ອີງຕາມການລາຍງານຂອງເພຈຂ່າວເຊກອງວັນນີ້ ໃນວັນທີ 8 ມີນາ 2023 ໃຫ້ຮູ້ວ່າ: ທ່ານ ເຫລັກໄຫລ ສີວິໄລ, ເຈົ້າແຂວງເຊກອງ ໄດ້ຍົກໃຫ້ເຫັນສະພາບການປູກພືດເປັນສິນຄ້າຢູ່ພາຍໃນ ແຂວງເຊກອງ ມາຮອດປັດຈຸບັນ ນັບມື້ເປັນຂະບວນການກວ້າງຂວາງ ແລະ ມີທ່າອ່ຽງເພີ່ມຂຶ້ນຢ່າງຕໍ່ເນື່ອງ ເຮັດໃຫ້ແຂວງມີຫລາຍສິນຄ້າສົ່ງອອກ.
ເປັນຕົ້ນກໍຄື ການປູກໂສມຂອງປະຊາຊົນພາຍໃນ ເມືອງດາກຈຶງ ທີ່ນັບມື້ເປັນຂະບວນກວ້າງຂວາງ ແລະ ຟົດຟື້ນ. ປັດຈຸບັນ ມີປະຊາຊົນ 9 ບ້ານ, ຈໍານວນ 336 ຄອບຄົວ ທີ່ຖືເອົາການປູກໂສມເປັນສິນຄ້າ ເຊີ່ງມີເນື້ອທີ່ລວມກັນທັງໝົດ 288,5 ເຮັກຕາ.
ທ່ານໃຫ້ຮູ້ຕື່ມວ່າ: ມາຮອດປັດຈຸບັນ ໂສມທີ່ປູກຢູ່ເມືອງດາກຈຶງ ກໍຄື ແຂວງເຊກອງ ສາມາດສ້າງເປັນຫລາຍຜະລິດຕະພັນເພື່ອສົ່ງອອກ ເປັນຕົ້ນ: ເຫລົ້າໂສມ, ຊາໂສມ, ໂສມສະກັດ, ໂສມແຫ້ງ ແລະ ສະບູໂສມ. ໃນນີ້ ສະເພາະ ປີ 2022 ຜ່ານມາ ສາມາດຈໍາໜ່າຍໂສມໄດ້ລວມກັນບໍ່ຫລຸດ 30 ຕື້ກີບ, ສະເລ່ຍໄດ້ປະມານ 90 ລ້ານກີບ ຕໍ່ ຄອບຄົວຕໍ່ປີ ເຮັດໃຫ້ໂສມກາຍເປັນສິນຄ້າທີ່ສໍາຄັນໃນການສ້າງລາຍຮັບໃຫ້ປະຊາຊົນ ແລະ ຄາດໝາຍການປູກພືດຊະນິດດັ່ງກ່າວຈະນັບມື້ເພີ່ມຂຶ້ນໃນຕໍ່ໜ້າ.