ຍີ່ປຸ່ນຫິມະຕົກໜັກສົ່ງຜົນກະທົບຫຼາຍຕໍ່ປະຊາຊົນ

0
610

ພື້ນທີ່ທາງຕາເວັນຕົກຂອງຍີ່ປຸ່ນກຳລັງພົບກັບຫິມະທີ່ຕົກໜັກ ເຮັດໃຫ້ການສັນຈອນຕິດຂັດຫຼາຍ ແລະ ໄຟຟ້າດັບ ສົ່ງຜົນກະທົບໃຫ້ແກ່ປະຊາຊົນຫຼາຍກວ່າ 20.000 ຫຼັງຄາເຮືອນ.

ຍີ່ປຸ່ນປະເຊີນກັບສະພາບອາກາດໜາວຫຼາຍ ແລະ ມີຫິມະຕົກໜັກໃນຫຼາຍແຂວງ ໂດຍສະເພາະແມ່ນແຂວງນີງາຕະ ເຊິ່ງຕັ້ງຢູ່ດ້ານຕາເວັນຕົກຂອງປະເທດ ສົ່ງຜົນໃຫ້ການສັນຈອນຕາມຖະໜົນຫົນທາງຕິດຂັດ ບໍ່ສາມາດເໜັງຕີງໄດ້ ມີລົດຫຼາຍຮ້ອຍຄັນທີ່ຖືກຫິມະປົກຄຸມ ເສັ້ນທາງຫຼັກຕ່າງໆກໍບໍ່ສາມາດສັນຈອນໄດ້ ມີລົດຕິດຍາວໄປຕາມໄລຍະທາງຫຼາຍກວ່າ 20 ກິໂລແມັດ ນອກຈາກນັ້ນຍັງໄດ້ມີການຍົກເລີກຂະບວນລົດໄຟໃນມື້ນີ້.

ຂະນະດຽວກັນມີລາຍງານຕື່ມອີກວ່າກະແສໄຟຟ້າໄດ້ມີການດັບເປັນວົງກວ້າງໃນແຂວງນີງາຕະ ໂດຍມີປະຊາຊົນໄດ້ຮັບຜົນກະທົບຫຼາຍກວ່າ 20.000 ຫຼັງຄາເຮືອນ.

ຈົນຮອດຕອນນີ້ມີໜ່ວຍງານບັນເທົາທຸກ ແລະ ກອງກຳລັງປ້ອງກັນຂອງຍີ່ປຸ່ນໄດ້ມີການກະຈາຍກຳລັງລົງພື້ນທີ່ເພື່ອໃຫ້ຄວາມຊ່ວຍເຫຼືອ ແລະ ບັນເທົາຄວາມເດືອດຮ້ອນຂອງປະຊາຊົນ ຈາກບັນຫາການຈາລະຈອນຕິດຂັດຈາກສະພາບອາກາດ ແລະ ຫິມະ ຕາມຄຳຮ້ອງຂອງລັດຖະບານທ້ອງຖິ່ນ.

ແຫຼ່ງຂ່າວ Japan Today