ຄືດັ່ງທີ່ພວກເຮົາໄດ້ໃຫ້ຂ່າວໄປແລ້ວໃນໄລຍະອາທິດທຳອິດຂອງເດືອນພະຈິກນີ້ວ່າ: ລາຄາສິນຄ້າຢູ່ທ້ອງຕະຫລາດ
ໂດຍສະເພາະແມ່ນພືດຜັກປະເພດຕ່າງໆ ເຫັນວ່າຢູ່ໃນສະພາບປົກກະຕິດີ, ແຕ່ພໍເລີ່ມເຂົ້າສູ່ໜາວ, ລາຄາຜັກບາງ
ປະເພດພັດມີທ່າອ່ຽງແພງຂຶ້ນແຕກຕ່າງກັບ 2 ອາທິດກ່ອນ ເຊັ່ນ: ຫອມປ້ອມ, ຜັກກາດຊອມ ແລະ ອື່ນໆ ອາດ
ເນື່ອງມາຈາກການຕອບສະໜອງບໍ່ພຽງພໍກັບຄວາມຕ້ອງການຂອງຕະຫລາດ ແລະ ຜູ້ບໍລິໂພກກໍອາດເປັນໄດ້.
ຕາມການຕີລາຄາຂອງນັກວິຊາການທີ່ກ່ຽວຂ້ອງ ໄດ້ໃຫ້ເຫດຜົນວ່າ: ສາເຫດຕົ້ນຕໍທີ່ພາໃຫ້ລາຄາພືດຜັກບາງປະ
ເພດແພງຂຶ້ນກໍຍ້ອນວ່າ: ຢູ່ຕະຫລາດບ້ານເຮົາ ສ່ວນໃຫຍ່ແມ່ນຍັງເພິ່ງພາການນຳເຂົ້າສິນຄ້າ ນັບແຕ່ໝາກໄມ້,
ອາຫານທະເລ ແລະ ພືດຜັກຕ່າງໆຈາກຕ່າງປະເທດ, ຖ້າຂາດການນຳເຂົ້າສິນຄ້າປະເພດນີ້ຈາກປະເທດໃກ້ຄຽງຈຶ່ງ
ເຮັດໃຫ້ລາຄາມີການເໜັງຕີງຄື: ຜັກຫອມປ້ອມລາຄາປົກກະຕິຈາກເມື່ອກ່ອນ 12.000 ກີບ/ກິໂລ ຖີບໂຕຂື້ນເປັນ
30.000/ກິໂລ, ຜັກກາດຊອມແຕ່ກ່ອນ 5-8.000 ກີບ/ກິໂລ ແຕ່ດຽວນີ້ແມ່ນ 10- 12.000 ກີບ/ກິໂລ ແລະ ຜັກ
ອື່ນໆ ກໍໄດ້ມີການເໜັງຕີງຂຶ້ນຕາມລຳດັບ. ຂະນະທີ່ໝາກເພັດ, ໝາກເຂືອ, ໝາກນາວ, ຜັກກະລຳ, ຜັກກາດຂາວ
ທີ່ຊາວສວນເຮົາປູກໄດ້ຫລາຍ ກໍສາມາດຮັກສາລາຄາເດີມໃນລະດັບ 10.000 ກີບລົງມາ.
ເຖິງຢ່າງໃດກໍດີ ສຳລັບທາງອອກໃນການແກ້ໄຂບັນຫາລາຄາພືດຜັກແພງ ກ່ອນອື່ນໝົດອຳນາດການປົກຄອງ
ແລະ ພາກສ່ວນກ່ຽວຂ້ອງຕ້ອງໄດ້ປຸກລະດົມຊາວສວນໃຫ້ເອົາໃຈໃສ່ຕໍ່ການປູກພືດລະດູແລ້ງ ແລະ ໃຫ້ຖືເປັນອາ
ຊີບຕົ້ນຕໍອັນສຳຄັນຂອງຂະແໜງປູກຝັງລ້ຽງສັດ ເພື່ອເຮັດໃຫ້ໜ້າທີ່ປຸກລະດົມປະຊາຊົນເຂົ້າສູ່ການປະຕິບັດ
ວຽກງານຕົວຈິງ ບວກໃສ່ກັບການຕອບສະໜອງປັດໄຈສົ່ງເສີມການຜະລິດໃຫ້ພຽງພໍເຊັ່ນ: ເຄື່ອງມືການຜະລິດ,
ຢາປາບ ສັດຕູພືດ ແລະ ສິ່ງສຳຄັນອື່ນໆເພື່ອ ສ້າງແຮງຈູງໃຈໃຫ້ຜູ້ຜະລິດນັບມື້ຫລາຍຂຶ້ນ.
ແຫລ່ງຂ່າວ: ລາວພັດທະນາ