຳມັນເຊື້ອໄຟ ພາຍໃຕ້ເຄື່ອງໝາຍການຄ້າປີໂຕຣລ້ຽມ ເຊິ່ງ
ປະກອບມີນ້ຳມັນກາຊວນ ແອັດຊັງ 91 ແອັດ ຊັງ 95 ປີໂຕຣເຄມີ ແລະ ເປັນຕົວແທນຈຳໜ່າຍນ້ຳມັນເຄື່ອງຊັນ
ອອຍປະເທດໄທ ແລະ ມາຮອດປັດຈຸບັນ ບໍລິສັດມີສາງນ້ຳມັນທັງໝົດ 7 ແຫ່ງ ແລະ ມີປ້ຳທັງໝົດໃນທົ່ວປະເທດ
107 ແຫ່ງ ສາມາດບັນຈຸນ້ຳມັນໄດ້ຫຼາຍກວ່າ 30 ລ້ານລິດ ດ້ວຍຕາໜ່າງການຂາຍທີ່ມີຢັ່ງຢາຍກວ້າງຂວາງ ກັບ
ຄວາມຕ້ອງການຂອງສັງຄົມທີ່ນັບມື້ສູງຂຶ້ນ ເຮັດໃຫ້ທຸລະກິດມີການເຕີບໃຫຍ່ຂະຫຍາຍຕົວດີຂຶ້ນຕໍ່ເນື່ອງ ໃນຕະ
ຫຼອດໄລຍະຜ່ານມາ.
ເພື່ອຂະຫຍາຍກຳລັງການສະໜອງນ້ຳມັນເຊື້ອໄຟໃຫ້ລູກຄ້າຢ່າງທົ່ວເຖິງ ຮັບປະກັນການບໍລິການລູກຄ້າລາຍໃຫຍ່
ໃຫ້ໄດ້ຫຼາຍຂຶ້ນ ບໍລິສັດຈຶ່ງສະເໜີຂາຍຮຸ້ນອອກທັງໝົດ 60 ລ້ານຮຸ້ນ ໃຫ້ມວນຊົນທັງພາຍໃນ ແລະ ຕ່າງປະເທດ
ຮ່ວມເປັນເຈົ້າຂອງໃນລາຄາຮຸ້ນລະ 2.000 ກີບ ເພື່ອນຳເອົາທຶນທີ່ລະດົມໄດ້ໄປສ້າງສະຖານີບໍລິການນ້ຳມັນຕື່ມອີກ
20 ແຫ່ງ ເປັນທຶນໝູນວຽນສຳລັບບໍລິຫານການສັ່ງຊື້ນ້ຳມັນຈາກຕ່າງປະເທດ ແລະ ລົງທຶນ ໃນການບໍລິຫານລະບົບ
ຂົນສົ່ງ ເຊິ່ງປີໂຕຣລ້ຽມຈະເລີ່ມເປີດໃຫ້ຈອງຮຸ້ນໄດ້ນັບແຕ່ເດືອນທັນວາ 2014 ເປັນຕົ້ນໄປ ສະນັ້ນ ມວນຊົນ ຫຼື ນັກ
ລົງທຶນທ່ານໃດທີ່ສົນໃຈຢາກຮ່ວມຈັບຈອງຮຸ້ນຂອງບໍລິສັດດັ່ງກ່າວ ແມ່ນສາມາດສອບຖາມໄດ້ຢູ່ທະນາຄານພັດທະ
ນາລາວທຸກສາຂາ ຫຼື ສອບຖາມທີ່ບໍລິສັດຫຼັກຊັບລ້ານຊ້າງມະຫາຊົນ ຕັ້ງຢູ່ຕຶກຕະຫຼາດຫຼັກຊັບລາວ ຊັ້ນ 5 ເມືອງໄຊ
ເຊດຖາ ນະຄອນຫຼວງວຽງຈັນ.
ແຫລ່ງຂ່າວ: ວຽງຈັນໃໝ່