ໃນສົກຮຽນ 2023-2024 ນີ້ , ໄລ່ມາຮອດເດືອນກຸມພາຜ່ານມານີ້, ມີນັກຮຽນຊັ້ນປະຖົມສຶກສາຢູ່ພາຍໃນເມືອງໄຊພູທອງ, ແຂວງສະຫວັນນະເຂດ ປະລະການຮຽນແລ້ວ 44 ຄົນ ແລະ ຊັ້ນມັດທະຍົມສຶກສາ 50 ກວ່າຄົນ ເຊີ່ງເປັນສະຖິຕິທີ່ບໍ່ເຄີຍມີມາກ່ອນພາຍໃນເມືອງ.
ທ່ານ ບຸນມາ ສົງວິໄລ, ເຈົ້າເມືອງໄຊພູທອງ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍ ສຽງແຫ່ງຊາດລາວໃນວັນທີ 15 ມີນານີ້ ວ່າ: ອັດຕາປະລະການຢູ່ ເມືອງໄຊພູທອງ ໃນສົກຮຽນ 2023-2024 ນີ້ ຖືເປັນສະຖິຕິສູງທີ່ສຸດແບບບໍ່ເຄີຍມີມາກ່ອນ. ສາເຫດທີ່ເຮັດໃຫ້ນັກຮຽນປະລະການຮຽນ ຕົ້ນຕໍແມ່ນຍ້ອນສະພາບຄວາມຫຍຸ້ງຍາກທາງດ້ານເສດຖະກິດຄອບຄົວ, ໃນນີ້ ສະເພາະນັກຮຽນຊັ້ນມັດທະຍົມ ສ່ວນໜຶ່ງປະລະການຮຽນແລ້ວໄປຊອກເຮັດວຽກເພື່ອຫາລາຍໄດ້ຊ່ວຍຄອບຄົວ.
ສ່ວນນັກຮຽນຊັ້ນປະຖົມ ແມ່ນຜູ້ປົກຄອງໃຫ້ອອກຍ້ອນເຫັນຄວາມຫຍຸ້ງຍາກດ້ານເສດຖະກິດຄອບຄົວ. ເພື່ອແກ້ໄຂບັນຫາທີ່ເກີດຂຶ້ນ, ທາງເມືອງໄດ້ໃຊ້ວິທີສຶກສາອົບຮົມຜູ້ປົກຄອງນັກຮຽນໃຫ້ຮັບຮູ້ ແລະ ເຂົ້າໃຈຄວາມສໍາຄັນຂອງການສຶກສາ ເພື່ອໃຫ້ເຂົາເຈົ້າເອົາລູກຫລານຕົນເອງກັບມາເຂົ້າຮຽນອີກຄັ້ງ.
ທ່ານໃຫ້ຮູ້ຕື່ມວ່າ: ສໍາລັບສົກຮຽນ 2022-2023 ຜ່ານມາ, ທົ່ວເມືອງໄຊພູທອງ, ແຂວງສະຫວັນນະເຂດ ມີນັກຮຽນປະຖົມປະລະການຮຽນ 10 ກວ່າຄົນ ແລະ ຊັ້ນມັດທະຍົມສຶກສາ 20 ກວ່າຄົນ.
ທີ່ມາ FM90