ໃນວັນທີ 11 ພະຈິກ 2022 ຜ່ານມາ, ຢູ່ທີ່ສະໜາມຝຶກຊ້ອມຍິງລູກປືນຂອງກອງພັນນ້ອຍ 598 (ຜາແດງ) ກອງພັນປ້ອງກັນເຄື່ອນທີ່ ປກສ ແຂວງໄຊສົມບູນ ໄດ້ຈັດຕັ້ງຫັດແອບ-ຝຶກຊ້ອມຍິງລູກປືນແທ້, ໂດຍມີ ພັອ ອິນປັນ ຍາດຕິວົງ ຮອງກອງບັນຊາການ ປກສ ແຂວງ, ມີຄະນະກອງພັນ, ແຂກຮັບເຊີນ ຈາກພາຍໃນກົມກອງ, ຕະຫຼອດຮອດ ນາຍ ແລະ ພົນຕໍາຫຼວດເຂົ້າຮ່ວມ 81 ສະຫາຍ.
ຈຸດປະສົງ ເພື່ອຍົກສູງປະສິດທິພາບວຽກງານວິຊາສະເພາະຂອງກຳລັງປ້ອງກັນເຄື່ອນທີ່ ແນໃສ່ຮັບປະກັນຄວາມ ພ້ອມທຸກດ້ານ ເພື່ອຕອບຕ້ານ ແລະ ແກ້ໄຂທຸກໜໍ່ແໜງປະກົດການຫຍໍ້ທໍ້ທີ່ອາດຈະເກີດຂຶ້ນໃນສັງຄົມ, ສ້າງປັດໄຈເຮັດໃຫ້ ແຂວງໄຊສົມບູນ ມີຄວາມສະຫງົບ ປອດໄພ, ໄດ້ຮັບຄວາມເຊື່ອໝັ້ນໄວ້ວາງໃຈຈາກພໍ່ແມ່ປະຊາຊົນ, ການຈັດຕັ້ງພັກ-ລັດ, ນັກທຸລະກິດ ແລະ ຜູ້ປະກອບການທຸກພາກສ່ວນ ສ້າງທ່ວງທ່າທີ່ດີໃຫ້ແກ່ ການສ້າງສາພັດທະນາປະເທດຊາດ ກໍຄື ແຂວງໄຊສົມບູນໃຫ້ຈະເລີນກ້າວໜ້າຂຶ້ນຢ່າງບໍ່ຢຸດຢັ້ງ.
ທ່ານ ພັທ ຈັນທະລາ ສີປະເສີດ ຮອງຫົວໜ້າກອງພັນປ້ອງກັນເຄື່ອນທີ່ ໃຫ້ຮູ້ວ່າ: ການຈັດຕັ້ງປະຕິບັດການຫັດແອບ-ຝຶກຊ້ອມປະຈຳປີ 2022, ອາວຸດທີ່ນໍາໃຊ້ເຂົ້າໃນການຫັດແອບ-ຝຶກຊ້ອມປະກອບມີ: ປືນ KPM ( ກາເປແອັມ )ໃຊ້ຕິດລົດຈຳນວນ 1 ກະບອກ, ປືນ AK ( ອາກາ ) ຈໍານວນ 21 ກະບອກ, ປືນ T97 ( ເຕເກົ້າເຈັດ ) 21 ກະບອກ, ປືນ ສັ້ນ MP34 ( ແອັມເປສາມສີ່ ) ຈໍານວນ 8 ກະບອກ ແລະ ປືນ APD ( ອາເປເດ ) 1 ກະບອກ.
ແຫຼ່ງຂ່າວ: ຄວາມສະຫງົບ