ກະຊວງ​ສາທາລະນະ​ສຸກ​ໄດ້​ແນະນຳ​ໃຫ້​ທຸກ​ຄົນ​ເອົາ​ໃຈ​ໃສ່​ເປັນ​ພິ​ເສດ ​ຕໍ່​ສຸຂະພາບ​ຂອງ​ເດັກນ້ອຍ ​ແລະ ຜູ້​ສູງ​ອາຍຸ ​ເພາະ​ພະຍາດ​ທາງ​ເດີນ​ຫາຍ​ໃຈ​ພວມ​ເພີ່ມ​ຂຶ້ນຫຼາຍ​ໃນຊ່ວງອາກາດໜາວ.

ອີງຕາມຂໍ້ມູນຈາກໂຮງໝໍເສດຖາທິລາດ ໃຫ້ຮູ້ວ່າ: ໃນຈໍານວນຄົນເຈັບ 500 ຄົນ ທີ່ເຂົ້າມາປິ່ນປົວຢູ່ໂຮງໝໍໃນແຕ່ລະມື້ນັ້ນ ມີ 20% ແມ່ນເປັນຫວັດທຳມະດາ ນ້ຳມູກໄຫຼ ແລະ ໄອ.

ເດັກນ້ອຍ ແລະ ຜູ້ສູງອາຍຸ ທີ່ມີພູມຕ້ານທານຕໍ່າ ແມ່ນມັກຈະມີບັນຫາກ່ຽວກັບລະບົບຫາຍໃຈ ລວມທັງເຈັບຄໍ.

ໂດຍທາງກະຊວງ ໄດ້ແນະນຳໃຫ້ປະຊາຊົນ​ກິນ​ແຕ່​ອາຫານ​ທີ່​ມີ​ທາດ​ບຳລຸງ ​ແລະ​ ປຸງ​ແຕ່ງ​ຢູ່​ໃນ​ບ້ານ ດື່ມນ້ຳອຸ່ນເປັນປະຈຳ ອອກກຳລັງກາຍເປັນປະຈຳ ແລະ ພັກຜ່ອນໃຫ້ພຽງພໍ ພ້ອມທັງໃຫ້ຢູ່ໃນຄວາມອົບອຸ່ນ ແລະ ຮັກສາຄວາມສະອາດໃນເຮືອນ ເພື່ອຫຼຸດຜ່ອນຄວາມສ່ຽງຕໍ່ການແຜ່ລະບາດຂອງໄວຣັສຕາມລະດູການ.

ເຈົ້າ​ໜ້າ​ທີ່​ສາ​ທາ​ລະ​ນະ​ສຸກ​ກ່າວ​ວ່າ ຈຳ​ນວນ​ຄົນ​ເຈັບ​ຈະ​ເພີ່ມ​ຂຶ້ນເລື່ອຍໆ ຖ້າ​ຫາກ​ວ່າ​ປະ​ຊາ​ຊົນ​ບໍ່​ໄດ້​ດູ​ແລເບິ່ງແຍງ​ສະ​ມາ​ຊິກ​ໃນ​ຄອບ​ຄົວ​, ສະນັ້ນ ຖ້າຄົນເຈັບເປັນຫວັດຄວນປິ່ນປົວທັນທີ ແລະ ຢູ່ເຮືອນ ຖ້າບໍ່ດັ່ງນັ້ນ ມັນຈະຕິດເຊື້ອໃຫ້ແກ່ຄົນອື່ນໆໃນຄອບຄົວ ຫຼື ໝູ່ເພື່ອນ.

ທີ່ສຳຄັນ ຄວນປຶກສາທ່ານໝໍຢູ່ໂຮງໝໍ ເພື່ອກວດຫາພະຍາດໂຄວິດ-19 ແທນທີ່ຈະຊື້ຢາຕາມຮ້ານກິນເອງ.

ໄວຣັດທີ່ມາພ້ອມກັບຊ່ວງອາກາດເຢັນ ແລະ ໂຄວິດ-19 ສາມາດແຜ່ໄປໃຫ້ຜູ້ອື່ນໄດ້ໂດຍການຈາມ ໄອ ຫຼື ແມ່ນແຕ່ເວົ້າເຊິ່ງໜ້າກັນ, ໂດຍປົກກະຕິ ຜູ້ທີ່ເປັນຫວັດຄວນຟື້ນຕົວພາຍໃນໜຶ່ງອາທິດ ຖ້າໄດ້ຮັບການປິ່ນປົວຈາກແພດໝໍ.

ອີງຕາມ​ສູນຂ່າວສານການແພດສຸຂະສຶກສາໄດ້ລາຍງານວ່າ ເພື່ອ​ຫຼຸດ​ຜ່ອນ​ບັນ​ຫາ​ທາງ​ເດີນ​ຫາຍ​ໃຈ ແລະ ການ​ຕິດ​ເຊື້ອ​ພະ​ຍາດ​ໂຄວິດ-19 ທຸກ​ຄົນ​ຄວນໃສ່​ໜ້າ​ກາກ​ອະນາໄມ​ໃນເວລາ​ຢູ່​ບ່ອນ​ແອ​ອັດ​ ແລ້ວຄວນ​ລ້າງ​ມື​ເປັນປະຈຳ ແລະ ຄວນຮັກສາໄລຍະຫ່າງໜຶ່ງແມັດເພື່ອຄວາມປອດໄພ.

ແຫຼ່ງຂ່າວ Vientiane Times