ເຈົ້າຫນ້າທີ່ ປກສ ນະຄອນໄກສອນພົມວິຫານ ແຂວງສະຫວັນນະເຂດ ກັກຕົວເປົ້າຫມາຍຄ້າຂາຍຢາ ເສບຕິດໄດ້ 3 ຄົນ ພ້ອມຢາບ້າ 9.000 ກວ່າເມັດ; ໃນນີ້, ລົດຈັກ 3 ຄັນ, ໂທລະສັບ 5 ຫນ່ວຍ ແລະ ເງິນ ຈໍານວນຫນຶ່ງ.

ຄວາມສະຫງົບ ໄດ້ລາຍງານວ່າ: ໃນວັນທີ 11 ສິງຫາ 2022 ເຈົ້າຫນ້າທີ່ວິຊາສະເພາະ ໄດ້ນໍາກໍາລັງເຂົ້າຈັບຕົວເປົ້າຫມາຍຢາເສບຕິດ ຊື່ ທ້າວ ວິໄລສິນ ຫຼື ຈ່ອຍ ອາຍຸ 21 ປີ, ທ້າວ ສຸກສັນ ຫຼື ສຸກ ອາຍຸ 26 ປີ ບ້ານໂພນຊາຍ ແລະ ທ້າວ ສັນຕິ ຫຼື ຕິ ອາຍຸ 40 ປີ ບ້ານ ອຸດົມວິໄລ ນະຄອນໄກສອນ ແຂວງສະຫວັນນະເຂດ ພ້ອມຢາບ້າ 3 ເມັດ. ໃນເບື້ອງຕົ້ນ, ທ້າວ ວິໄລສິນ ໄດ້ຊື້ມາຈາກ ທ້າວ ສຸກສັນ ຫຼື ສຸກ. ຈາກນັ້ນ, ເຈົ້າຫນ້າທີ່ຈຶ່ງໄດ້ນໍາກໍາລັງໄປກັກຕົວ ທ້າວ ສຸກສັນ ຢູ່ຂອບເຂດ ເສັ້ນທາງເຂົ້າວັດປ່າ ຫຼັກ 6 ບ້ານໂພນສະຫວ່າງເຫນືອ ແລະ ເຂົ້າກວດຄົ້ນເຮືອນພົບເຫັນຢາບ້າ 2 ມັດ ກັບ 47 ເມັດ ຊຸກເຊື່ອງຢູ່ກ້ອງຕຽງ.

ຕໍ່ມາ, ເຈົ້າຫນ້າທີ່ໄດ້ຂະຫຍາຍຜົນ ມາຮອດວັນທີ 18 ສິງຫາ 2022, ຈຶ່ງໄດ້ເຂົ້າກັກຕົວ ທ້າວ ສັນຕິ ຫຼື ຕິ ຢູ່ບ້ານອຸດົມວິໄລ ພ້ອມຢາບ້າຈໍານວນ 32 ຖົງ, ເທົ່າກັບ 5.673 ເມັດ ແລະ ຄະດີດັ່ງກ່າວ ເຈົ້າຫນ້າທີ່ ວິຊາສະເພາະ ໄດ້ດໍາເນີນຄະດີຕາມຂັ້ນຕອນຂອງກົດຫມາຍຕໍ່ໄປ.