ຫຼາຍຄົນໃນນະຄອນຫຼວງວຽງຈັນໜ້າຈະຮູ້ກັບຮ້ານ MINISO ທີ່ມີຫຼາຍສາຂາໃນນະຄອນຫຼວງວຽງຈັນ ເຊິ່ງລ່າສຸດທາງຮ້ານ MINISO ໄດ້ອອກມາຂໍໂທດຕໍ່ຍຸດທະສາດການຕະຫຼາດທີ່ເຄີຍໄດ້ໃຊ້ໃນຜ່ານມານີ້.
ຮ້ານ MINISO ມີຮ້ານຄ້າຫຼາຍກວ່າ 5.000 ແຫ່ງທັງໃນຈີນ ແລະ ຕ່າງປະເທດ ທາງຮ້ານໄດ້ອະທິບາຍຕົນເອງວ່າ “ເປັນຮ້ານຄ້າຜະລິດຕະພັນໃນສະໄຕລທີ່ໄດ້ຮັບແຮງບັນດານໃຈຈາກຍີ່ປຸ່ນ” ແລະ ໄດ້ຈົດທະບຽນໃນກຸງໂຕກຽວ ປະເທດຍີ່ປຸ່ນ.
ເລື່ອງທີ່ເກີດລ່າສຸດແມ່ນມີ ຜູ້ໃຊ້ສື່ອອນລາຍໃນປະເທດແອັດສະປາຍ (Spain) ໄດ້ໂພສກ່ຽວກັບຕຸກກະຕາວ່າ “ຕຸກກະຕາເກອິຊາຍີ່ປຸ່ນ” ແຕ່ມີຜູ້ໃຊ້ສື່ອອນລາຍຈີນ ໄດ້ໄປໃຫ້ຄຳເຫັນວ່າ ແທ້ໆແລ້ວ ມັນບໍ່ແມ່ນຕຸກກະຕາຍີ່ປຸ່ນ ແຕ່ເປັນຕຸກກະຕາທີ່ໃສ່ຊຸດກີ່ເພົ້າ ຂອງຈີນ.
ຈາກປະເດັນດັ່ງກ່າວ ນຳໄປສູ່ສຽງວິພາກວິຈານໃນໂຊຊຽວມິເດຍຈີນ ສົ່ງຜົນໃຫ້ MINISO ຕ້ອງອອກມາຖະແຫຼງການ ຂໍໂທດທີ່ເຄີຍມີຍຸດທະສາດການຕະຫຼາດທີ່ສົ່ງຜົນກະທົບຈິດໃຈຕໍ່ປະຊາຊົນຈີນ ຈາກການນຳເໜີວ່າເປັນຮ້ານຄ້າຜະລິດຕະພັນໃນສະໄຕລທີ່ໄດ້ຮັບແຮງບັນດານໃຈຈາກຍີ່ປຸ່ນ.
ແຫຼ່ງຂ່າວຈາກ ຣອຍເຕີ