ໂກບາຍາ ຣາສປັກຊາ ອະດີດຜູ້ນຳສີລັງກາ ຖືກປະຊາຊົນຂັບໄລ່ຈົນຕ້ອງໜີອອກຈາກປະເທດ ເພື່ອໄປພັກຊົ່ວຄາວຢູ່ສິງກະໂປ ແຕ່ເນື່ອງຈາກວີຊ່າສິງກະໂປຈະສິ້ນສຸດແລ້ວ ປະເທດຕໍ່ໄປແມ່ນປະເທດໄທ.
ສຳນັກຂ່າວ ໄທໂພສ ລາຍງານວ່າ: ວັນພຸດທີ 10 ສິງຫາ 2022 ອະດີດປະທານາທິບໍດີສີງລັງກາ ໂກບາຍາ ຣາສປັກຊາ ທີ່ຖືກປະຊາຊົນຂັບໄລ່ຈົນຕ້ອງໜີອອກນອກປະເທດກ່ອນທີ່ລາວລາອອກຈາກຕຳແໜ່ງໃນເວລາຕໍ່ມາ ຂະນະນີ້ລາວກຳລັງຢູ່ສິງກະໂປ ແລະ ມີກຳນົດຍົກຍ້າຍຖິ່ນຖານໄປປະເທດອື່ນ ເພາະວີຊ່າສິງກະໂປຈະໝົດກຳນົດໃນວັນພະຫັດນີ້.
ຕາມປົກກະຕິ ຄົນສີລັງກາທີ່ເດີນທາງໄປສິງກະໂປ ຈະໄດ້ຮັບວີຊ່າເປັນເວລາ 30 ມື້ ແຕ່ທາງສິງກະໂປກ່າວວ່າ ໃນຕອນທຳອິດພວກເຂົາໃຫ້ເວລາກັບ ຣາສປັກຊາ ສາມາດຢູ່ໃນປະເທດໄດ້ແຕ່ 2 ອາທິດ ກ່ອນທີ່ຈະຂະຫຍາຍເວລາວີຊ່າໄປອີກ 2 ອາທິດໃນເວລາຕໍ່ມາ.
ມີລາຍງານວ່າ ຣາສປັກຊາ ແລະ ຄອບຄົວຈະເດີນທາງໄປປະເທດໄທ ຫຼັງຈາກທີ່ພະຍາຍາມຂະຫຍາຍອາຍຸວີຊ່າ ແຕ່ບໍ່ໄດ້ຮັບການອະນຸມັດຈາກສິງກະໂປ.
ກ່ອນໜ້ານີ້ ຣາສປັກຊາຈະເດີນທາງກັບສີລັງກາ ແຕ່ນາຍົກຄົນປັດຈຸບັນສີງລັງກາ ໄດ້ແນະນຳໃຫ້ໄປຢູ່ປະເທດໄທກ່ອນ.
ກະຊວງການຕ່າງປະເທດຂອງໄທ ອອກມາຖະແຫຼງຢືນຢັນວ່າ ໄດ້ຮັບຄຳຂໍຈາກສີລັງກາໃຫ້ອະນຸມັດ ຣາສປັກຊາ ເດີນທາງເຂົ້າປະເທດ ພ້ອມຢືນຢັນວ່າຈະບໍ່ມີການຂໍລີ້ໄພທາງການເມືອງຢູ່ປະເທດໄທ.