spot_img
Homeຂ່າວພາຍ​ໃນລັດຖະບານຍີ່ປຸ່ນປັບປຸງສະພາບສຸຂະອານະໄມໂຮງຮຽນແຂວງຫຼວງພະບາງ

ລັດຖະບານຍີ່ປຸ່ນປັບປຸງສະພາບສຸຂະອານະໄມໂຮງຮຽນແຂວງຫຼວງພະບາງ

Published on

ນະຄອນຫຼວງວຽງຈັນ, ວັນທີ 6 ມີນາ 2023 – ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອເປັນມູນຄ່າ ປະມານ 190,000 ໂດລາສະຫະລັດ ເພື່ອສົ່ງເສີມການສຶກສາຂອງນັກຮຽນ ໃນແຂວງຫຼວງພະບາງ ພາຍໃຕ້ ໂຄງການຊ່ວຍເຫຼືອລ້າຜ່ານອົງການ NGO ຍີ່ປຸ່ນ.

ໂຄງການດັ່ງກ່າວແມ່ນ ການສະຫນັບສະຫນູນທຶນຮອນເພື່ອກໍ່ສ້າງຫ້ອງນໍ້າ ແລະ ບ່ອນລ້າງ ຢູ່ໃນໂຮງຮຽນ 25 ແຫ່ງໃນນະຄອນຫຼວງພະບາງ ແລະ ເມືອງໂພນໄຊ, ພ້ອມທັງໃຫ້ການສຶກສາເພື່ອເພີ່ມພູນຄວາມຮູ້ ແລະ ຄວາມຕື່ນໂຕໃນການບໍາລຸງຮັກສາສິ່ງອໍານວຍຄວາມສະດວກຕ່າງໆ ແລະ ຄວາມສະອາດພາຍໃນໂຮງຮຽນ ເພື່ອຍົກລະດັບສະພາບສຸຂະອານະໄມໃນໂຮງຮຽນເປົ້າຫມາຍ.

ພິທີເຊັນສັນຍາໂຄງການດັ່ງກ່າວໄດ້ຖືກຈັດຂຶ້ນໃນວັນທີ 2 ມີນາ 2023 ລະຫວ່າງ ພະນະທ່ານ ໂຄ ບະປະຊິ ເຢັນຕິ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ແລະ ທ່ານນາງ ພຸດທະນາລີ ທັມມະມີໄຊ, ຜູ້ຈັດການຫ້ອງການປະຈໍາປະເທດລາວ ອົງການພັດທະນາເດັກນ້ອຍລາວ-ຍີ່ປຸ່ນ (SA) ໂດຍມີ ທ່ານນາງ ຮສ. ປອ. ສິລິນທອນ ສັກລໍຄໍາ, ຫົວຫນ້າກົມພົວພັນຕ່າງປະເທດ ກະຊວງສຶກສາທິການ ແລະ ກິລາເຂົ້າຮ່ວມເປັນ ສັກສີພະຍານ.

ທ່ານນາງ ພຸດທະນາລີ ທັມມະມີໄຊ, ຜູ້ຈັດການຫ້ອງການປະຈໍາປະເທດລາວ ອົງການພັດທະນາ ເດັກນ້ອຍລາວ-ຍີ່ປຸ່ນ (SMA) ໄດ້ໃຫ້ຄໍາເຫັນໃນພິທີເຊັນສັນຍາວ່າ ໂຄງການນີ້ ຈະຊ່ວຍປະກອບສ່ວນເຂົ້າໃນ ການຍົກລະດັບສະພາບສຸຂະອານະໄມ ແລະ ຄວາມສະອາດໃນໂຮງຮຽນຢູ່ໃນນະຄອນຫຼວງພະບາງ ແລະ ເມືອງໂພນໄຊ ໂດຍການມີສ່ວນຮ່ວມຂອງປະຊາຊົນທັງສອງເມືອງ ໂດຍສະເພາະແມ່ນເຂດທີ່ມີຄວາມຈໍາເປັນໃນ ການປົກປ້ອງເດັກນ້ອຍຈາກການເຈັບປ່ວຍ ແລະ ເພື່ອຮັບປະກັນໃຫ້ເຂົາເຈົ້າໄດ້ຮໍ່າຮຽນໃນສະພາບການສຶກສາທີ່ເຫມາະສົມ.

ພ້ອມນັ້ນ, ທ່ານຍັງໄດ້ກ່າວຕື່ມອີກວ່າພາຍໃຕ້ໂຄງການດັ່ງກ່າວ, ຈະໄດ້ມີການປັບປຸງສິ່ງອໍານວຍ ຄວາມສະດວກດ້ານສຸຂະອານະໄມ ພ້ອມທັງໃຫ້ການສຶກສາເພື່ອເພີ່ມພູນຄວາມຮູ້ ແລະ ຄວາມຕື່ນໂຕໃນການ ຮັກສາຄວາມສະອາດ ແລະ ຮູ້ໃນການບຳລຸງຮັກສາສິ່ງອໍານວຍຄວາມສະດວກຕ່າງໆພາຍໃນໂຮງຮຽນເປົ້າຫມາຍ.

ພວກເຮົາຈະນໍາໃຊ້ຄວາມຮູ້, ທັກສະ, ປະສົບການ ແລະ ພະຍາຍາມເຮັດໃຫ້ດີທີ່ສຸດເພື່ອໃຫ້ໂຄງການປະສົບຜົນສໍາເລັດ ແລະ ບັນລຸເປົ້າຫມາຍ”.

ທ່ານ ໂຄບະຢະ ເປັນສີ, ເອກອັກຄະຣາຊະທູດຍີ່ປຸ່ນ ໄດ້ໃຫ້ຄໍາເຫັນ “ມີຫຼາຍຫມູ່ບ້ານຢູ່ເຂດພູຜາ ໃນແຂວງຫຼວງພະບາງ ຍັງຂາດເຂີນດ້ານໂຄງລ່າງພື້ນຖານ. ພ້ອມນັ້ນ, ແຂວງຫຼວງພະບາງຍັງເປັນແຂວງອັນດັບສາມ ທີ່ມີຈໍານວນຄົວເຮືອນທີ່ສາມາດເຂົ້າເຖິງນ້ຳປະປາ ແລະ ສະບູ ມີເປີເຊັນຫນ້ອຍທີ່ສຸດຈາກທົ່ວປະເທດ”.

ພ້ອມກັນນັ້ນ, ທ່ານຍັງໄດ້ມີຄໍາເຫັນຕື່ມຄື “ພວກເຮົາຫວັງວ່າ, ຄວາມຕັ້ງໃຈຂອງອົງການພັດທະນາ ເດັກນ້ອຍລາວ-ຍີ່ປຸ່ນ (SM) ຈະເປັນການສົ່ງເສີມວຽກງານການປັບປຸງສະພາບສຸຂະອານະໄມໃນໂຮງຮຽນ ແລະ ຍັງເປັນການປົກປ້ອງເດັກນ້ອຍຈາກໂລກໄພ ແລະ ພະຍາດໂລຄາອື່ນໆ ເຊິ່ງລັດຖະບານຍີ່ປຸ່ນມີຄວາມ ພາກພູມໃຈທີ່ຈະໃຫ້ການສະຫນັບສະຫນູນເພື່ອສຸຂະອານະໄມທີ່ດີກວ່າໃນໂຮງຮຽນເປົ້າຫມາຍ. ສິ່ງດັ່ງກ່າວຍັງຈະສົ່ງ ຜົນດີຕໍ່ການມາໂຮງຮຽນ ແລະ ຜົນການຮຽນຂອງເດັກນ້ອຍອີກດ້ວຍ”.

ໂຄງການຊ່ວຍເຫຼືອລ້າຜ່ານອົງການບໍ່ສັງກັດລັດຖະບານ (NGO) ຢີ່ປຸ່ນແມ່ນ ໄດ້ຮັບການສະຫນອງ ທຶນຈາກກະຊວງການຕ່າງປະເທດຍີ່ປຸ່ນ ເພື່ອໃຫ້ອົງການ NGO ຢີ່ປຸ່ນເປັນຜູ້ວາງແຜນ ແລະ ນໍາໃຊ້ໃນ ການຈັດຕັ້ງປະຕິບັດໂຄງການ ເພື່ອການພັດທະນາເສດຖະກິດສັງຄົມໃນປະເທດກໍາລັງພັດທະນາເຊິ່ງລວມ ເຖິງສປປ ລາວ.

ໃນໄລຍະ 5 ປີຜ່ານມາ, ລັດຖະບານຍີ່ປຸ່ນໄດ້ໃຫ້ການສະຫນັບສະຫນູນໃຫ້ແກ່ສປປ ລາວ ໃນດ້ານການສຶກສາ, ສາທາລະນະສຸກ, ເກັບກູ້ລະເບີດບໍ່ທັນແຕກ ແລະ ດ້ານອື່ນໆ ລວມເປັນມູນຄ່າຫຼາຍກວ່າ 14 ລ້ານ ໂດລາສະຫະລັດ. ປະເທດຢີ່ປຸ່ນຈະສືບຕໍ່ຮ່ວມມືກັບອົງການ NGO ເພື່ອໃຫ້ການຊ່ວຍເຫຼືອປະເທດລາວໃນການ ປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນໃນພາກພື້ນ.

ບົດຄວາມຫຼ້າສຸດ

ພໍ່ເດັກອາຍຸ 14 ທີ່ກໍ່ເຫດກາດຍິງໃນໂຮງຮຽນ ທີ່ລັດຈໍເຈຍຖືກເຈົ້າໜ້າທີ່ຈັບເນື່ອງຈາກຊື້ປືນໃຫ້ລູກ

ອີງຕາມສຳນັກຂ່າວ TNN ລາຍງານໃນວັນທີ 6 ກັນຍາ 2024, ເຈົ້າໜ້າທີ່ຕຳຫຼວດຈັບພໍ່ຂອງເດັກຊາຍອາຍຸ 14 ປີ ທີ່ກໍ່ເຫດການຍິງໃນໂຮງຮຽນທີ່ລັດຈໍເຈຍ ຫຼັງພົບວ່າປືນທີ່ໃຊ້ກໍ່ເຫດເປັນຂອງຂວັນວັນຄິດສະມາສທີ່ພໍ່ຊື້ໃຫ້ເມື່ອປີທີ່ແລ້ວ ແລະ ອີກໜຶ່ງສາເຫດອາດເປັນເພາະບັນຫາຄອບຄົບທີ່ເປັນຕົ້ນຕໍໃນການກໍ່ຄວາມຮຸນແຮງໃນຄັ້ງນີ້ິ. ເຈົ້າໜ້າທີ່ຕຳຫຼວດທ້ອງຖິ່ນໄດ້ຖະແຫຼງວ່າ: ໄດ້ຈັບຕົວ...

ປະທານປະເທດ ແລະ ນາຍົກລັດຖະມົນຕີ ແຫ່ງ ສປປ ລາວ ຕ້ອນຮັບວ່າທີ່ ປະທານາທິບໍດີ ສ ອິນໂດເນເຊຍ ຄົນໃໝ່

ໃນຕອນເຊົ້າວັນທີ 6 ກັນຍາ 2024, ທີ່ສະພາແຫ່ງຊາດ ແຫ່ງ ສປປ ລາວ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ...

ແຕ່ງຕັ້ງປະທານ ຮອງປະທານ ແລະ ກຳມະການ ຄະນະກຳມະການ ປກຊ-ປກສ ແຂວງບໍ່ແກ້ວ

ວັນທີ 5 ກັນຍາ 2024 ແຂວງບໍ່ແກ້ວ ໄດ້ຈັດພິທີປະກາດແຕ່ງຕັ້ງປະທານ ຮອງປະທານ ແລະ ກຳມະການ ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບ ແຂວງບໍ່ແກ້ວ ໂດຍການເຂົ້າຮ່ວມເປັນປະທານຂອງ ພົນເອກ...

ສະຫຼົດ! ເດັກຊາຍຊາວຈໍເຈຍກາດຍິງໃນໂຮງຮຽນ ເຮັດໃຫ້ມີຄົນເສຍຊີວິດ 4 ຄົນ ແລະ ບາດເຈັບ 9 ຄົນ

ສຳນັກຂ່າວຕ່າງປະເທດລາຍງານໃນວັນທີ 5 ກັນຍາ 2024 ຜ່ານມາ, ເກີດເຫດການສະຫຼົດຂຶ້ນເມື່ອເດັກຊາຍອາຍຸ 14 ປີກາດຍິງທີ່ໂຮງຮຽນມັດທະຍົມປາຍ ອາປາລາຊີ ໃນເມືອງວິນເດີ ລັດຈໍເຈຍ ໃນວັນພຸດ ທີ 4...