ເອີ້ນວ່າໄດ້ວ່າເປັນກະແສດຣາມ່າຢ່າງຕໍ່ເນື່ອງ ເມື່ອນັກຮ້ອງ ແລະ ນັກສະແດງໜຸ່ມ ພາຄິນ ຄຳວິໄລສັກ ຫຼື ໂຕໂນ່ປະກາດກິດຈະກຳຊ່ວຍເຫຼືອສັງຄົມ “ONE MAN AND THE RIVER ໜຶ່ງຄົນລອຍ ຫຼາຍຄົນໃຫ້” ພາລະກິດດັ່ງກ່າວເປັນການລອຍຂ້າມແມ່ນ້ຳຂອງຈາກໄທ-ລາວ ເພື່ອລະດົມທຶນການກຸສົນເພື່ອສະຫນັບສະຫນູນໂຮງຫມໍທີ່ທຸກຍາກ ເຊິ່ງປະກອບດ້ວຍ ໂຮງໝໍນະຄອນພະນົມ ແລະ ໂຮງໝໍແຂວງຄຳມ່ວນ ສປປ ລາວ.
ເຊິ່ງກ່ອນໜ້ານີ້ເພິ່ນໄດ້ເດີນທາງມາລາວ ເພື່ອເບິ່ງເສັ້ນທາງການລອຍນ້ຳ ຈຸດຂ້າມລະຫວ່າງ ນະຄອນພະນົມ-ກັບແຂວງຄຳມ່ວນ ພ້ອມແຈ້ງຈຸດປະສົງທີ່ຈະລອຍຂ້າມຂອງມາເປັນທີ່ຮຽບຮ້ອຍແລ້ວ.
ຄວາມມຸ້ງຫວັງຕັ້ງໃຈຂອງໜຸ່ມໂຕໂນ່ຄືເປັນການລອຍນ້ຳ ເພື່ອລະດົມທຶນຊ່ວຍໂຮງໝໍລາວ ແລະໄທ “ຜ່ານໂຄງການ ໜຶ່ງຄົນລອຍຫຼາຍຄົນໃຫ້” ເຊິ່ງຄາດວ່າໄລຍະທາງຂອງການລອຍນ້ຳແມ່ນ 15 ກິໂລແມັດກວ່າ ຕາມແຜນການແມ່ນຈະໄດ້ເລີ່ມລອຍໃນວັນທີ 22 ຕຸລາ 2022 ນີ້.
ໃນນັ້ນນ້ອງຮ້ອງໜຸ່ມຕັ້ງເປົ້າໝາຍວົງເງິນທີ່ຈະລະດົມໄດ້ຈາກການລອຍຂ້າມຂອງຄັ້ງນີ້ທີ່ 10 ລ້ານບາດ ໂດຍຈະມອບໃຫ້ໂຮງໝໍນະຄອນພະນົມ ແລະໂຮງໝໍແຂວງຄຳມ່ວນຂອງ ສປປ ລາວ.
ເຖິງແນວໃດກໍຕາມໜຸ່ມໂຕໂນ່ ໃນວັນທີ 7 ຕຸລາຜ່ານມາໄດ້ໄລສົດຊີ້ແຈງເຖິງເຈດຈຳນົງຂອງຕົນ ແລະຢືນຢັນຈະບໍລົ້ມເລີກຄວາມຕັ້ງໃຈໃນຄັ້ງນີ້ ແມ່ນຢູ່ວ່າການລະດົມທຶນເຮັດໄດ້ໃນຫຼາຍວິທີ ແຕ່ຕົນຖະໜັດດ້ານນີ້ ແລະເຂົ້າໃຈວ່າຕົນກຳລັງເຮັດຫຍັງຢູ່.
ໜຸ່ມໂຕໂນ່ຍັງ ມີຄຳເວົ້າທີ່ໜ້າຊື່ນຊົມອີກວ່າ ຕົນເຊື່ອວ່າໂລກຈະດີຂຶ້ນໄດ້ດ້ວຍການລົງມືເຮັດ ເຊິ່ງຕົນຖະໜັດແບບນີ້ກໍ່ພະຍາຍາມຊ່ວຍໃນສິ່ງທີ່ຕົນພໍຈະເຮັດໄດ້.