ສຳນັກຂ່າວຫວຽດນາມລາຍງານວ່າ: ວັນທີ 22 ສິງຫາ 2022 ຄະນະຜູ້ແທນຂັ້ນສູງ ຫວຽດນາມ ນຳໂດຍທ່ານພົນເອກ ໂຕເລິມ ລັດຖະມົນຕີກະຊວງຕຳຫຼວດ ຫວຽດນາມ ເປັນຫົວໜ້າຄະນະເຂົ້າຮ່ວມກອງປະຊຸມປຶກສາຫາລືຂັ້ນສງຄວາມໝັ້ນຄົງ ອາຊຽນ – ຣັດເຊຍ ຄັ້ງທີ 2.
ໄດ້ຕີລາຄາສູງຕໍ່ການຈັດກອງປະຊຸມໃນສະພາບການເມືອງ – ຄວາມໝັ້ນຄົງໂລກ ພວມມີການປ່ຽນແປງ ຈື່ງເພີ່ມທະວີການຮ່ວມມືລະຫວ່າງ ຣັດເຊຍ ແລະ ອາຊຽນ, ທ່ານສະເໜີໃຫ້ ຣັດເຊຍ ຈົ່ງຕັ້ງໜ້າເຂົ້າຮ່ວມບັນດາເວທີປາໄສໂດຍ ອາຊຽນເປັນເຈົ້າພາບຈັດຂຶ້ນ, ສະໜັບສະໜູນບົດບາດເປັນໃຈກາງ ແລະ ຄວາມພະຍາຍາມຂອງອາຊຽນ ໃນການຊຸກຍູ້ການເຈລະຈາ, ຮ່ວມມື ແລະ ຮັບມືກັບບັນດາສິ່ງທ້າທາຍທີ່ເກີດຂຶ້ນ.
ທ່ານ ໂຕເລິມ ເນັ້ນໜັກວ່າ ສອງຝ່າຍຄວນເພີ່ມທະວີການຮ່ວມມື ໃນບັນດາບັນຫາຄວາມໝັ້ນຄົງ ແລະ ສິ່ງທ້າທາຍໃໝ່ຄືການກໍ່ການຮ້າຍ, ອາຊະຍາກຳຂ້າມຊາດ ແລະ ເຕັກໂນໂລີຂັ້ນສູງ.
ອາຊຽນ ແລະ ຣັດເຊຍ ຄວນສຶກສາຂະຫຍາຍການແລກປ່ຽນຂໍ້ມູນວິຊາສະເພາະ ລະຫວ່າງອົງການປະຕິບັດກົດໝາຍຂອງຕົນ ແລະ ສ້າງກົນໄກປະສານງານການພົວພັນລະຫວ່າງ ອາຊຽນ-ຣັດເຊຍ.
ທ່ານຢືນຢັນວ່າ ຫວຽດນາມ ມີຄວາມສະເໝີຕົ້ນສະເໝີປາຍໃນການເພີ່ມທະວີການພົວພັນຄູ່ຮ່ວມມືຍຸດທະສາດ ອາຊຽນ – ຣັດເຊຍ, ປາດຖະໜາຢາກໃຫ້ ຣັດເຊຍ ປະກອບສ່ວນນັບມື້ນັບເພີ່ມຂຶ້ນ, ມີຄວາມຮັບຜິດຊອບ ແລະ ບັນລຸປະສິດທິຜົນໃນບັນດາຄວາມພະຍາມເຈລະຈາ, ຮ່ວມມື ແລະ ສ້າງຄວາມໄວ້ເນື້ອເຊື່ອໃຈຢູ່ບັນດາກົນໄກໂດຍ ອາຊຽນ ເປັນເຈົ້າ.