ເຈົ້າໜ້າທີ່ກະຊວງສາທາລະນະສຸກທ້ອງຖິ່ນຈີນເປີດເຜີຍວ່າ ປະຊາຊົນໃນມົນທົນເຫີໜານ ທີ່ມີປະຊາກອນຢ່າງໜາແໜ້ນ ໄດ້ຕິດໂຄວິດ-19 ເກືອບ 90% ແລ້ວ.
ທ່ານ ກ່ານ ກວນເສິງ ຜູ້ອຳນວຍການຄະນະກຳມາທິການສຸຂະພາບ ມົນທົນເຫີໜານ ທາງຕອນກາງຂອງປະເທດຈີນໄດ້ເປີດເຜີຍວ່າ ປະຊາຊົນເກືອບ 90% ທົ່ວມົນທົນເຫີໜານທີ່ມີປະຊາກອນຫຼາຍເຖິງ 99 ລ້ານຄົນ ແລະ ປະມານ 88,5 ລ້ານຄົນໄດ້ຕິດເຊື້ອພະຍາດໂຄວິດ-19ແລ້ວ.
ເຊິ່ງ ກ່ານ ກວນເສິງ ກ່າວວ່າ ຍອດຜູ້ປ່ວຍທີ່ໄປຄຣີນິກ ສຳລັບຜູ້ປ່ວຍທີ່ເປັນໄຂ້ມີຈຳນວນສູງສຸດໃນວັນທີ 19 ທັນວາ 2022 ຫຼັງຈາກນັ້ນກໍຫຼຸດລົງເລື່ອຍໆ.
ທັ້ງນີ້ ພົບວ່າຕົວເລກຜູ້ຕິດເຊື້ອຂອງ ມົນທົນເຫີໜານ ກົງກັນຂ້າມກັບຕົວເລກຜູ້ຕິດເຊື້ອໂຄວິດຂອງລັດຖະບານກາງ ຈາກຂໍ້ມູນຂອງທາງການມີຜູ້ຕິດເຊື້ອພະຍາດໂຄວິດ-19 ພຽງແຕ່ 120.000 ຄົນ ຈາກປະຊາກອນທັງໝົດ 1.400 ລ້ານຄົນ ແລະ ເສຍຊີວິດ 30 ຄົນ ນັບຕັ້ງແຕ່ປ່ຽນນະໂຍບາຍໂຄວິດ.
ນອກນີ້ທາງເຈົ້າໜ້າທີ່ທ້ອງຖິ່ນໃນບັນດາແຂວງອື່ນໆ ຍັງເປີດເຜີຍຂໍ້ມູນທີ່ແຕກຕ່າງຈາກຂໍ້ມູນຂອງລັດຖະບານກາງ.
ແຫຼ່ງຂ່າວ The Guardian