ມະຫາວິທະຍາໄລບອສຕັນ ໄດ້ຮຽກສຳນັກຂ່າວ ເດລີ່ເມວ ພາຍຫຼັງທີ່ໄດ້ອອກຂ່າວວ່າ ຫ້ອງທົດລອງໃນອາເມຣິກາໄດ້ທົດລອງໄວຣັສໂຄວິດສາຍພັນໃໝ່ຫຼ້າສຸດ ທີ່ເຮັດໃຫ້ຜູ້ຕິດເຊື້ອມີອັດຕາການເສຍຊີວິດເຖິງ 80%.

ໃນວັນ ທີ 18 ຕຸລາ 2022 ສຳນັກຂ່າວ ເດລີ່ເມວ ລາຍງານວ່າ ອ້າງອີງຈາກຄຳເປີດເຜີຍຂອງສາສະດາຈານ ຊາມູເອວ ຊາປີລາ ນັກວິທະຍາສາດຊັ້ນນຳຂອງ ລັດຖະບານອິສລາເອວ ທີ່ກ່າວປະນາມນັກວິໄຈຂອງຫ້ອງທົດລອງທາງວິທະຍາສາດມະຫາວິທະຍາໄລບອສຕັນ ຂອງປະເທດອາເມຣິກາ ທີ່ໄດ້ທົດລອງເຊື້ອໄວຣັສໂຄວິດ ແລ້ວທົດລອງກັບໜູຈຳນວນ 10 ໂຕ ທີ່ໄດ້ຮັບເຊື້ອໄວຣັສສາຍພັນໃໝ່ທີ່ທົດລອງນີ້ ປາກົດວ່າໜູໄດ້ຕາຍໄປ 8 ໂຕ ອິດເປັນອັດຕາການເສຍຊີວິດ 80%.

ໃນມື້ດຽວກັນ ພາຍຫຼັງທີ່ໄດ້ອອກຂ່າວມາແນວນັ້ນ ມະຫາວິທະຍາໄລບອສຕັນກໍໄດ້ອອກມາຖະແຫຼງວ່າ ຂ່າວນີ້ “ບໍ່ມີມູນຄວາມຈິງ” ແລະ ບັນດາຫົວໜ້າຫ້ອງທົດລອງໃນໂຮງຮຽນກໍໄດ້ກ່າວວ່າ ພວກເຂົາພົບເຊື້ອໂຄວິດຊະນິດໃໝ່ແທ້ ແຕ່ວ່າມັນອັນຕະລາຍໜ້ອຍກວ່າ.

ມະຫາວິທະຍາໄລບອສຕັນ ກ່າວຕື່ມວ່າ ງານວິໄຈໃນເທື່ອນີ້ ບໍ່ໄດ້ມີຜົນປະໂຫຍດຫຍັງຕໍ່ພວກເຂົາ ແລະ ພວກເຂົາບໍ່ໄດ້ຕ້ອງການຂະຫຍາຍສາຍພັນໂຄວິດແຕ່ຢ່າງໃດ ອັນທີ່ຈິງ ການວິໄຈນີ້ເຮັດໃຫ້ໄວຣັສນັ້ນອັນຕະລາຍໜ້ອຍລົງ.