ອີງຕາມຂ່າວຈາກ ນີວແດນລີ, ສິງກະໂປ ແລະ ອິນເດຍ ຮຽກຮ້ອງ ໃຫ້ອາຊຽນ ແລະ ອິນເດຍ ຮັດແໜ້ນ ຄວາມສຳພັນ ການຮ່ວມມື ໃຫ້ຫລາຍຂຶ້ນ ທ່າມກາງ ສະຖານະການ ຣັດເຊຍ ແລະ ຢູເຄຣນ ຍັງຄັ່ງຮ້ອນ ລວມທັງ ສ.ອາເມລິກາ ແລະ ຈີນ ມີການແຂ່ງຂັນ ກັນຫລາຍຂຶ້ນຈົນເປັນໄພ ຕໍ່ສັນຕິພາບ ແລະ ສະຖຽນລະພາບ ໃນພາກພື້ນ.
ທ່ານ ລັດຖະມົນຕີ ຕ່າງປະເທດ ອິນເດຍ ກ່າວໃນກອງປະຊຸມ ວາລະພິເສດ ຄົບຮອບ 30ປີ ຄວາມສຳພັນ ສະມາຄົມປະຊາຊາດ ອາຊີ ຕາເວັນອອກ ສ່ຽງໃຕ້ ຫລື ອາຊຽນ ໃນວັນທີ 16 ມິຖຸນານີ້ວ່າ: ອາຊຽນ ແລະ ອິນເດຍ ພວມຜະເຊີນຜົນກະທົບຈາກສະພາບການຂອງໂລກ ເຄັ່ງຮ້ອນຂຶ້ນກ່ຽວກັບຄວາມໝັ້ນຄົງດ້ານອາຫານ ແລະ ພະລັງງານ.
ຊຶ່ງອິນເດຍ ສະໜັບ ສະໜູນ ອາຊຽນ ທີ່ເຂັ້ມແຂງ ເປັນໜຶ່ງດຽວ ແລະ ຄວາມຈະເລີນ ຮຸ່ງເຮືອງ ຢ່າງເຕັມສ່ວນ ເພາະອາຊຽນ ໄດ້ຮັບການ ຍອມຮັບ ກ່ຽວກັບຄວາມເປັນກາງໃນພາກພື້ນ ອິນໂດ-ປາຊີຟິກ ພ້ອມໃຊ້ໂອກາດນີ້ ເນັ້ນໃສ່ເລື່ອງ ອາຊຽນ ແລະ ອິນເດຍ ຈຳເປັນຕ້ອງເສີມສ້າງ ຄວາມເຊື່ອມໂຍງທາງບົກ ແລະ ທາງທະເລລະຫວ່າງກັນ ໃຫ້ຫລາຍຂຶ້ນກວ່າເກົ່າ.