ລາຍງນຈາກເມືອງຊາມາກັນ ປະເທດອຸດເບກິສຖານ ໃນວັນທີ 17 ກັນຍາ 2022 ວ່າ ທ່ານ ວະລາດິເມຍ ປູຕິນ ປະທານາທິບໍດີຣັດເຊຍ ແລະ ທ່ານ ນະເຣນທຣາ ໂມດີ ນາຍົກລັດຖະມົນຕີອິນເດຍ ພົບປະຫາລືນອກຮອບການປະຊຸມສະມາຊິກອົງການຄວາມຮ່ວມມືຊຽງໄຮ້ (ເອສຊີໂອ) ທີ່ເມືອງຊາມາກັນ ໃນປະເທດອຸດເບກິສຖານ ໃນວັນສຸກທີ່ຜ່ານມານີ້.
ທັ້ງນີ້ ໃນຊ່ວງໜຶ່ງຂອງການສົນທະນາ ໂມດີ ໄດ້ກ່າວຢ່າງກົງໄປກົງມາກັບ ປູຕິນ ວ່າ “ຕອນນີ້ບໍ່ແມ່ນຊ່ວງເວລາຂອງການເຮັດສົງຄາມ ແຕ່ເປັນຊ່ວງເວລາສຳຄັນສຳລັບ ການເຄື່ອນໄຫວຂອງປະຊາທິປະໄຕ ການທູດ ແລະ ການເຈລະຈາ ເພື່ອສົ່ງເສີມສັນຕິພາບ”.
ຂະນະທີ່ປູຕິນ ໄດ້ຕອບວ່າ ລັດຖະບານມອສໂກ ຮັບຮູ້ ແລະ ເຂົ້າໃຈເປັນຢ່າງດີ ຕໍ່ທ່າທີຂອງອິນເດຍກ່ຽວກັບສະຖານະການໃນຢູເຄຣນ ແລະ ຣັດເຊຍພ້ອມດຳເນີນການຢ່າງສຸດຄວາມສາມາດ ເພື່ອຢຸດສົງຄາມໃນຄັ້ງນີ້ ໃຫ້ໄວທີ່ສຸດເທົ່າທີ່ຈະເປັນໄປໄດ້.
ຢ່າງໃດກໍຕາມ ຜູ້ນຳຣັດເຊຍກ່າວເຖິງລັດຖະບານຢູເຄຣນວ່າ “ຍັງຄົງປະຕິເສດການເຈລະຈາຕາມແນວທາງສັນຕິ” ແລະ “ຕ້ອງບັນລຸເປົ້າໝາຍຂອງຕົນເອງໃນສະໜາມຮົບ”.
ປັດຈຸບັນ ອິນເດຍເປັນປະເທດນຳເຂົ້າອາວຸດລາຍໃຫຍ່ ອັນດັບ 2 ຂອງໂລກ ຮອງຈາກຊາອຸດິອາລະເບຍ ແລະ ສະຖິຕິລະຫວ່າງປີ 2016-2020 ລະບຸວ່າ 49,4% ຂອງອາວຸດທີ່ນຳເຂົ້າ ແມ່ນມາຈາກຣັດເຊຍ.
ແຫຼ່ງຂ່າວຈາກ CNN