ທາງການໄທແນະນຳໃຫ້ປະຊາຊົນໃນກຸງເທບ ເຮັດວຽກຢູ່ບ້ານ ແລະ ໃສ່ໜ້າກາກອະນາໄມເມື່ອອອກມາທາງດ້ານນອກ ຍ້ອນມົນລະພິດທາງອາກາດທີ່ເພີ່ມສູງຂຶ້ນ.
ໃນວັນອັງຄານທີ່ຜ່ານມາ ທ່ານ ຊັດຊາດ ຜູ້ວ່າກຸງເທບມະຫານະຄອນ ກ່າວໃນຖະແຫຼງການວ່າ ປະຊາຊົນໃນເມືອງຫຼວງຂອງໄທ ຖ້າເປັນໄປໄດ້ຄວນເຮັດວຽກຢູ່ບ້ານ ຫຼື ປ່ຽນຈາກການໃຊ້ລົດສ່ວນຕົວ ມາເປັນລົດໂດຍສານສາທາລະນະ.
ອີງຕາມ Bangkok Post ໄດ້ລາຍງານວ່າ: ໃນອາທິດນີ້ ຄຸນະພາບຂອງອາກາດຂອງເມືອງຍັງຢູ່ໃນລະດັບທີ່ອັນຕະລາຍ ໂດຍທາງການໄດ້ອອກຄຳເຕືອນວ່າຝຸ່ນລະອອງອັນຕະລາຍທີ່ເອີ້ນວ່າ PM2.5 ອາດເກີນລະດັບຄວາມປອດໄພ.
ໃນຊ່ວງບໍ່ເທົ່າໃດປີທີ່ຜ່ານມານີ້ ກຸງເທບ ເມືອງຫຼວງຂອງປະເທດໄທນັ້ນ ແລະ ເມືອງອື່ນໆ ກຳລັງປະສົບກັບບັນຫາສະພາບອາກາດຕົກຕ່ຳ ເຊິ່ງມີທ່າອ່ຽງຈະຕ່ຳລົງອີກໃນໄລຍະເດືອນທັນວາ ຫາ ເດືອນກຸມພາ.
ທ່ານ ຊັດຊາດ ໄດ້ກ່າວຕື່ມວ່າ ທາງການໄດ້ພະຍາຍາມຄວບຄຸມກິດຈະກຳ ທີ່ກໍ່ໃຫ້ເກີດຝຸ່ນລະອອງເຊັ່ນ ການຈູດຂີ້ເຫຍື້ອ ການກໍ່ສ້າງ ແລະ ການເຜົາໄໝ້ຈາກເຄື່ອງຈັກລົດບັນທຸກ.
ຂະນະດຽວກັນ ເຈົ້າໜ້າທີ່ກະຊວງສາທາລະນະສຸກທົ່ວປະເທດໄທຈະເຝົ້າຕິດຕາມລະດັບຂອງຝຸ່ນ PM2.5 ແລະ ຈະເປີດເຫດສຸກເສີນສຳລັບເຂດໃດທີ່ມີລະດັບຄຸນະພາບຂອງອາກາດທີ່ບໍ່ດີຕໍ່ສຸຂະພາບເປັນເວລາ 3 ມື້.
ມົນລະພິດທາງອາກາດທີ່ປົກຄຸມໃນປະເທດລາວ
ໃນຂະນະດຽວກັນ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ອອກຄຳເຕືອນໃນວັນອັງຄານທີ່ຜ່ານມາ ກ່ຽວກັບມົນລະພິດທາງອາກາດທີ່ເປັນອັນຕະລາຍໃນທົ່ວປະເທດ.
ການສຶກສາຫຼ້າສຸຂອງ ອົງການອາຫານ ແລະ ການກະເສດແຫ່ງສະຫະປະຊາຊາດ (FAO) ລາຍງານວ່າ: 4 ແຂວງໃນພາກເໜືອ (ບໍ່ແກ້ວ ຜົ່ງສາລີ ອຸດົມໄຊ ແລະ ຫຼວງພະບາງ) ແລະ ສະຫວັນນະເຂດ ເປັນຈຸລວມມົນລະພິດໃນປະເທດລາວ.
ຜົນການວິໄຈພົບວ່າ ໄຟປ່າ ການຖາງປ່າເຮັດໄຮ່ ມີສ່ວນສຳຄັນທີ່ເຮັດໃຫ້ເກີດົນລະພິດທາງອາກາດ.
ແຫຼ່ງຂ່າວ The Laotian Times