ເຮືອບິນເຮລິຄັອບເຕີຂອງກອງທັບທະຫານມຽນມາ ຍິງໃສ່ໂຮງຮຽນ ເຮັດໃຫ້ມີຄົນເສຍຊີວິດແລ້ວ 13 ຄົນ.
ວັນທີ 20 ກັນຍາ 2022 ສຳນັກຂ່າວ ຣອຍເຕີ ລາຍງານວ່າ: ເຮືອບິນເຮລິຄັອບເຕີ ກອງທັບມຽນມາ ຍິງໃສ່ໂຮງຮຽນໃນບ້ານເລເຍະໂກນ (Let Yet Kone) ຂອງປະເທດມຽນມາ ໃນວັນສຸກ ທີ 16 ກັນຍາ ເຮັດໃຫ້ມີຄົນເສຍຊີວິດດຢ່າງໜ້ອຍ 13 ຄົນ ໃນນັ້ນເດັກນ້ອຍເສຍຊີວິດແລ້ວ 7 ຄົນ ແລະ ບາດເຈັບອີກ 17 ຄົນ ຕາມການລາຍງານຂອງສື່ທ້ອງຖິ່ນ ແລະ ການເປີດເຜີຍຂໍ້ມູນຂອງຜູ້ຢູ່ອາໄສ ຂະນະທີ່ກອງທັບມຽນມາໄດ້ຍິງຢ່າງຕໍ່ເນື່ອງຈາກກຸ່ມຕໍ່ຕ້ານລັດຖະບານໃຊ້ໂຮງຮຽນເປັນສະຖານທີ່ໂຈມຕີກອງກຳລັງມຽນມາ.
ເວັບໄຊຂ່າວທ້ອງຖິ່ນ Mizzima ແລະ Irrawaddy ລາຍງານວ່າ ເຮືອບິນເຮລິຄັອບເຕີກອງທັບ ໄດ້ຍິງໃສ່ໂຮງຮຽນຢູ່ບ້ານດັ່ງກ່າວ ເດັກນ້ອຍບາງຄົນຖືກຍິງ ແລະ ເສຍຊີວິດຄາທີ່ ຂະນະທີ່ເດັກນ້ອຍບາງສ່ວນກໍ່ເສຍຊີວິດຫຼັງຈາກທະຫານເຂົ້າໄປໃນບ້ານ.
ກອງທັບມຽນມາລະບຸໃນຖະແຫຼງການວ່າ ກອງທັບເອກະລາດກະຊີນ (Kachin Independence Army) ເຊິ່ງເປັນກຸ່ມຕໍ່ຕ້ານລັດຖະບານ ແລະ ກອງກຳລັງປ້ອງກັນປະຊາຊົນ (People’s Defence Force) ເຊິ່ງເປັນອົງກອນຂອງກອງໂຈນຕິດອາວຸດທີ່ລັດຖະບານ ກ່າວຫາວ່າເປັນ ຜູ້ກໍ່ການຮ້າຍ ທີ່ລີ້ຢູ່ໃນບ້ານດັ່ງກ່າວ ເພື່ອລຳລຽງອາວຸດ.
ກອງທັບທະຫານມຽນມາລະບຸວ່າ ກອງກຳລັງຄວາມໝັ້ນຄົງຂອງມຽນມາທີ່ມາກັບເຮືອບິນເຮລິຄັອບເຕີ ໄດ້ດຳເນີນການກວດສອບ ແຕ່ວ່າຖືກ ກອງທັບເອກະລາດກະຊີນ ແລະ ກອງກຳລັງປ້ອງກັນປະຊາຊົນ ທີ່ຢູ່ໃນບ້ານໂຈມຕີ ຈຶ່ງເຮັດໃຫ້ກອງກຳລັງຄວາມໝັ້ນຄົງໂຕ້ຕອບ ແລະ ວ່າປະຊາຊົນພາຍໃນບ້ານບາງຄົນຖືກສັງຫານໃນລະຫວ່າງການໂຈມຕີ ສ່ວນຜູ້ໄດ້ຮັບບາດເຈັບໄດ້ສົ່ງໂຮງໝໍແລ້ວ.