ອີງຕາມກົດຫມາຍວ່າດ້ວຍກິລາ-ກາຍະກໍາ ສະບັບເລກທີ 15/ສພຊ, ລົງວັນທີ 6 ກໍລະກົດ 2012.
ອິງຕາມ: ແຈ້ງການຂອງທ່ານຫົວຫນ້າຫ້ອງວ່າການປົກຄອງແຂວງ ສາລະວັນ ສະບັບເລກທີ 67/ຫວຂ.ສວ ລົງວັນທີ 2 ກຸມພາ 2021
ເລື່ອງ: ການຕັ້ງຮ້ານສະຫນຸກເກີ້ ໃນແຂວງສາລະວັນ.
ອົງການປົກຄອງເມືອງສາລະວັນຂໍ ຖືເປັນກຽດແຈ້ງການມາຍັງທ່ານຊາບວ່າ ໃນໄລຍະຜ່ານມາ ອົງການປົກຄອງ ເມືອງໄດ້ໃຫ້ຄວາມສໍາຄັນຕໍ່ວຽກງານກິລາກາຍຍະກໍາ ແລະ ໄດ້ບັນຈຸເຂົ້າໃນຫຼັກການຈັດການຮຽນ-ການສອນ ຍ້ອນວ່າ ໄດ້ມີການສົ່ງເສີມດ້ານການກິລາໃຫ້ກາຍເປັນຂອງທົ່ວປວງຊົນ ເພື່ອເຮັດໃຫ້ເຍົາວະຊົນ, ຊາວຫນຸ່ມໃນທົ່ວສັງຄົມມີ ສຸຂະພາບແຂງແຮງ, ແຕ່ກິລາປະເພດສະນຸກເກີ້ ໂດຍສະເພາະແມ່ນຮ້ານສະນຸກເກີ້ທົ່ວໄປເຫັນວ່າມີລັກສະນະຫຼໍ່ແຫຼມເຊີ່ງບັນດາຜູ້ປະກອບການໃນທົ່ວເມືອງໄດ້ເປີດບໍລິການກິລາສະນຸກເກີ້ຢ່າງກ້ວາງຂວາງເຮັດໃຫ້ເປັນແຫຼ່ງມົ້ວສຸມຂອງເຍົາວະຊົນ-ຊາວຫນຸ່ມ ແລະ ພະນັກງານລັດທະກອນເກີດມີປະກົດການຫຍໍ້ທໍ້ຕ່າງໆໃນສັງຄົມ. ສະນັ້ນ,ເພື່ອເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.
ເຈົ້າເມືອງໆສາລະວັນຈຶ່ງອອກແຈ້ງການດັ່ງນີ້:
- ໃຫ້ຜູ້ປະກອບການຢຸດເຊົາໃຫ້ບໍລິການກິລາສະນຸກເກີ້ໃນທົ່ວເມືອງສາລະວັນ (ນັບທັງທີ່ອະນຸຍາດ ແລະ ບໍ່ອະນຸຍາດ) ເລີ່ມແຕ່ເດືອນມັງກອນປີ2023 ເປັນຕົ້ນໄປ.
- ຖ້າຫາກບຸກຄົນໃດ, ນິຕິບຸກຄົນໃດຫາກລະເມີດແຈ້ງການສະບັບນີ້ ມອບໃຫ້ເຈົ້າຫນ້າທີ່ກ່ຽວຂ້ອງຕັກເຕືອນ, ສ້າງບົດບັນທຶກກັບຜູ້ກ່ຽວພ້ອມທັງຕິດຕາມ, ແຕ່ຫາກຍັງຝ່າຝືນບໍ່ປະຕິບັດຕາມແຈ້ງການສະບັບນີ້ແລ້ວແມ່ນໃຫ້ເກັບມ້ຽນອຸປະກອນດັ່ງກ່າວດໍາເນີນການປັບໃຫມຕາມລະບຽບກົດຫມາຍຢ່າງເຂັ້ມງວດ.
- ມອບໃຫ້ຫ້ອງການສຶກສາທິການ ແລະ ກິລາເມືອງສາລະວັນສົມທົບກັບເຈົ້າຫນ້າທີ່ ປກສ ເມືອງ, ອໍານາດການ ປົກຄອງບ້ານທີ່ມີສ່ວນກ່ຽວຂ້ອງຈັດຕັ້ງເຜີຍແຜ່ແຈ້ງການສະບັບນີ້ໃຫ້ຮັບຮູ້ເຂົ້າໃຈຢ່າງເລິກເຊິ່ງ ດັ່ງນັ້ນຈິ່ງແຈ້ງມາຍັງທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ.
