spot_img
Homeຂ່າວຄວາມສະຫງົບປກສ ເມືອງ ວຽງທອງ ຈັບໂຈນງັດເຮືອນປະຊາຊົນ

ປກສ ເມືອງ ວຽງທອງ ຈັບໂຈນງັດເຮືອນປະຊາຊົນ

Published on

ເຈົ້າໜ້າທີ່ຕໍາຫຼວດ ສືບສວນ-ສອບສວນ ປກສ ເມືອງ ວຽງທອງ ແຂວງບໍລິຄໍາໄຊ ໄດ້ໃຫ້ຮູ້ວ່າ: ໃນວັນທີ 10 ເດືອນທັນວາ 2022 ທີ່ຜ່ານມາ ໄດ້ມີພົນລະເມືອງດີລາຍງານວ່າມີຄົນນໍາເອົາແຫວນຄ້າຍຄືຄໍາມາຂາຍໃຫ້ຕົນ ເຊິ່ງແຫວນດັ່ງກ່າວມີຮູບປະພັນລັກສະນະຄ້າຍຄືກັບຜູ້ເສຍຫາຍໄດ້ມາແຈ້ງໄວ້, ດັ່ງນັ້ນທາງເຈົ້າໜ້າທີ່ຈຶ່ງໄດ້ເລັ່ງຕິດຕາມຊອກຄົ້ນຫາເປົ້າໝາຍຕ້ອງສົງໄສຢ່າງຮີບດ່ວນ, ຮອດວັນທີ 12 ທັນວາ 2022 ຈຶ່ງສາມາດກັກຕົວ ທ້າວ ວັນທອງ ແສງພະພົງ ອາຍຸ 19 ປີ, ປະຊາຊົນຢູ່ບ້ານ ນໍ້າຢ້າງ ເມືອງວຽງທອງ ແຂວງ ບໍລິຄໍາໄຊ ຜ່ານການກວດຄົ້ນຕົວ ແລະ ເຮືອນຂອງຜູ້ກ່ຽວພົບເຫັນເຄື່ອງຂອງກາງທີ່ພົວພັນກັບຄະດີຄື: ມີເງິນ 40.000.000 ກີບ, ເງິນກີບຫົວໜາມໃຫ່ຍ 9 ກີບ, ເງິນກີບຫົວໜາມນ້ອຍ 4 ກີບ, ເງິນບີ້ 11 ຫຼຽນ, ເງິນອັດ, ເງິນຊູ 2 ຫຼຽນ, ເງິນຂັນນ້ອຍ 1 ຂັນ, ແຫວນຄ້າຍຄືເງິນ 1 ວົງ, ຕ້າງຫູຄ້າຍຄືເງິນ 1 ຄູ່, ໂຊບປືນສັ້ນK59 01 ໂຊບ, ລູກປືນK59 03 ລູກ.

ຜ່ານການສືບສວນ-ສອບສວນ ທ້າວ ວັນທອງ ໄດ້ໃຫ້ການຮັບສາລະພາບວ່າ: ເຄື່ອງຂອງດັ່ງກ່າວໄດ້ຮັບມາຈາກທ້າວ ສີພອນ ອາຍຸ 16 ປີ ແລະ ທ້າວ ສິງຄໍາ ອາຍຸ 18 ປີ(ຜູ້ເປັນນ້ອງຊາຍ)ເອົາມາຝາກໄວ້ ຕົນຈຶ່ງນໍາເອົາແຫວນຄ້າຍຄືຄໍາໄປຂາຍຢູ່ຮ້ານໜ້າຕະຫຼາດບ້ານນໍ້າຢ້າງ ໄດ້ເງິນ 1.500.000 ກີບ ແລ້ວນໍາໄປໃຊ້ຈ່າຍຫຼິ້ນກິນຟູມເຟືອຍຈົນໝົດ, ມາຮອດວັນທີ 17 ທັນວາ 2022 ພໍ່ແມ່ຜູ້ປົກຄອງ ຈຶ່ງນໍາຕົວ ທ້າວ ສີພອນ ແລະ ທ້າວ ສິງຄໍາ ມາມອບຕົວໃຫ້ແກ່ເຈົ້າໜ້າທີ່ດໍາເນີນການສືບສວນ-ສອບສວນຕາມກົດໝາຍ ເຊິ່ງພວກກ່ຽວທັງສອງໄດ້ໃຫ້ການຮັບສາລະພາບຕໍ່ເຈົ້າໜ້າທີ່ວ່າ: ໃນຄັ້ງວັນທີ 06 ທັນວາ 2022 ພວກຕົນທັງສອງໄດ້ຮ່ວມກັນລົງມືງັດເຂົ້າເຮືອນຂອງປະຊາຊົນຢູ່ຕໍ່ໜ້າປ່າຊ້ານໍ້າງອມ ບ້ານ ນໍ້າຢ້າງ ເມືອງ ວຽງທອງ ໂດຍໄດ້ຂີ່ລົດຈັກຊ້ອນກັນໄປຈອດປະໄວ້ທາງເຂົ້າປ່າຊ້າແລ້ວຍ່າງໄປໃຊ້ພ້າ ແລະ ເຫຼັກງັດຢາງຕີນລົດທີ່ກຽມມາງັດເຂົ້າປະຕູເຮືອນນ້ອຍ ແລ້ວງັດເຂົ້າປະຕູເຮືອນໃຫ່ຍເຂົ້າໄປກວດຄົ້ນເອົາເຄື່ອງຢູ່ໃນຫ້ອງນອນໄດ້ໂທລະສັບ 02 ເຄື່ອງ.

ຈາກນັ້ນໄດ້ລາກເອົາຕູ້ເຊັບອອກມານອກຫ້ອງແລ້ວເອົາພ້າ ແລະ ເຫຼັກງັດຢາງຕີນລົດມາງັດຝາຕູ້ເຊັບໃຊ້ເວລາງັດປະມານ 01 ຊົ່ວໂມງຈຶ່ງສໍາເລັດ ແລ້ວເກັບເອົາຊັບສິນໃນນັ້ນມີເງິນກີບປະມານ 65.000.000 ກີບ, ຖົງຜ້າສີຟ້າທີ່ບັນຈຸສາຍຄໍຄ້າຍຄືເງິນ 03 ເສັ້ນ, ແຫວນຄ້າຍຄືເງິນ 1 ວົງ, ແຫວນຄ້າຍຄືຄໍາ 01 ວົງ, ເງິນບາດ 5.000 ບາດ, ປື້ມບັນຊີທະນາຄານ 01 ຫົວ, ເງິນຕ່າງປະເທດທີ່ມີໜັງສືຍັນ 01 ໃບ, ເງິນຂັນ ແລະ ເງິນກີບຫົວໜາມຈໍານວນໜຶ່ງ, ເມື່ອລັກເອົາຊັບສິນໄດ້ແລ້ວກໍ່ພາກັນຂັບຂີ່ລົດໄປທາງ ບ້ານ ສົບນາ ເມືອງ ວຽງທອງ ພໍໄປຮອດປ່າແຫ່ງໜຶ່ງກໍ່ໄດ້ເອົາເງິນມາແບ່ງປັນກັນຄົນລະ 35.000.000 ກີບ, ສ່ວນຖົງທີ່ບັນຈຸເຄື່ອງເງິນກີບເງິນຂັນແມ່ນທ້າວ ສີພອນ ເກັບຮັກສາໄວ້, ມື້ຕໍ່ມາ ວັນທີ 7 ທັນວາ 2022 ກໍ່ໄດ້ເອົາໄປຝາກໄວ້ນໍາ ທ້າວ ວັນທອງ ໂດຍບອກວ່າເຄື່ອງດັ່ງກ່າວພວກຕົນໄດ້ໄປລັກມາ ແລະ ພວກຕົນກໍ່ໄດ້ແບ່ງເງິນທີ່ລັກມາໄດ້ໃຫ້ທ້າວ ວັນທອງ ຄົນລະ 8.000.000 ກີບ, ລວມເປັນ 16.000.000 ກີບ.

ທ້າວ ສີພອນ ແລະ ທ້າວ ສິງຄໍາ ຍັງໄດ້ໃຫ້ການຕື່ມວ່າ: ກ່ອນໜ້ານີ້ໃນຄັ້ງວັນທີ 26 ພະຈິກ 2022 ໄດ້ຮ່ວມມືກັນງັດເຮືອນຫຼັງໜຶ່ງຢູ່ທີ່ບ້ານ ນໍ້າຢ້າງ ເມືອງວຽງທອງ ໄດ້ສາຍຄໍຄ້າຍຄືຄໍາ 1 ເສັ້ນ, ຕ້າງຫູຄ້າຍຄືຄໍາ 01 ກິ່ງ, ປືນສັ້ນ 01 ກະບອກ, ລູກປືນ 09 ລູກ, ເງິນ 5.200.000 ກີບ, ບັດຕື່ມເງິນໂທລະສັບ 10 ບັດ, ຈາກນັ້ນກໍ່ພາກັນຂັບຂີ່ລົດຈັກເອົາສາຍຄໍຄໍາໄປຂາຍຢູ່ທາງແບ່ງ ບ້ານ ເຫຼົ່າ ເມືອງ ວຽງທອງ ໄດ້ເງິນ 15.000.000 ກີບ ແລ້ວກໍ່ເອົາເງິນທັງໝົດມາແບ່ງປັນກັນຄົນລະ 10.000.000 ກີບ. ຕໍ່ກັບຄະດີດັ່ງກ່າວ ທາງເຈົ້າໜ້າທີ່ ປກສ ເມືອງວຽງທອງ ແຂວງ ບໍລິຄໍາໄຊໄດ້ໃຫ້ຮູ້ຕື່ມວ່າ: ທ ສິງຄຳ ແລະ ທ້າວ ສີພອນ ແມ່ນກະທໍາຜິດຂໍ້ຫາລັກຊັບ ຕາມມາດຕາ 231 ສ່ວນທ້າວ ວັນທອງ ແມ່ນກະທໍາຜິດໃນຂໍ້ຫາການຊູກເຊືອງຂອງຜິດກົດໝາຍ ຕາມມາດຕາ 244 ຂອງປະມວນກົດໝາຍອາຍາ ແຫ່ງ ສປປ ລາວ, ປະຈຸບັນເຈົ້າໜ້າທີ່ພວມສືບຕໍ່ດໍາເນີນການສືບສວນ-ສອບສວນ ຕໍ່ພວກກ່ຽວທັງ 03 ຄົນຢ່າງລະອຽດຖີ່ຖ້ວນ, ຖືກຕ້ອງ, ພາວະວິໄສ ເພື່ອດໍາເນີນຄະດີຕໍ່ພວກກ່ຽວຕາມລະບຽບກົດໝາຍຢ່າງເຂັ້ມງວດ.

ທີ່ມາ: ຄວາມສະຫງົບແຂວງບໍລິຄຳໄຊ

ບົດຄວາມຫຼ້າສຸດ

ເສຍຊີວິດຢ່າງນ້ອຍ 4 ຄົນ ເກີດເຫດກວດຍິງຢູ່ບາແຫ່ງໜຶ່ງ ໃນລັດເຊົາແຄໂລໄລນາ ສະຫະລັດອາເມລິກາ

ເກີດເຫດກວດຍິງຢູ່ບາແຫ່ງໜຶ່ງ ໃນລັດເຊົາແຄໂລໄລນາ ສະຫະລັດອາເມລິກາ ສຳນັກຂ່າວຕ່າງປະເທດລາຍງານໃນຊ່ວງຕອນເຊົ້າຂອງວັນອາທິດ 12 ຕຸລາ 2025 ເກີດເຫດເຫດການກວດຍິງ ພາຍໃນ ບາແຫ່ງໜຶ່ງ ເຊິ່ງເປັນບາທີ່ໄດ້ຮັບຄວາມນິຍົມຢູ່ໃນລັດເຊົາແຄໂລໄລນາ ສະຫະລັດອາເມລິກາ ເຊິ່ງເຫດການດັ່ງກ່າວເຮັດໃຫ້ມີຄົນເສຍຊີວິດຢ່າງນ້ອຍ 4 ຄົນ...

ເລີ່ມ! ວັນທີ 1 ພະຈິກ 2025 ທ່ານ ໂດນັລ ທຣຳ ປະທານນາທິບໍດີ ສະຫະລັດອາເມລິກາ ຈະຮຽກເກັບພາສີນຳເຂົ້າສິນຄ້າຈາກຈີນ ເພີ່ມອີກ 100%

ລາຍງານຈາກສຳນັກຂ່າວຕ່າງປະເທດ ໃນວັນທີ 10/10/2025 ທີ່ຜ່ານມາ ທ່ານ ໂດນັລ ທຣຳ ປະທານນາທິບໍດີ ສະຫະລັດອາເມລິກາ ໄດ້ອອກຄໍາສັ່ງ ຈະຮຽກເກັບພາສີນຳເຂົ້າສິນຄ້າຈາກຈີນ ເພີ່ມອີກ 100% ຈາກທີ່ປັດຈຸບັນສະຫະລັດເກັບພາສີສິນຄ້າຈີນຢູ່ທີ່...

ອຸທາຫອນ! ແມ່ຕູ້ຊາວຈີນມີຄວາມເຊື່ອແປກ ຕັດສິນໃຈກິນກົບສົດໆລົງທ້ອງ ຫວັງໃຫ້ເຊົາເຈັບຫຼັງ ແຕ່ສຸດທ້າຍອາການໜັກ

ເມື່ອປວດຫຼັງຫຼາຍຄົນອາດຈະເລືອກກິນຢາ ຫຼື ໄປຫາແພດ ແມ່ນບໍ່, ແຕ່ມີລາຍງານຂ່າວຈາກເມືອງຫາງໂຈ ປະເທດຈີນ, ເມືອບໍ່ດົນມານີ້ ວ່າ ມີແມ່ຕູ້ຄົນໜຶ່ງ ມີອາການເຈັບຫຼັງ ແລະເລືອກວິທີຮັກສາຕາມຄວາມເຊື່ອຂອງຕົນ ໂດຍການກືນກິນກົບສົດລົງທ້ອງ ຈົນເຮັດໃຫ້ເຊື້ອພະຍາດເຂົ້າສູ່ຮ່າງກາຍ. ເຊິ່ງກ່ອນເກີດເຫດແມ່ຕູ້ໄດ້ຂໍໃຫ້ພີ່ນ້ອງໄປຈັບກົບຂະໜາດນ້ອຍມາໃຫ້ ໂດຍບໍ່ໄດ້ບອກວ່າຈະເອົາໄປເຮັດຫຍັງ,...

ວັນການທູດລາວຄົບຮອບ 80 ປີ ປັດຈຸບັນ ລາວມີສາຍພົວພັນການທູດກັບ 151 ປະເທດ ມີສໍານັກງານຕາງໜ້າການທູດ ຢູ່ຕ່າງປະເທດ 41 ແຫ່ງ

ວັນການທູດລາວຄົບຮອບ 80 ປີ (12/10/1945-12/10/2025) ແມ່ນວັນສຳຄັນທາງປະຫວັດສາດຂອງຊາດ ທີ່ມີຄວາມໝາຍຄວາມສຳຄັນ ເພາະສະແດງອອກພູມປັນຍາຄວາມສະຫລາດສ່ອງໃສຂອງບັນພະບູລຸດ ແລະ ຄວາມສຳເລັດຂອງພາລະກິດຕ່າງໆຕັ້ງແຕ່ອາດີດຮອດປັດຈຸບັນ ແລະ ແນໃສ່ສືບຕໍ່ສ້າງເປັນບົດຮຽນ ເປັນມູນມັງມໍລະດົກຕົກທອດໃຫ້ແກ່ຄົນຮຸ່ນ ໃໝ່ຕໍ່ໆໄປໃນອະນາຄົດ. ເຊິ່ງກົມການເມືອງສູນກາງພັກໄດ້ອອກແຈ້ງການສະບັບເລກທີ...