ປະທານາທິບໍດີ ແລະ ທ່ານນາຍົກລັດຖະມົນຕີ ສີລັງກາ ປະກາດລາອອກຈາກຕຳແໜ່ງໃນວັນທີ 13 ກໍລະກົດນີ້ ເພື່ອຈະເປີດທາງໃຫ້ຈັດຕັ້ງລັດຖະບານແຫ່ງຊາດ ຫຼັງຈາກປະຊາຊົນຫຼາຍພັນຄົນລວມຕົວກັນ ປະທ້ວງຄັ້ງໃຫຍ່ທີ່ສຸດນັບຕັ້ງແຕ່ເດືອນມີນາຄົມທີ່ຜ່ານມາ.

ໃນວັນທີ 10 ກໍລະກົດ 2022 ສຳນັກຂ່າວຕ່າງປະເທດລາຍງານວ່າ: ປະທານສະພາຜູ້ແແທນລາຊະດອນສີລັງກາ ເປີດເຜີຍວ່າ, ປະທານາທິບໍດີສີລັງກາຕັດສິນໃຈລາອອກຈາກຕຳແໜ່ງໃນວັນທີ 13 ກໍລະກົດນີ້ ເພື່ອໃຫ້ການປ່ຽນຜ່ານອຳນາດເປັນໄປຢ່າງສັນຕິ. ສ່ວນສຳນັກງານນາຍົກລັດຖະມົນຕີສີລັງກາ ອອກຖະແຫຼງການວ່າ: ທ່ານ ຮານິວ ວິກົມສິງເຫ ນາຍົກລັດຖະມົນຕີພ້ອມລາອອກຈາກຕຳແໜ່ງ ເພື່ອເປີດທາງໃຫ້ຈັດຕັ້ງລັດຖະບານແຫ່ງຊາດຂຶ້ນມາບໍລິຫານປະເທດຕໍ່ໄປ.

ສຳລັບສີລັງກາພະເຊີນວິກິດເສດຖະກິດທີ່ໂຫດຮ້າຍທີ່ສຸດໃນຮອບ 73 ປີ ນັບຕັ້ງແຕ່ໄດ້ຮັບເອກະລາດຈາກອັງກິດ ຈາກປັນຫາເງິນເຟີ້ຂຶ້ນສູງເປັນປະວັດການ ແລະ ທຶນສຳຮອງຕ່າງປະເທດທີ່ມີຢ່າງຈຳກັດ ບໍ່ພຽງພໍຕໍ່ການຊຳລະໜີ້ສິນ ແລະ ຈ່າຍຄ່ານຳເຂົ້ານ້ຳມັນເຊື້ອໄຟ, ອາຫານ ແລະ ຢາ ຈົນສ້າງຄວາມເດືອດຮ້ອນໃຫ້ປະຊາຊົນເປັນວົງກວ້າງ  ແລະ ນຳໄປສູ່ການຕັ້ງຂະບວນປະທ້ວງຂັບໄລ່ຜູ້ນຳປະເທດໃຫ້ລາອອກຈາກຕຳແໜ່ງ.

ທີ່ມາ: BBC