ທ່ານ ເກດສະກັນ ແສງປະດິດ ຫົວໜ້າສ່ວຍສາອາກອນແຂວງຄໍາມ່ວນໄດ້ຕາງໜ້າໃຫ້ພະນັກງານສ່ວຍສາອາກອນປະຈໍາແຂວງລາຍງານກ່ຽວກັບການຄຸ້ມຄອງຈັດເກັບລາຍຮັບສ່ວຍສາອາກອນໃນຕະຫຼອດໄລຍະປີ 2022ຜ່ານມາຕໍ່ຜູ້ສື່ຂ່າວທ້ອງຖິ່ນວ່າ : ໃນທ່າມກາງສະພາບການເມືອງ -ເສດຖະກິດທີ່ມີທັງກາລະໂອກາດເອື້ອອໍານວຍ , ສິ່ງທ້າທາຍ ແລະ ຜົນກະທົບຫຼາຍຢ່າງຕໍ່ການຈັດຕັ້ງປະຕິບັດແຜນພັດທະນາເສດຖະກິດ -ສັງຄົມ 05 ປີ ຄັ້ງທີ IX ຂອງແຂວງຄໍາມ່ວນ . ພ້ອມກັນນັ້ນກໍ່ຢູ່ໃນໄລຍະທີ່ທົ່ວພັກ , ທົ່ວກອງທັບ ແລະ ທົ່ວປວງຊົນຢູ່ແຂວງຄໍາມ່ວນກໍາລັງອອກແຮງແຂ່ງຂັນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄໍາມ່ວນເວົ້າລວມ , ເວົ້າສະເພາະສະມາຊິກພັກ-ພະນັກງານໃນຂົງເຂດການເງິນໃຫ້ປະກົດຜົນເປັນຈິງ.
ຄະນະສ່ວຍສາອາກອນແຂວງຄໍາມ່ວນມີ 03 ສະຫາຍ , ປະກອບມີ 03 ຂະແໜງຂຶ້ນກັບ , 6 ຕົວເມືອງມີເງື່ອນໄຂສ້າງຕັ້ງເປັນສ່ວຍອາກອນປະຈໍາເມືອງ ແລະ 4 ຕົວເມືອງເປັນໜ່ວຍງານສ່ວຍສາອາກອນປະຈໍາເມືອງ , ມີຈໍານວນພະນັກງານສົມບູນທົ່ວແຂວງ 162 ຄົນ , ຍິງ 42 ຄົນ , ຂັ້ນແຂວງຄຸ້ມຄອງຈໍານວນ 72 ຄົນ,ຍິງ 19 ຄົນ , ຂັ້ນເມືອງ 10 ຕົວເມືອງ 90 ຄົນ , ຍິງ 29 ຄົນ , ລະດັບວິຊາສະເພາະປະລິນຍາໂທຈໍານວນ 08 ຄົນ , ຍິງ 03 ຄົນ,ກໍາລັງໄປຄົ້ນຄວ້າປະລິນຍາເອກຢູ່ ສ.ສ ຫວຽດນາມ 01 ຄົນ , ປະລິນຍາຕີຈໍານວນ 104 ຄົນ , ຍິງ 28 ຄົນ , ຊັ້ນສູງຈໍານວນ 42 ຄົນ , ຍິງ 12 ຄົນ , ຊັ້ນກາງ 09 ຄົນ , ຍິງ 01 ຄົນ.
ທົ່ວແຂວງມີຫົວໜ່ວຍວິສາຫະກິດທັງໝົດຈໍານວນ 3.676 ຫົວໜ່ວຍ , ຫົວໜ່ວຍທີ່ຖືບັນຊີ 982 ຫົວ ໜ່ວຍ , ຫົວໜ່ວຍທີ່ຢູ່ໃນລະບົບອາກອນມູນຄ່າເພີ້ມ 865 ຫົວໜ່ວຍ , ຂັ້ນແຂວງຄຸ້ມຄອງຈໍານວນ 865 ຫົວ ໜ່ວຍ , ແຈ້ງມອບອາກອນປົກກະຕິ 523 ຫົວໜ່ວຍ , ບໍ່ມີການເຄື່ອນໄຫວ , ຢຸດເຊົາຊົ່ວຄາວ ແລະ ບໍ່ແຈ້ງມອບພັນທະອາກອນ 342 ຫົວໜ່ວຍ . ສໍາລັບຫົວໜ່ວຍທຸລະກິດທີ່ສ່ວຍສາອາກອນເມືອງຄຸ້ມຄອງມີຈໍານວນ 2.811 ຫົວໜ່ວຍ . ສາຂາຂອງຫົວໜ່ວຍທີ່ສູນກາງ ແລະ ຕ່າງແຂວງຄຸ້ມຄອງມີ 51 ຫົວໜ່ວຍ.
ສໍາລັບແຜນຈັດເກັບລາຍຮັບປີ 2022 ມີທັງໝົດ 351,18 ຕື້ກີບ ( ລາຍຮັບພາສີ-ສ່ວຍສາອາກອນ 339,82 ຕື້ກີບ , ລາຍຮັບທີ່ບໍ່ແມ່ນພາສີ-ອາກອນ 11,35 ຕື້ກີບ ) . ຂັ້ນແຂວງຄຸ້ມຄອງຈັດເກັບ 297,86 ຕື້ກີບ , ຂັ້ນເມືອງຄຸ້ມຄອງຈັດເກັບ 53,31 ຕື້ກວ່າກີບ.
ຜ່ານການຈັດຕັ້ງປະຕິບັດສາມາດຈັດເກັບໄດ້ 505,14 ຕື້ກີບ , ທຽບໃສ່ແຜນການປີປະຕິບັດໄດ້ 143,84 % ຫຼື ລື່ນແຜນການປີ 43,84 % ເທົ່າກັບ 153,96 ຕື້ກີບ ,ທຽບໃສ່ປີ 2021 ປະຕິບັດໄດ້ລື່ນ 224,19 ຕື້ກີບ . ໃນນີ້ສ່ວຍສາອາກອນປະຕິບັດໄດ້ 470,396 ຕື້ກີບ ເທົ່າກັບ 138,42 % . ລາຍຮັບທີ່ບໍ່ແມ່ນພາສີ-ອາກອນ 34,75 ຕື້ກີບ ເທົ່າກັບ 306,03 % . ຂັ້ນແຂວງປະຕິບັດໄດ້ 408,04 ຕື້ກີບ ເທົ່າກັບ 136,99 % ,ຂັ້ນເມືອງປະຕິບັດໄດ້ 97,11 ຕື້ກີບເທົ່າກັບ 182,14 % ລາຍຮັບດັ່ງກ່າວແຍກເປັນແຕ່ລະປະເພດຄື:
ລາຍຮັບສ່ວຍສາອາກອນປົກກະຕິ 319,69 ຕື້ກີບ ເທົ່າກັບ 123,52 % ,ລາຍຮັບຈາກພາສີທີ່ດິນ 7,37 ຕື້ກີບ ເທົ່າກັບ 95,90 % , ລາຍຮັບຈາກຄ່າທໍານຽມພະແນກການ 5,94 ຕື້ກີບ ເທົ່າກັບ 86,18 % , ຄ່າບໍລິການວິຊາການ 17,10 ຕື້ກີບ ເທົ່າກັບ 96,10 % , ລາຍຮັບຈາກຊັບພະຍາກອນ ແລະ ຄ່າຝາກຫຼວງ 129,27 ຕື້ກີບ ເທົ່າກັບ 247,35 % , ລາຍຮັບທີ່ບໍ່ແມ່ນພາສີ-ສ່ວຍສາອາກອນ 34,75 ຕື້ກີບ ເທົ່າກັບ 306,03 %.
ທ່ານ ເກດສະກັນ ແສງປະດິດ ຫົວໜ້າສ່ວຍສາອາກອນແຂວງຄໍາມ່ວນໄດ້ກ່າວຕື່ມວ່າ : ຄຽງຄູ່ກັບຂໍ້ສະດວກພວກເຮົາກໍ່ຍັງມີຂໍ້ຫຍຸ້ງຍາກເປັນຕົ້ນສະພາບລວມການເມືອງ- ເສດຖະກິດພາຍນອກມີຄວາມຜັນແປຢ່າງສັບສົນ , ຄາດຄະເນໄດ້ຍາກ , ການເພີ້ມຂຶ້ນລາຄາສິນຄ້າຫຼາຍປະເພດ , ສະພາບໄພເງິນເຟີ້ເກີດຂຶ້ນ , ການສະໜອງກັບຄວາມຕ້ອງການບໍ່ຢູ່ໃນສະພາບທີ່ສົມດູນກັນ , ອັດຕາແລກປ່ຽນມີການເໜັງຕິງສູງເຊິ່ງເປັນປັດໃຈສົ່ງຜົນກະທົບຕໍ່ການພັດທະນາເສດຖະກິດຂອງປະເທດເຮົາເວົ້າລວມ,ເວົ້າສະເພາະແຂວງຄໍາມ່ວນ.
ສໍາລັບທິດທາງແຜນການປີ 2023 ແຂວງຄໍາມ່ວນຖືກມອບໝາຍຈາກລັດຖະບານໃຫ້ເປັນແຂວງທີ່ມີລາຍຮັບເກີນດູນ ( ເປັນແຂວງກຸ້ມຕົນເອງທາງດ້ານງົບປະມານ ) ແລະ ໄດ້ຮັບແຜນຈັດເກັບລາຍຮັບຈໍານວນ 947,02 ຕື້ກີບ . ໃນນີ້ລາຍຮັບພາສີ-ສ່ວຍສາອາກອນ 929,89 ຕື້ກີບ , ລາຍຮັບບໍ່ແມ່ນພາສີ-ອາກອນ 17,13 ຕື້ກີບ.
ແຫຼ່ງຂ່າວ: mediaALAOS