ກອງກຳລັງຊາວເຄີດ ທີ່ກຳລັງສູ້ຮົບກັບກຸ່ມ IS ທີ່ເມືອງໂຄບານີ ປະເທດຊີເຣຍ ກຳລັງພິກສະຖານະການເປັນຝ່າຍ

ບຸກໄລ່ຄູ່ຕໍ່ສູ້ ໂດຍສາມາດຍຶດຄືນພື້ນທີ່ມາໄດ້ຫລາຍຈຸດ.

ສຳນັກຂ່າວຕ່າງປະເທດລາຍງານ ໃນວັນທີ 11 ພະຈິກຜ່ານມານີ້ວ່າ ເຈົ້າໜ້າທີ່ລະດັບສູງຂອງກອງກຳລັງຊາວເຄີດ

ໄດ້ຖະແຫລງກ່ຽວກັບ ບັນດານັກຮົບຂອງພວກເຂົາກຳລັງເປັນຝ່າຍບຸກ ສຸມກຳລັງໂຈມຕີກຸ່ມ IS ພ້ອມທັງສະແດງ

ຄວາມໝັ້ນໃຈອີກວ່າ ນັກຮົບຂອງກອງກຳລັງຊາວເຄີດ ຈະສາມາດຂັບໄລ່ກຸ່ມຕິດອາວຸດລັດອິດສະລາມ ຫລື ກຸ່ມ

IS ໃຫ້ອອກໄປຈາກເມືອງໂຄບານີໄດ້.

ແຫລ່ງຂ່າວໄດ້ລະບຸວ່າ ກອງກຳລັງປົກປ້ອງຊາວເຄີດ ແລະ ກອງກຳລັງເພດເມີກາ ໄດ້ຮ່ວມກັນລະດົມຍິງປືນໃຫຍ່

ໃສ່ເຂດຖານທີ່ໝັ້ນຂອງກຸ່ມ IS ຫລາຍແຫ່ງໃນເມືອງໂຄບານີ ເຊິ່ງເມືອງດັ່ງກ່າວໄດ້ຖືກປິດລ້ອມໂຈມຕີໂດຍກຸ່ມ

IS ມາຕັ້ງແຕ່ໄລຍະກາງເດືອນກັນຍາທີ່ຜ່ານມາ ເຊິ່ງເຮັດໃຫ້ມີຜູ້ເສຍຊີວິດກ່ວາ 1,000 ຄົນ ຈາກການຕໍ່ສູ້ລະຫວ່າງ

ສອງຝ່າຍ ໂດຍສ່ວນໃຫຍ່ຜູ້ເສຍຊີວິດ ແມ່ນເປັນພວກນັກຮົບ IS.