ໃນວັນທີ 5 ກໍລະກົດ ລັດຖະບານຫວຽດນາມ ໄດ້ເປີດເຜີຍວ່າ: ທ່ານ ເຊີເກ ລາຟລອຟ (Sergei Lavrov) ລັດຖະມົນຕີກະຊວງການຕ່າງປະເທດຂອງຣັດເຊຍ ເດີນທາງໄປຮາໂນຍ ປະເທດຫວຽດນາມໃນວັນອັງຄານ ກ່ອນທີ່ຈະໄປປະຊຸມ G20 ໃນອິນໂດເນເຊຍໃນອາທິດນີ້.
ການຢ້ຽມຢາມໃນຄັ້ງນີ້ເປັນໄປຕາມຄຳເຊີນຂອງ ທ່ານ Bui Thanh Son ລັດຖະມົນຕີກະຊວງການຕ່າງປະເທດຂອງຫວຽດນາມ ແລະ ເກີດຂຶ້ນຂະນະທີ່ທັງ 2 ປະເທດກຳລັງສະເຫຼີມສະຫຼອງຄົບຮອບ 10 ປີ ຂອງການເປັນຫຸ້ນສ່ວນທາງຍຸດທະສາດທີ່ຄວບຄຸມທຸກມິຕິ.
ສຳນັກຂ່າວ ຣອຍເຕີ ໄດ້ລາຍງານວ່າ: ຣັດເຊຍເປັນຜູ້ຈັດຫາອາວຸດລາຍໃຫຍ່ທີ່ສຸດໃຫ້ກັບຫວຽດນາມ ແລະ ບໍລິສັດຂອງຣັດເຊຍກໍມີສ່ວນກ່ຽວຂ້ອງກັບໂຄງການພະລັງງານຫຼາຍໆໂຄງການໃນປະເທດຫວຽດນາມເຊັ່ນກັນ, ນອກນີ້ທັງ 2 ປະເທດນີ້ມີຄວາມສຳພັນກັນມາແຕ່ສະໄໝສະຫະພາບໂຊຫວຽດ.