ມືປືນບຸກກາດຍິງທີ່ໂຮງຮຽນແຫ່ງໜຶ່ງໃນຣັດເຊຍ ເຮັດໃຫ້ມີຜູ້ເສຍຊີວິດຢ່າງໜ້ອຍ 17 ຄົນ ບາດເຈັບເກືອບ 30 ຄົນ ກ່ອນທີ່ມືປືນຈະລົງມືຍິງຕົວເອງເສຍຊີວິດຕາມ.
ສຳນັກຂ່າວ ABC Australia News ໄດ້ລາຍງານວ່າ: ວັນທີ 26 ກັນຍາ 2022 ເກີດເຫດມືປືນບຸກກາດຍິງທີ່ໂຮງຮຽນ No.88 ໃນເມືອງອີເຈຟ ທາງພາກກາງຂອງຣັດເຊຍ ເຊິ່ງມີນັກຮຽນປະມານ 1.000 ຄົນ ເປັນເຫດໃຫ້ມີຄົນເສຍຊີວິດ 13 ຄົນ ຕໍ່ມາຈຶ່ງມີຄົນເສຍຊີວິດເພີ່ມເປັນ 17 ຄົນ ໃນນີ້ມີເດັກນ້ອຍ 7 ຄົນ ແລະ ມີຜູ້ບາດເຈັບກວ່າ 24 ຄົນ ກ່ອນທີ່ຈະຫັນຫົວປືນມາທີ່ຕົນເອງແລະ ຍິງໂຕເອງເສຍຊີວິດໃນບ່ອນເກີດເຫດ.
ສື່ທ້ອງຖິ່ນໃນຣັດເຊຍ ເຜີຍແຜ່ພາບວິດີໂອ ສະແດງໃຫ້ເຫັນເຫດການທີ່ສະເທືອນໃຈ ຫຼັງຈາກເກີດເຫດມືປືນບຸກກາດຍິງໃນໂຮງຮຽນ ຈົນເຮັດໃຫ້ພື້ນຫ້ອງຮຽນເຕັມໄປດ້ວຍເລືອດ ແລະ ມີລູກປືນຈຳນວນຫຼາຍຖືກຍິງໃສ່ປ້ອງຢ້ຽມຈົນເປັນຮູ ໃນຂະນະທີ່ບັນດາເດັກນັກຮຽນໄດ້ລີ້ຢູ່ກ້ອງໂຕະຮຽນ.
ເຫດການໃນຄັ້ງນີ້ ເຮັດໃຫ້ມີຜູ້ເສຍຊີວິດຢ່າງໜ້ອຍ 13 ຄົນ ແລະ ໃນນັ້ນເປັນນັກຮຽນ 7 ຄົນ ຜູ້ໃຫຍ່ 6 ຄົນ.
ຈາກການກວດສອບຂອງເຈົ້າໜ້າທີ່ຣັດເຊຍລາຍງານວ່າ ມືປືນທີ່ບຸກຍິງນັ້ນເຄີີຍເປັນນັກຮຽນຢູ່ໂຮງຮຽນນີ້ ຊື່ວ່າ ອາເທັມ ຄາຊານເຊຟ ເຊິ່ງໃຊ້ອາວຸດປືນ 2 ກະບອກໃນການກໍ່ເຫດ.