ທາງການໂປແລນໄດ້ອອກມາຢືນຢັນວ່າ ລູກສອນໄຟຣັດເຊຍ ໄດ້ຕົກທີ່ໂປແລນ ເຮັດໃຫ້ຄົນເສຍຊີວິດ 2 ຄົນ ທາງຕາເວັນອອກຂອງໂປແລນເຊິ່ງໃກ້ຊາຍແດນກັບຢູເຄຣນ ແລະ ທາງການໂປແລນໄດ້ເອີ້ນທູດຣັດເຊຍປະຈຳໂປແລນເຂົ້າພົບ ເພື່ອຂໍຄຳຊີ້ແຈງ ພາຍຫຼັງລັດຖະບານຣັດເຊຍໄດ້ປະຕິເສດວ່າບໍ່ກ່ຽວກັບເຫດການດັ່ງກ່າວ.
ວັນທີ 16 ພະຈິກ 2022 ກະຊວງການຕ່າງປະເທດໂປແລນລະບຸວ່າ: ລູກສອນໄຟຣັດເຊຍ ໄດ້ຕົກລົງມາທີ່ບ້ານເພັດໂວດາວ ທາງຕາເວັນອອກຂອງປະເທດໂປແລນ ເຊິ່ງຫ່າງຈາກຊາຍແດນຢູເຄຣນປະມານ 6 ກິໂລແມັດ ເວລາປະມານ 15.40 ຂອງວັນອັງຄານ ທີ 15 ພະຈິກທີ່ຜ່ານມາ ເຮັດໃຫ້ມີຜູ້ເສຍຊີວິດ 2 ຄົນ ປັດຈຸບັນ ທາງນາໂຕ NATO ກຳລັງສອບສວນວ່າ ເປັນການໂຈມຕີທີ່ມາຈາກລູກສອນໄຟຣັດເຊຍ ທີ່ລະດົມໂຈມຕີຢູເຄນໃນມື້ດຽວກັນນີ້ ຫຼືບໍ່.
ບັນດາປະເທດສະມາຊິກນາໂຕ ຕ່າງໃຫ້ຄຳໝັ້ນໃນການໃຫ້ຄວາມຊ່ວຍເຫຼືອຕໍ່ໂປແລນ ຖ້າມີການໂຈມຕີຂອງຣັດເຊຍທີ່ອາດສ້າງຄວາມສ່ຽງໃຫ້.
ເຫດການໃນຄັ້ງນີ້ ເກີດຂຶ້ນຫຼັງຈາກຮັດເຊຍລະດົມການໂຈມຕີລູກສອນໄຟໃສ່ຫຼາຍເມືອງທົ່ວຢູເຄຣນ ໃນວັນອັງຄານທີ 15 ພະຈິກ ນັ້ນ ແລະ ມີລາຍງານການໂຈມຕີໃນເຂດເມືອງລວິຟ ທາງຕາເວັນຕົກຂອງຢູເຄຣນ ເຊິ່ງຫ່າງຈາກຊາຍແດນຢູເຄຣນ-ໂປແລນ ບໍ່ຮອດ 80 ກິໂລແມັດ.
ທັ້ງນີ້ ໂປແລນ ທີ່ເປັນສະມາຊິກຂອງນາໂຕ ກ່າວວ່າ ເຫດການໃນຄັ້ງນີ້ອາດເກີດດ້ວຍຄວາມບໍ່ຕັ້ງໃຈ ຫຼື ຕັ້ງໃຈກໍຕາມ ທີ່ເກີດມາຈາກການໂຈມຕີຂອງຣັດເຊຍ.
ແຫຼ່ງຂ່າວຈາກ ABC Aus News