ໃນວັນທີ 30 ພະຈິກ 2022, ສະມັດຊາໃຫຍ່ ອົງການ ສປຊ ໄດ້ພິຈາລະນາໃນຫົວຂໍ້ “ບັນຫາ ປາແລັສຕິນ” ເຊິ່ງເປັນໜຶ່ງໃນຫນຶ່ງໃນບັນດາສິ່ງທ້າທາຍທີ່ຍັງບໍ່ທັນໄດ້ຮັບການແກ້ໄຂ ແລະ ຍັງຄົງຢູ່ໃນວາລະ ຂອງອົງການ ສປຊ ມາຍາວນານກວ່າ 7 ທົດສະວັດ. ໃນການພິຈາລະນາບັນຫາດັ່ງກ່າວໃນປີນີ້, ທ່ານ ເອກອັກຄະລັດຖະທູດ, ຜູ້ຕາງໜ້າຖາວອນແຫ່ງ ສປປ ລາວ ປະຈໍາອົງການ ສປຊ ໄດ້ຂຶ້ນກ່າວຄໍາເຫັນ ຕໍ່ສະມັດຊາໃຫຍ່ ໂດຍຢໍ້າຄືນ ທັດສະນະອັນສະເຫມີຕົ້ນສະເຫມີປາຍ ຂອງ ສປປ ລາວ ດັ່ງທີ່ລະບຸຢູ່ໃນສານອວຍພອນ ຂອງທ່ານ ປະທານປະເທດ ແຫ່ງ ສປປ ລາວ ເນື່ອງໃນວັນສາກົນເພື່ອຄວາມສາມັກຄີກັບປະຊາຊົນ ປາແລສຕິນ, ໃນວັນທີ 29 ພະຈິກ 2022 ຜ່ານມາ.
ເຊິ່ງໄດ້ຢືນຢັນຄືນການສະໜັບສະໜູນຄວາມເປັນເອກະລາດ ແລະ ອະທິປະໄຕຂອງ ລັດປາແລສຕິນ ແລະ ການແກ້ໄຂຂໍ້ຂັດແຍ່ງ ລະຫວ່າງ ອິດສະຣາແອນ ແລະ ປາແລສຕິນ ໂດຍສັນຕິວິທີ, ພ້ອມທັງ ເຄົາລົບສິດທິອັນຊອບທໍາຂອງປະຊາຊົນ ປາແລສຕິນ ລວມທັງສິດທິໃນການຕັດສິນໂຊກຊາຕາກໍາດ້ວຍຕົນເອງ, ການແກ້ໄຂບັນຫາດັ່ງກ່າວ ໃນຮູບແບບ ເປັນສອງລັດ ໂດຍສອດຄ່ອງກັບບັນດາຍັດຕິຂອງອົງການ ສປຊ ແລະ ກົດໝາຍສາກົນທີ່ກ່ຽວຂ້ອງ.
ສປປ ລາວ ຮ່ວມກັບວົງຄະນະຍາດສາກົນ ສືບຕໍ່ສະໜັບສະໜູນ ສັນຕິພາບທີ່ຍືນຍົງ ຢູ່ຕາເວັນອອກກາງ ຊຶ່ງມີຄວາມສຳຄັນທີ່ສຸດ ຕໍ່ກັບຄວາມໝັ້ນຄົງຂອງພາກພື້ນ ແລະ ສາກົນ, ຢໍ້າຄືນການສະໜັບສະໜູນຕໍ່ຄວາມພະຍາຍາມຮ່ວມກັນຂອງວົງຄະນາຍາດສາກົນ ໃນການແກ້ໄຂບັນຫາດັ່ງກ່າວ ໂດຍການຄົບລົບອະທິປະໄຕຂອງລັດ ແລະ ປະຊາຊົນ ປາແລສຕິນ ໃນການໄດ້ຮັບກຽດສັກສີ ແລະ ຄວາມຍຸດຕິທຳ ໂດຍມີ ເຢຣູຊາເລັມຕາເວັນອອກ ເປັນນະຄອນຫຼວງ, ຢູ່ຄຽງຄູ່ພາຍໃຕ້ ສັນຕິພາບ ແລະ ຄວາມໝັ້ນຄົງ ຮ່ວມກັບລັດອິດສະຣາແອນ ໃນເຂດແດນທີ່ສາກົນຮັບຮູ້.