ກອງປະຊຸມໜ່ວຍປະສານງານປະຈໍາພື້ນທີ່ຊາຍແດນ ລາວ-ໄທ ລະຫວ່າງແຂວງບໍ່ແກ້ວ, ແຂວງໄຊຍະບູລີ ແລະ ກອງກຳລັງຜາເມືອງ ແຫ່ງຣາຊະອານາຈັກໄທ ຄັ້ງທີ 3 ປະຈຳປີ 2023 ຈັດຂຶ້ນໃນທ້າຍອາທິດຜ່ານມາ, ທີ່ຫ້ອງປະຊຸມດ່ານສາກົນຂົວມິດຕະ ພາບ 4 ເມືອງຫ້ວຍຊາຍ ແຂວງບໍ່ແກ້ວ ສປປ ລາວ, ຝ່າຍລາວນໍາໂດຍ ພົນຈັດຕະ ວາ ກູດ ພົມມາ ຫົວໜ້າການທະຫານ ກອງບັນຊາການທະຫານ ແຂວງໄຊຍະບູລີ ຫົວໜ້າໜ່ວຍປະສານງານປະຈຳພື້ນທີ່ພາກເໜືອຂອງລາວ ແລະ ພັນເອກ ທອງໄຂ ສີຍາລາດ ຫົວໜ້າການທະຫານ ກອງບັນຊາການທະຫານ ແຂວງບໍ່ແກ້ວ ຫົວໜ້າໜ່ວຍປະສານງານປະຈຳພື້ນທີ່ຊາຍແດນ ລາວ-ໄທ ແຂວງບໍ່ແກ້ວ ສປປ ລາວ ແລະ ຝ່າຍໄທ ນໍາໂດຍ ພົນຕີ ສຸພະເລິກ ສະຖາພອນຜົນ ຜູ້ບັນຊາການກອງກຳລັງຜາເມືອງ ກອງທັບແຫ່ງຣາຊະອານາຈັກໄທ ຫົວໜ້າໜ່ວຍປະສານງານປະຈຳພື້ນທີ່ຊາຍ ແດນ ໄທ-ລາວ, ມີບັນດາໜ່ວຍປະສານງານປະຈໍາພື້ນທີ່ຊາຍແດນ 2 ແຂວງ ຂອງລາວ, 5 ແຂວງຂອງໄທ ແລະ ພາກສ່ວນທີ່ກ່ຽວຂ້ອງທັງສອງຝ່າຍ ລາວ-ໄທ ເຂົ້າຮ່ວມ.
ກອງປະຊຸມຄັ້ງນີ້, ໄດ້ພ້ອມກັນທົບທວນຄືນຜົນຂອງການປະຕິບັດງານທີ່ຜ່ານມາ, ທັງເປັນການແລກປ່ຽນຄວາມຄິດເຫັນ ແລະ ປຶກສາຫາລືການແກ້ໄຂບັນຫາຢາເສບຕິດຮ່ວມກັນລະຫວ່າງແຂວງບໍ່ແກ້ວ-ແຂວງໄຊຍະບູລີ ສປປ ລາວ ກັບກອງກຳລັງຜາເມືອງ ແຫ່ງ ຣາຊະອານາຈັກໄທ, ໄລຍະຜ່ານມາ ເຫັນວ່າ ທັງສອງຝ່າຍໄດ້ຕັ້ງໜ້າ ແລະ ເອົາໃຈໃສ່ຈັດຕັ້ງຜັນຂະຫຍາຍ ແຜນການຮ່ວມມືເປັນປະຈຳ ແລະ ໄດ້ມີການສະກັດກັ້ນ, ແກ້ໄຂ ຈັບຜູ້ກະທຳຜິດຄ້າຂາຍຢາເສບຕິດໄດ້ຢ່າງຕໍ່ເນື່ອງ ສະ ແດງອອກ 1 ປີຜ່ານມາ, ແຂວງບໍ່ແກ້ວ ແລະ ແຂວງໄຊຍະບູລີ ສປປ ລາວ ຢຶດ ຂອງກາງຢາບ້າໄດ້ 51.026.746 ເມັດ, ຢາໄອສ໌ 1.066 ກິໂລກຼາມ, ຢາເຄຕາມິນ 91 ກິໂລກຼາມ, ລົດໃຫຍ່ 19 ຄັນ, ລົດຈັກ 2 ຄັນ, ແລະ ຈັບຜູ້ຖືກຫາ ໄດ້ 72 ຄົນ ຍິງ 4 ຄົນ ແລະ ຝ່າຍຣາຊະອານາຈັກ ໄທ ຢຶດຂອງກາງຢາບ້າໄດ້ 6.400. 000 ເມັດ.
ຈາກນັ້ນ, ກອງປະຊຸມທັງສອງ ຝ່າຍ ລາວ-ໄທ ໄດ້ມີການປຶກສາຫາລື ແລະ ເຫັນດີເປັນເອກະພາບກັນສືບຕໍ່ກໍານົດແນວທາງ ແລະ ມາດຕະການໃນການສົ່ງເສີມການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ, ໄທ-ລາວ, ສືບຕໍ່ການຮ່ວມມືທີ່ດີຖານບ້ານໃກ້ເຮືອນຄຽງ, ສືບຕໍ່ການຢ້ຽມຢາມການແລກປ່ຽນສະ ພາບການເຊິ່ງກັນແລະກັນ ເພື່ອສະກັດກັ້ນ ແລະ ປາບປາມຜູ້ລັກລອບນໍາຄົນເຂົ້າ-ອອກແບບຜິດກົດໝາຍ, ການລັກລອບຄ້າຂາຍເຖື່ອນ ແລະ ການຄ້າຢາເສບຕິດ; ພ້ອມທັງເຊັນບົດບັນທຶກເພື່ອສືບຮ່ວມມືກັນໃນຕໍ່ໜ້າ.