ວັນທີ 19 ມັງກອນ 2023, ພະແນກຕໍາຫຼວດ ປ້ອງກັນເສດຖະກິດ ຫ້ອງຕໍາຫຼວດ ປກສ ນວ ສົມທົບກັບ ພະແນກຕໍາຫຼວດ ສິ່ງແວດລ້ອມ, ພະແນກອຸດສະຫະກໍາ ແລະ ການຄ້າ ນວ ທໍາລາຍໝາກກະໂພກ, ບັ້ງໄຟພຸ ມີນໍ້າໜັກ 651 ກິໂລກຣາມ ຢູ່ເຂດບ້ານຈໍາປາ ເມືອງສີໂຄດຕະບອງ ນະຄອນຫຼວງວຽງຈັນ; ໂດຍການນໍາພາຂອງ ພັທ ສົມຈິດ ຟອງສະຫວັນ ຮອງຫົວໜ້າ ພະແນກຕໍາຫຼວດປ້ອງກັນເສດຖະກິດ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ພັທ ສົມຈິດ ຟອງສະຫວັນ ໃຫ້ຮູ້ວ່າ: ພາຍຫຼັງເຈົ້າຄອງ ນວ ໄດ້ອອກຄໍາສັ່ງເລກທີ 01/ຈນວ ລົງວັນທີ 16 ມັງກອນ 2023, ວ່າດ້ວຍການເພີ່ມທະວີ ຈັດຕັ້ງປະຕິບັດການຫ້າມຜະລິດ, ນໍາເຂົ້າ, ສົ່ງອອກ, ຊື້-ຂາຍ, ມີໄວ້ໃນຄອບຄອງ, ຈູດ ຫຼື ຍິງໝາກກະໂພກ, ບັ້ງໄຟດອກ, ໂຄມໄຟລອຍຟ້າ ແລະ ກໍ່ສຽງແຕກໃນຕົວເມືອງ, ຊານເມືອງ ນວ, ພະແນກຕໍາຫຼວດປ້ອງກັນເສດຖະກິດ ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງ ລົງກວດກາ ແລະ ແກ້ໄຂ ຊາວຄ້າຂາຍຢູ່ເຂດເມືອງໄຊເສດຖາ, ເມືອງຈັນທະບູລີ, ເມືອງສີສັດຕະນາກ, ເມືອງສີໂຄດຕະບອງ ແລະ ເມືອງໄຊທານີ ພົບເຫັນໝາກກະໂພກ ແລະ ບັ້ງໄຟພຸ ຈໍານວນ 651 ກິໂລກຣາມ ຈຶ່ງໄດ້ຢຶດ ແລ້ວນໍາມາທໍາລາຍຖີ້ມ ເພື່ອເຮັດໃຫ້ໄລຍະສະເຫຼີມສະຫຼອງປີໃໝ່ຂອງຊາວຈີນ ແລະ ຊາວຫວຽດນາມ ມີຄວາມສະຫງົບ ເຮັດໃຫ້ສຽງແຕກສຽງດັງ ເນື່ອງນັນຢູ່ໃນ ນວ ຫຼຸດໜ້ອຍຖອຍລົງ.
_____
Cr. ປ້ອງກັນຄວາມສະຫງົບນະຄອນຫຼວງວຽງຈັນ