ສານມຽນມາຕັດສິນຈຳຄຸກ ນາງ ອອງຊານ ຊູຈີ ເພີ່ມອີກ 6 ປີ

0
796

ສານມຽນມາ ຕັດສິນຈຳຄຸກ ນາງ ອອງຊານ ຊູຈີ ເພີ່ມອີກ 6 ປີ ໃນຖານສໍ້ລາດບັງຫຼວງ.

ສຳນັກຂ່າວ CNN ລາຍງານວ່າ: ນາງ ອອງຊານ ຊູຈີ ອະດີດຜູ້ນຳລັດຖະບານໃນມຽນມາ ອາຍຸ  77 ປີ ຖືກສານຕັດສິນວ່າມີຄວາມຜິດ ຖານໃຊ້ເງິນຈາກນິທິ ດໍ ຊິ່ນ ຈີ  (Daw Khin Kyi Foundation) ເຊິ່ງເປັນອົງກອນການກຸສົນ ສົ່ງເສີມສຸຂະພາບ ແລະ ການສຶກສາທີ່ ນາງ ອອງຊານ ຊູຈີ ໄດ້ກໍ່ຕັ້ງເອງ ແບບຜິດວັດຖຸປະສົງ ໂດຍນຳໄປໃຊ້ສ້າງບ້ານ ແລະ ເຊົ່າດິນຂອງລັດຖະບານໃນລາຄາຖືກ.

ທັ້ງນີ້ ນັບຕັ້ງແຕ່ຖືກຍຶດອຳນາດຈາກຜູ້ນຳທະຫານ ນາງ ອອງຊານ ຊູຈີ ກໍຖືກຈັບໃນຂໍ້ຫາຢ່າງໜ້ອຍ 18 ຂໍ້ຫາ ຕັ້ງແຕ່ຂໍ້ຫາຮັບສິນບົນ ເປັນຈົນຮອດການການ​ສໍ້​ໂກງ​ການ​ເລືອກ​ຕັ້ງ, ນາງ ຊູຈີ ໄດ້ຖືກກັກຂັງໃນຄຸກທີ່ນະຄອນຫຼວງເນປີດໍ ຂອງມຽນມາ ແລະ ໄດ້ປະຕິເສດທຸກຂໍ້ກ່າວຫາຕໍ່ສານ.

ບັນດາກຸ່ມປົກປ້ອງສິດທິມະນຸດ ແລະ ບັນດາຜູ້ນຳຂອງໂລກ ໄດ້ສະແດງຄວາມເປັນຫ່ວງ ກ່ຽວກັບສະພາບທີ່ຊຸດໂຊມລົງຂອງສິດທິມະນຸດຢູ່ໃນມຽນມາ ແລະ ການທີ່ບໍ່ສົນໃຈຕໍ່ການພິຈາລະນາຄະດີຂອງ ທ່ານນາງ ຊູຈີ ທ່ີ່ກຳລັງດຳເນີນຢູ່ ໂດຍເວົ້າວ່າ ການຕັດສິນຂອງມຽນມາບໍ່ມີຄວາມຍຸດຕິທຳເລີຍ.