ໃນລະຫວ່າງວັນທີ 28-29 ສິງຫາ 2022 ຜ່ານມານີ້, ຄະນະຜູ້ແທນຂັ້ນສູງຂອງແຂວງໄຊສົມບູນ ສປປ ລາວ; ເຊິ່ງນໍາພາໂດຍທ່ານ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງເຊີນລາ ສສ ຫວຽດນາມ ໂດຍການຕ້ອນຮັບ ຂອງທ່ານ ຫງວຽນຫຶວດົງ, ກໍາມະການຄະນະບໍລິຫານງານສູນກາງພັກ, ເລຂາພັກແຂວງ, ປະທານສະມາ ຊິກສະພາແຫ່ງຊາດແຂວງ ພ້ອມດ້ວຍປະຊາຊົນຊາວແຂວງເຊີນລາ ຢ່າງອົບອຸ່ນ.
ໂອກາດນີ້, ຄະນະຜູ້ແທນຂັ້ນສູງຂອງແຂວງໄຊສົມບູນ ສປປ ລາວ ໄດ້ເຂົ້າຢ້ຽມຂໍ່ານັບ ທ່ານ ຫງວຽນຫຶວດົງ ປະທານສະມາຊິກສະພາແຫ່ງຊາດແຂວງ ພ້ອມດ້ວຍຄະນະນໍາຂັ້ນສູງ ຂອງແຂວງເຊີນລາ ສສ ຫວຽດນາມ, ພ້ອມທັງວາງພວງມາລາ ຢູ່ອະນຸສາວະລີ ປະທານໂຮ່ຈີມິນ ແລະ ໄດ້ເຂົ້າ ຮ່ວມພິທີສະເຫຼີມສະຫຼອງສອງວັນປະຫວັດສາດລາວ-ຫວຽດນາມ, ຫວຽດນາມ-ລາວ ຄື ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ( 5 ກັນຍາ 1962 – 5 ກັນຍາ 2022 ) ແລະ ວັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ( 18 ກໍລະກົດ 1977 – 18 ກໍລະກົດ 2022 ) ແລະ ພິທີຮັບຮອງເຂດອະນຸສອນສະຖານປະຫວັດສາດການປະຕິວັດ ລາວ-ຫວຽດນາມ ເປັນອະນຸສອນສະຖານແຫ່ງ ຊາດພິເສດ, ເຊິ່ງໄດ້ຈັດຂຶ້ນ ທີ່ ແຂວງເຊີນລາ ສສ ຫວຽດນາມ ໂດຍມີຄະນະຜູ້ແທນຂັ້ນສູງ ຂອງສອງປະເທດ ພ້ອມດ້ວຍພໍ່ແມ່ປະຊາຊົນຊາວຫວຽດນາມເຂົ້າຮ່ວມຢ່າງເປັນຂະບວນການຝົດຟື້ນ.
ພິທີສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ, ຫວຽດນາມ-ລາວ ແລະ ພິທີຮັບຮອງເຂດອະນຸສອນສະຖານປະຫວັດສາດການປະຕິວັດ ລາວ-ຫວຽດນາມ ເປັນອະນຸສອນສະຖານແຫ່ງຊາດພິເສດ ກໍເພື່ອເປັນການຫວນຄືນປະຫວັດສາດແຫ່ງການສ້າງສາຍພົວພັນ ພັກ-ລັດ ແລະ ປະຊາ ຊົນສອງຊາດ ລາວ-ຫວຽດນາມ ຍາມໃດກໍຮູ້ສຶກຮູ້ບຸນຄຸນ ປະທານໂຮ່ຈີມິນ, ປະທານໄກສອນ ພົມວິຫານ ແລະ ປະທານສຸພານຸວົງ ທີ່ແສນເຄົາລົບຮັກຂອງພວກເຮົາ ຊຶ່ງພວກເພິ່ນເປັນຜູ້ໃຫ້ກໍາເນີດ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ຂອງສອງຊາດ ລາວ-ຫວຽດນາມ ຢ່າງສະເໝີຕົ້ນສະເໝີປາຍ ເປັນບ່ອນຈາລຶກຈົດຈໍາຂະບວນວິວັດການເຄື່ອນ ໄຫວສ້າງຕັ້ງທີ່ໝັ້ນການປະຕິວັດຂອງຄະນະຕະລຸມບອນພາກເໜືອລາວ ໂດຍມີ ທ່ານ ໄກສອນ ພົມວິ ຫານ ເປັນຜູ້ນໍາພາ ໂດຍໄດ້ຮັບການຊ່ວຍເຫຼືອຈາກປະຊາຊົນບ້ານພຽງສາ,ເຊິ່ງແມ່ນບ້ານລາວໂຄ່ໃນປັດຈຸບັນ ໄດ້ໃຫ້ການອຸ້ມຊູຊ່ວຍເຫຼືອດ້ວຍນໍ້າໃຈອັນສູງສົ່ງ ເຂົ້າອົກເຂົ້າໃຈ ຕໍ່ຄະນະຕະລຸມບອນລາວເໜືອ ກໍຄືການເຄື່ອນໄຫວການປະຕິວັດ ແລະ ການສ້າງຮາກຖານການປະຕິວັດລາວໃນເມື່ອກ່ອນ ນອກນີ້ຍັງເປັນການຢັ້ງຢືນ ແລະ ຂະຫຍາຍສາຍພັນມິດຕະພາບທີ່ຫຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດ ນາມ, ຫວຽດນາມ-ລາວ ໃຫ້ຂະຫຍາຍເຂົ້າສູ່ລວງກວ້າງ ແລະ ລວງເລິກ ມີປະສິດທິຜົນ ໃນທຸກຂົງເຂດວຽກງານ ແລະ ແທດເໝາະກັບສະພາບຕົວຈິງໃນແຕ່ລະໄລຍະ ບົນພື້ນຖານເສີມຂະຫຍາຍຈິດໃຈຄວາມເປັນເອກະລາດ, ເປັນເຈົ້າຕົນເອງ, ຮ່ວມມືຢ່າງສະເໝີພາບ ແລະ ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ, ໃຫ້ບູລິມະສິດພິເສດ, ສ້າງເງື່ອນໄຂສະດວກໃຫ້ແກ່ກັນ ເພື່ອຄວາມສົມບູນພູນສຸກຂອງສອງປະເທດ ລາວ-ຫວຽດນາມ, ຫວຽດນາມ-ລາວ ອ້າຍນ້ອງ.
ແຫຼ່ງຂ່າວຈາກ ຄວາມສະຫງົບ Lao Security News
