ການນຳເຂົ້ານ້ຳມັນເຊື້ອໄຟຕາມການລາຍງານຂອງພາກສ່ວນທີ່ກ່ຽວຂ້ອງພົບວ່າ ທົ່ວປະເທດລາວໄດ້ມີການນຳເຂົ້າງົບປະມານ 1.200 ລ້ານລິດຕໍ່ປີ, ແຕ່ຜ່ານການກວດສອບຕົວຈິງໂດຍການເກັບກຳຂໍ້ມູນຈາກປະເທດ ທີ່ລາວເຮົາໄດ້ນຳເຂົ້ານ້ຳມັນຈາກ ສສ ຫວຽດນາມ ແລະ ໄທ ຫຼື ຜ່ານປະເທດດັ່ງກ່າວພົບວ່າມີ 1.900 ລ້ານລິດຕໍ່ປີ, ນັ້ນໝາຍຄວາມວ່າ 700 ລ້ານລິດທີ່ເຫຼືອນັ້ນ ສາມາດເວົ້າໄດ້ວ່າແມ່ນການລັກລອບນຳເຂົ້າຍ້ອນວ່າຈຶ່ງຈະບໍ່ໄດ້ເສຍພາສີອາກອນ.
ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ ໄດ້ກ່າວໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດຊຸດທີ IX ຕື່ມວ່າ: ນ້ຳມັນເຊື້ອໄຟ 700 ລ້ານລິດ ທີ່ບໍ່ມີການລາຍງານຕົວເລກ ໃຫ້ລັດຖະບານຮັບຮູ້ນັ້ນ ກໍໝາຍຄວາມວ່າ ມີເຈົ້າໜ້າທີ່ກ່ຽວຂ້ອງ ຂອງລັດຈຳນວນໜຶ່ງໄດ້ຮ່ວມກັບບໍລິສັດນຳເຂົ້ານ້ຳມັນເຊື້ອໄຟ ທີ່ສວຍໂອກາດຫາຜົນປະໂຫຍດໃສ່ຕົວເອງ ບໍ່ໄດ້ຄຳນຶງເຖິງຜົນເສຍຫາຍທີ່ຈະສົ່ງຜົນກະທົບໃຫ້ປະເທດ ແຕ່ສິ່ງທີ່ເກີດຂຶ້ນນັ້ນແມ່ນເກີດຂຶ້ນຈາກການບໍລິຫານຂອງລັດຖະບານທີ່ບໍ່ຮັດກຸມ ແລະ ອ່ອນແອ, ດັ່ງນັ້ນຈະໄດ້ສືບຕໍ່ປັບປຸງແກ້ໄຂໃຫ້ດີຂຶ້ນ ໂດຍສະເພາະບັນດາບໍລິສັດທີ່ລັດຖືຮຸ້ນ 100% ເຊິ່ງຈະບໍ່ມີການປັບປຸງ ແຕ່ຈະເປັນການປະຕິຮູບ.
ແຫຼ່ງຂ່າວຈາກ ວຽງຈັນທາຍ