ໄລຍະນີ້ອາກາດເລີ່ມເຢັນລົງ ສາວໆກໍ່ຈະກຳລັງຮູ້ສຶກເຖິງການປ່ຽນແປງໃນຮ່າງກາຍຢູ່ແມ່ນບໍ່ ເພາະຫລາຍໆ ຄົນຜິວເລີ່ມແຫ້ງ ດັງເລີ່ມລອກ ເຊິ່ງເປັນສັນຍານບອກວ່າ ກຳລັງເຂົ້າສູ່ລະດູໜາວຢ່າງເຕັມໂຕແລ້ວນັ້ນເອງ ແລະ ໃນໄລຍະນີ້ບັນຫາສ່ວນໃຫຍ່ທີ່ຜິວມັກຈະຕ້ອງພົບເຫັນ ກໍຄົງໜີບໍ່ພົ້ນເລື່ອງບັນຫາຜິວແຫ້ງແຕກລາຍເພາະພົບກັບອາກາດເຢັນ ແລະ ແຫ້ງ ເຮັດໃຫ້ຜິວຂາດຄວາມຊຸ່ມຊື່ນ ເຊິ່ງເປັນສາເຫດຫລັກໆ ທີ່ເຮັດໃຫ້ຜິວລອກໄດ້ງ່າຍຫລາຍໆ ໂດຍສະເພາະບໍລິເວນດັງ ເຊິ່ງໃຜທີ່ມີບັນຫານີ້ຢູ່ຄົງຈະຮູ້ສຶກລຳຄານ ຫລື ໝົດຄວາມຫມັ້ນໃຈກັນ ເພາະເວລາທາແປ້ງນີ້ຈະເຫັນເປັນຄາບຂາວ ແຖມຍັງຄັນໜ້ານໍາອີກ ແຕ່ດ້ວຍຄວາມທີ່ເຮົາເປັນຜູ້ຍິງ ຢ່າປ່ອຍໃຫ້ບັນຫາດັງລອກມາທໍາຮ້າຍເຮົາໄດ້ງ່າຍໆ ສາວໆ ເພາະມັນຈະເຮັດໃຫ້ໝົດງາມໄດ້ເລີຍ ດັ່ງນັ້ນເຮົາມາກຽມໂຕຮັບມືກັບບັນຫານີ້ກັນດີກວ່າ ດ້ວຍວິທີງ່າຍໆ ທີ່ເອົາມາຝາກໃຫ້ສາວໆໄດ້ລອງເຮັດກັນ ຮັບຮອງວ່າຈະສາມາດຊ່ວຍກຳຈັດບັນຫາດັງລອກວົນໃຫ້ເຊົາໄປຈາກໜ້າງາມໆ ໄດ້ຢ່າງແນ່ນອນ
ວິທີຮັບມືກັບບັນຫາດັງລອກໃນໜ້າໜາວ ສາວໆ ສາມາດເຮັດໄດ້ງ່າຍຫລາຍໆ ພຽງແຕ່ໃຊ້ໂຕຊ່ວຍສຳຄັນກໍ່ຄື ຄີມທາໜ້າ ເບບີອອຍ ວາສະລີນ ຫລື ນ້ຳມັນໝາກພ້າວ ເລືອກໃຊ້ຢ່າງໃດຢ່າງໜຶ່ງກໍໄດ້ ແຕ່ຖ້າເປັນຄີມ ຄວນຈະເລືອກທີ່ມີສ່ວນປະສົມຂອງມອຍເຈີໄລເຊີໃຫ້ຫລາຍໆ ເພາະໂຕມອຍເຈີໄລເຊີເອງຈະຊ່ວຍເກັບຄວາມຊຸ່ມຊື່ນໃຫ້ຜິວໄດ້ດົນຕະຫລອດມື້ ເຊິ່ງຈະຊ່ວຍບໍ່ໃຫ້ດັງລອກນັ້ນເອງ
ກ່ອນນອນ ໃຫ້ທາຄີມບຳລຸງຜິວ ເບບີອອຍ ວາສະລີນ ຫລື ນ້ຳມັນໝາກພ້າວ (ຢ່າງໃດຢ່າງໜຶ່ງ) ທາບໍລິເວນດັງ ໂດຍໃຫ້ເນັ້ນທາຈຸດທີ່ຜິວລອກດົນເປັນພິເສດ ແລະ ນວດເບົາໆ ເພື່ອໃຫ້ຄີມ ຫລື ນ້ຳມັນໄດ້ຊຶມເຂົ້າສູ່ຜິວ ແຕ່ຈະນວດດົນສໍ່າໃດໃຫ້ສາວໆ ຄອຍຖ້າສັງເກດວ່າ ຮອຍລອກ ຢູ່ດັງຈະເຊົາໄປເອງ ກໍຖືວ່າ ໃຊ້ໄດ້ແລ້ວ ຮັບຮອງວ່າ ຕື່ນເຊົ້າມາດັງທີ່ລອກຈະເບິ່ງດີຂຶ້ນໄດ້ ໂດຍໃຫ້ເຮັດຕໍ່ເນື່ອງທຸກມື້ຈົນກວ່າອາການດັງລອກຈະເຊົາເປັນປົກກະຕິ
ໃນຕອນເຊົ້າກ່ອນຈະແຕ່ງໜ້າ ໃຫ້ສາວໆ ທາຄີມທາຜິວໃສ່ໜ້າ ແລະ ດັງຖິ້ມໄວ້ກ່ອນປະມານ 5 ນາທີ ໂດຍໃຫ້ເຮັດຄືເກົ່າ ທາຄີມໃຫ້ທົ່ວທັງໜ້າ ແລະ ເນັ້ນຈຸດລອກບໍລິເວນດັງ ນວດຄ່ອຍໆ ຈົນຮອຍລອກຈາງຫາຍໄປ ປ່ອຍໃຫ້ຄີມແຫ້ງກ່ອນແລ້ວຄ່ອຍລົງມືແຕ່ງໜ້າ ວິທີນີ້ຈະບໍ່ເຮັດໃຫ້ຮອຍດັງລອກປາກົດອອກມາໃຫ້ເຫັນແນ່ນອນ