ໃນວັນທີ 10 ສິງຫາ 2022 ນີ້ ທີ່ສະໂມສອນໃຫຍ່ຫ້ອງວ່າການແຂວງ ໄດ້ຈັດກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງຫຼວງພະບາງ ຊຸດທີ II, ໂດຍເປັນປະທານຂອງ ທ່ານ ວົງສະຫວັນ ເທບພະຈັນ ຮອງເລຂາພັກແຂວງ ປະທານສະພາປະຊາຊົນແຂວງ, ມີ ທ່ານ ຄຳຂັນ ຈັນທະວີສຸກ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫຼວງພະບາງ, ພ້ອມດ້ວຍອາດີດພະນັກງານການນຳແຂວງ, ອາດີດສະມາຊິກສະພາແຫ່ງຊາດ, ອາດີດສະມາຊິກສະພາປະຊາຊົນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະຜູ້ຕາງໜ້າພະແນກການ-ກົມກອງອ້ອມຂ້າງແຂວງເຂົ້າຮ່ວມ.
ກອງປະຊຸມຄັ້ງນີ້ຈະດຳເນີນໄປເປັນເວລາ 3 ວັນ, ໃນນັ້ນ, ຈະໄດ້ຮັບຟັງການລາຍງານ ແລະການພິຈາລະນາ-ຮັບຮອງເອົາ ບັນຫາສຳຄັນພື້ນຖານຂອຄັ້ງນີ້ງແຂວງ ເປັນຕົ້ນ ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະແຜນງົບປະມານ ຂອງແຂວງປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022; ບົດລາຍງານ ຂອງອົງການປົກຄອງແຂວງ ກ່ຽວກັບຄວາມຄືບໜ້າ ການຈັດຕັ້ງປະຕິບັດວຽກງານຄຸ້ມຄອງການລົງທຶນຂອງພາກລັດ ແລະເອກະຊົນທັງພາຍໃນ ແລະຕ່າງປະເທດ, ການແກ້ໄຂບັນຫາໜີ້ສິນຂອງລັດ (ໂຄງການໃນແຜນ ແລະ ນອກແຜນ) ໃນໄລຍະຜ່ານມາ ກໍຄື 6 ເດືອນຕົ້ນປີແລະ ທິດທາງແຜນການ 6 ເດືອນທ້າຍປີ 2022; ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານຂອງແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃນໄລຍະຜ່ານມາ ແລະແຜນຈຸດສຸມໃນຕໍ່ໜ້າ; ບົດລາຍງານ ຂອງອົງການປົກຄອງແຂວງ ກ່ຽວກັບການຄຸ້ມຄອງລາຄາສິນຄ້າປະເພດຕ່າງໆຢູ່ແຂວງຫຼວງພະບາງ ໃນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022;
ບົດລາຍງານ ຂອງອົງການປົກຄອງແຂວງ ກ່ຽວກັບການຜະລິດສະບຽງອາຫານ ຕິດພັນກັບການຜະລິດສິນຄ້າເພື່ອຊົມໃຊ້ພາຍໃນ ແລະ ສົ່ງອອກໃນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ບົດລາຍງານຂອງທະນາຄານແຫ່ງ ສປປ ລາວ ປະຈຳພາກເໜືອ ທີ່ແຂວງຫຼວງພະບາງ ກ່ຽວກັບການຄຸ້ມຄອງຮ້ານແລກປ່ຽນເງິນຕາ; ບົດລາຍງານ ຂອງອົງການປົກຄອງແຂວງ ກ່ຽວກັບ ການກໍານົດລາລາຄາປີ້ເຂົ້າຊົມສະຖານທີ່ທ່ອງທ່ຽວ ແລະ ການຄຸ້ມຄອງສະຖານທີ່ບັນເທີງ; ບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນໄລຍະຜ່ານມາ ແລະ ແຜນຈຸດສຸມໃນຕໍ່ໜ້າ; ບົດລາຍງານ ຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານຂອງອົງການໄອຍະການປະຊາຊົນແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ບົດລາຍງານ ຂອງສານປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານຂອງສານປະຊາຊົນແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ບົດລາຍງານ ຂອງຄະນະປະຈຳສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ຂອງສະພາປະຊາຊົນແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ 2022.
ພ້ອມນີ້ ຈະມີການປະກອບຄໍາເຫັນ ຈາກພາກສ່ວນກ່ຽວຂ້ອງ ແລະສະມາຊິກສະພາແຫ່ງຊາດ-ສະມາຊິກສະພາປະຊາຊົນແຂວງ ຈະໄດ້ມີການຊັກຖາມ ຕໍ່ບັນຫາທີ່ພົ້ນເດັ່ນ ເຊິ່ງເປັນຈຸດສົນໃຈຂອງຜູ້ແທນ ກໍຄືປະຊາຊົນບັນດາເຜົ່າ, ທັງຈະໄດ້ມີການຊີ້ແຈງ, ອະທິບາຍ ແລະຕອບຂໍ້ຊັກຖາມ ຂອງຜູ້ຕາງໜ້າອົງການປົກຄອງແຂວງ ກໍຄືບັນດາຂະແໜງການທີ່ກ່ຽວຂ້ອງ ເປັນແຕ່ລະກໍລະນີ ຕາມພາລະບົດບາດ, ສິດ, ໜ້າທີ່ ແລະຄວາມຮັບຜິດຊອບການເມືອງຂອງຕົນ ບົນພື້ນຖານເຫດຜົນ ແລະ ຄວາມເປັນຈິງ ຂອງແຂວງຫຼວງພະບາງ. ໂອກາດ ກ່າວໄຂກອງປະຊຸມ ທ່ານ ວົງສະຫວັນ ເທບພະຈັນ ໄດ້ມີຄຳເຫັນຮຽກຮ້ອງໃຫ້ຜູ້ເຂົ້າຮ່ວມກອງປະຊຸມພ້ອມກັນຄົ້ນຄວ້າ, ປະກອບຄຳເຫັນ ຕໍ່ແຕ່ລະວຽກງານໃຫ້ເລິກເຊິ່ງ, ທັງຮັບປະກັນ ໃຫ້ຖືກຕ້ອງຕາມລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍ ແລະຄວາມເປັນຈິງຂອງສັງຄົມໃນປະຈຸບັນ, ເພື່ອຄວາມເປັນເອກະພາບກັນ ກ້າວໄປເຖິງການຮັບຮອງ ເອົາແຕ່ລະບັນຫາດ້ວຍຄຸນນະພາບສູງ ແລະຮຽກຮ້ອງໃຫ້ທຸກພາກສ່ວນໃນສັງຄົມ ຈົ່ງພ້ອມກັນຕິດຕາມຮັບຟັງ ການດຳເນີນກອງປະຊຸມຄັ້ງນີ້ ພ້ອມທັງໃຫ້ຄຳເຫັນຕຳນິຕິຊົມ ແລະສະເໜີບັນຫາຕ່າງໆ ຜ່ານໂທລະສັບສາຍດ່ວນ ໝາຍເລກ 071 156 (ໂທແບບບໍ່ເສຍຄ່າ) ເພື່ອເຮັດໃຫ້ກອງປະຊຸມຄັ້ງນີ້ ມີເນື້ອໃນຄົບຖ້ວນ, ສົມບູນ ແລະ ບັນລຸຜົນສຳເລັດຕາມຄາດໝາຍທີ່ວາງໄວ້.