ເກົາຫຼີໃຕ້ໃຊ້ soft power ເພື່ອໃຫ້ BTS ວົງບອຍແບນຊື່ດັງຂອງເກົາຫຼີໃຕ້ທີ່ດັງໄປທົ່ວໂລກມາຂໍສຽງສະໜັບສະໜູນໃຫ້ໄດ້ຮັບຄັດເລືອກເປັນເຈົ້າພາບງານກິລາບານເຕະ AFC Asian Cup.
ສຳນັກຂ່າວ Korea Times ໄດ້ລາຍງານວ່າ: ທາງເກົາຫຼີໃຕ້ໄດ້ເຜີຍແຜ່ວິດີໂອ ວົງ K-pop ລະດັບໂລກຄື BTS ອອກມາສະເໜີເກົາຫຼີໃຕ້ ໃນການແຂ່ງເປັນເຈົ້າພາບຈັດການແຂ່ງຂັນ Asian Football Confederation (AFC) Asian Cup ປີ 2023.
ໃນວັນພຸດທີ່ຜ່ານມາ ຈີມິນ ສະມາຊິກວົງ BTS ໄດ້ກ່າວໃນວິດີໂອທີ່ໂພສເທິງເວັບໄຊ້ຂອງກະຊວງວັດທະນະທຳ ກິລາ ແລະ ການທ່ອງທ່ຽວວ່າ ການທີ່ມີປະຊາຊົນຈຳນວນຫຼາຍລ້ານຄົນອອກມາເຊຍເທິງຫົນທາງ ເຮັດໃຫ້ທົ່ວໂລກຕ່າງປະຫຼາດໃຈມາແລ້ວໃນຊ່ວງກິລາບານເຕະໂລກ ປີ 2002 ທີ່ເກົາຫຼີໃຕ້.
ວິດີໂອດັ່ງກ່າວໄດ້ຖືກໂພສໃນ YouTube ຢ່າງເປັນທາງການ ແລະ Instagram ຂອງສະມາຄົມບານເຕະເກົາຫຼີໃຕ້ (KFA).
ໂດຍທາງສະມາຊິກຂອງ BTS ຕ່າງຄາດຫວັງຢາກເຫັນເກົາຫຼີໃຕ້ໄດ້ຮັບການຄັດເລືອກເປັນເຈົ້າພາບການແຂ່ງຂັນ ໂດຍພວກເຂົາກ່າວວ່າ ສາມາດສ້າງຄວາມສຸກໃໝ່ໆໃຫ້ກັບຊາວອາຊີຈຳນວນຫຼາຍໄດ້.
ຂະນະນີ້ ເກົາຫຼີໃຕ້ ກຳລັງແຂ່ງຂັນກັບ ກາຕາ ແລະ ອິນໂດເນເຊຍ ເພື່ອຂໍເປັນເຈົ້າພາບງານດັ່ງກ່າວ ແລະ ຈະມີການປະກາດຜົນການຂັດເລືອກໃນວັນຈັນທີ່ຈະມາຮອດນີ້.