ລົດໄຟລາວ-ຈີນຂົນສົ່ງສິນຄ້າ ຢຽບຄົນເສຍຊີວິດຢູ່ km 26 ນະຄອນຫຼວງວຽງຈັນ.
ວັນທີ 5 ສິງຫາ 2022 ໂທລະພາບປ້ອງກັນຄວາມສະຫງົບ ໄດ້ລາຍງານວ່າ: ທ່ານ ຮອງຫົວໜ້າກອງ ປກສ ເມືອງນາຊາຍທອງ ນ.ວ ໃຫ້ສຳພາດກ່ຽວກັບເຫດການລົດໄຟລາວ-ຈີນຂົນສົ່ງສິນຄ້າ ຈາກນະຄອນຫຼວງ ຫາ ບໍເຕັນ ໄດ້ຢຽບຄົນເສຍຊີວິດຢູ່ km 26 ບ້ານຫວຍນໍ້າເຢັນ ເມືອງນາຊາຍທອງ ນະຄອນຫຼວງວຽງຈັນ ໃນວັນທີ 3 ສິງຫາ, ເຊິ່ງຫຼັງຈາກທີ່ເຈົ້າໜ້າທີ່ໄດ້ຮັບລາຍງານ ກໍໄດ້ລົງໄປກວດສອບ ແລະ ເກັບກຳຂໍ້ມູນ, ເບື້ອງຕົ້ນໄດ້ຊາບວ່າຜູ້ເສຍຊີວິດແມ່ນ ທ້າວ ຊາວໄຮໂອ ອາຍຸ 48ປີ ເຊື້ອຊາດ ຈີນ.
ຈາກເຈົ້າໜ້າທີ່ໄດ້ສືບສວນສອບສວນຕໍ່ນ້ອງຊາຍຂອງຜູ້ກ່ຽວ ຈຶ່ງຮູ້ສາເຫດຄັ້ງນີ້ວ່າ ຜູ້ກ່ຽວມີເຈດຕະນາຂ້າໂຕຕາຍ ເນື່ອງຈາກພົບບັນຫາຄອບຄົວ.
ທ່ານ ຮອງຫົວໜ້າກອງ ປກສ ຍັງໄດ້ກ່າວຕື່ມອີກວ່າ ໃຫ້ປະຊາຊົນ ໂດຍສະເພາະປະຊາຊົນທີ່ອາໄສຢູ່ໃກ້ກັບທາງລົດໄຟ ຫ້າມເຂົ້າໄປໃນເຂດທາງລົດໄຟເດັດຂາດເພາະຈະເປັນອັນຕະລາຍ ແລະ ໃຫ້ພ້ອມກັນເປັນເຈົ້າການໃນການປົກປັກຮັກສາເສັ້ນທາງດັ່ງກ່າວ.