ອະດີດນາຍົກລັດຖະມົນຕີຂອງປະເທດປາກິດສຖານ ຖືກຍິງ ຂະນະທີ່ຈັດການຊຸມນຸມປະທ້ວງ ໃນເມືອງວາຊີລາບັດ.
ວັນທີ 3 ພະຈິກ 2022 ສຳນັກຂ່າວ CNBC ໄດ້ລາຍງານວ່າ: ທ່ານ ອິມຣານ ອະດີດນາຍົກລັດຖະມົນຕີຂອງປາກິດສຖານ ໄດ້ຖືກຍິງ ແລະ ຮັບບາດເຈັບທີ່ຂາຂອງລາວ ໃນລະຫວ່າງການຈັດການປະທ້ວງໃນເມືອງວາຊີລາບັດ ທາງພາກຕາເວັນອອກຂອງປະເທດ ໃນມື້ດຽວກັນນັ້ນ ມີປະຊາຊົນອີກ 4 ຄົນກໍໄດ້ຮັບບາດເຈັບຄືກັນ.
ໂດຍຜູ້ຊ່ວຍຄົນໜຶ່ງໄດ້ກ່າວວ່າ ອິມຣານ ຂ່ານ ໄດ້ຖືກຄົນພະຍາຍາມຈະຂ້າລາວ ແຕ່ຢ່າງໃດກໍຕາມ ຕຳຫຼວດປາກິດສຖານຍັງບໍ່ຢືນຢັນວ່າ ອິມຣານ ຂ່ານ ເປັນເປົ້າໝາຍຂອງການພະຍາຍາມຂ້າໃນເທື່ອນີ້.
ອິມຣານ ຂ່ານ ເປັນອະດີດນາຍົກລັດຖະມົນຕີຂອງປາກິດສຖານ ອາຍຸ 70ປີ ລາວໄດ້ເປັນແກນນຳຂອງຂະບວນການປະທ້ວງເພື່ອຮຽກຮ້ອງໃຫ້ຍຸບສະພາ ເພື່ອຈັດການເລືອກຕັ້ງໃໝ່ ຫຼັງຈາກທີ່ລາວໄດ້ຖືກຖອນອອກຈາກຕຳແໜ່ງນາຍົກໃນວັນທີ 10 ເມສາ ທີ່ຜ່ານມານີ້ ແລ້ວໄດ້ກາຍເປັນນາຍົກຄົນທຳອິດທີ່ຖືກສະພາປາກິດສຖານບໍ່ໄວ້ວາງໃຈ.