ທ່ານ ດຣ. ພັນຄຳ ວິພາວັນ ຮອງນາຍົກລັດຖະມົນຕີ ຜູ້ຊີ້ນຳຂົງເຂດວັດທະນະທຳ-ສັງຄົມ ລັດຖະມົນຕີວ່າການ
ກະຊວງສຶກສາທິການ ແລະ ກີລາ ໄດ້ຖະແຫຼງຂ່າວກ່ຽວກັບບັ້ນປຸກລະດົມ ຂະບວນການສັກຢາກັນພະຍາດຕ້ານ
ພະຍາດໝາກແດງ ປີ 2014 ໃນວັນທີ 7 ພະຈິກ 2014 ທີ່ກະຊວງສຶກສາທິການ ແລະ ກີລາ ວ່າ: ພັກ ແລະ ລັດຖະ
ບານ ໄດ້ນຳພາຈັດຕັ້ງປະຕິບັດນະໂຍບາຍດ້ານສັງຄົມຢ່າງເໝາະສົມ ໂດຍຖືເອົາການພັດທະນາຄົນເປັນບຸລິມະ
ສິດ ໄປຄຽງຄູ່ກັບການພັດທະນາເສດຖະກິດ ໃນນັ້ນ ໄດ້ແນໃສ່ສ້າງຄົນລາວໃຫ້ມີຄວາມເຂັ້ມແຂງທາງຮ່າງກາຍ
ແລະ ມີພະລານາໄມສົມບູນ ດ້ວຍການປະຕິບັດນະໂຍບາຍດ້ານສາທາລະນະສຸກ ຕາມທິດຖືເອົາການກັນພະຍາດ
ສົ່ງເສີມສຸຂະພາບເປັນຕົ້ນຕໍ ແລະ ຖືເອົາການປິ່ນປົວທີ່ມີຄຸນະພາບ ສະໜອງການບໍລິການດ້ານສາທາລະນະສຸກ
ຢ່າງທົ່ວເຖິງເປັນສຳຄັນ.
ວຽກງານສັກຢາກັນພະຍາດ ເປັນວຽກງານໜຶ່ງທີ່ສຳຄັນ ເພື່ອສະກັດກັ້ນພະຍາດຕິດຕໍ່ຮ້າຍແຮງຫຼາຍຊະນິດ ເຊິ່ງ
ພາໃຫ້ຫຼຸດຜ່ອນອັດຕາການເສຍຊີວິດຂອງແມ່ ແລະ ເດັກ ໃນໄລຍະຜ່ານມາ ດ້ວຍຄວາມພະຍາຍາມ ແລະ ຄວາມ
ຮັບຜິດຊອບສູງຂອງບັນດາຂະແໜງການທີ່ກ່ຽວຂ້ອງ ຂອງອຳນາດການປົກຄອງທຸກຂັ້ນ ແນວໂຮມ ອົງການຈັດ
ຕັ້ງມະຫາຊົນ ແລະ ພໍ່ແມ່ປະຊາຊົນ ພ້ອມທັງການມີສ່ວນຮ່ວມຂອງຄູ່ຮ່ວມພັດທະນາ ສປປ ລາວ ຈຶ່ງສາມາດບັນ
ລຸການລົບລ້າງພະຍາດໂປລິໂອຢ່າງຊິ້ນເຊີງ ໃນຂອບເຂດທົ່ວປະເທດ ແຕ່ປີ 2000 ເປັນຕົ້ນມາ ແລະ ສາມາດລົບ
ລ້າງພະຍາດບາດທະຍັກໃນແມ່ ແລະ ເດັກ ໃນປີ 2013.
ປັດຈຸບັນນີ້ ສປປ ລາວ ຍັງປະເຊີນໜ້າກັບສິ່ງທ້າທາຍ ໃນການຫຼຸດຜ່ອນອັດຕາການເສຍຊີວິດຂອງແມ່ ແລະ ເດັກ
ໜຶ່ງໃນສາເຫດຂອງການເສຍຊີວິດດັ່ງກ່າວ ແມ່ນມາຈາກພະຍາດໝາກແດງ ເຊິ່ງສາມາດເຮັດໃຫ້ເດັກເປັນອັກ
ເສບປອດຮຸນແຮງ ຖອກທ້ອງ ຕາບອດ ແລະ ເສຍຊີວິດໄດ້ ສ່ວນແມ່ຍິງຖືພາ ກໍ່ມີຜົນກະທົບຕໍ່ເດັກໃນທ້ອງ ເຊັ່ນ:
ພະຍາດຫົວໃຈຜິ່ວ ພະຍາດແກ່ນຕາຂຸ້ນ ພະຍາດປາກແຫວ່ງ ຫູໜວກ ແລະ ອື່ນໆ ເພື່ອສະກັດກັ້ນພະຍາດດັ່ງກ່າວ
ລັດຖະບານຈຶ່ງອະນຸມັດໃຫ້ກະຊວງສາທາລະນະສຸກ ສົມທົບກັບຄະນະກຳມາທິການເພື່ອແມ່ ແລະ ເດັກແຫ່ງຊາດ
ຈັດວັນສັກຢາກັນພະຍາດແຫ່ງຊາດ ໃນຂອບເຂດທົ່ວປະເທດ ເພື່ອກຳຈັດພະຍາດໝາກແດງໃນປີນີ້ ໂດຍວາງເປົ້າ
ໝາຍເພື່ອກຳຈັດພະຍາດໝາກແດງ 2 ຊະນິດຄື: ໝາກແດງນ້ອຍ ແລະ ໝາກແດງໃຫຍ່ ໃຫ້ເດັກນ້ອຍອາຍຸແຕ່
9 ເດືອນ ຫາລຸ່ມ 10 ປີ ເຊິ່ງຈະໄດ້ດຳເນີນໃນລະຫວ່າງວັນທີ 17-30 ພະຈິກ 2014 ໂດຍກຳນົດເປົ້າໝາຍໃຫ້ບັນລຸໃຫ້
ໄດ້ 95% ຂອງກຸ່ມເປົ້າໝາຍດັ່ງກ່າວ.
ຈຶ່ງຂໍຮຽກຮ້ອງມາຍັງບັນດາທ່ານ ພໍ່ແມ່ປະຊາຊົນບັນດາເຜົ່າ ພະນັກງານ-ລັດຖະກອນ ທະຫານ-ຕຳຫຼວດ ທຸກທົ່ວ
ໜ້າ ຈົ່ງໃຫ້ການຮ່ວມມື ແລະ ເຂົ້າຮ່ວມຂະບວນການດັ່ງກ່າວຢ່າງຕັ້ງໜ້າ ໂດຍການພາເອົາລູກຫຼານໄປຮັບເອົາຢາ
ວັກຊິນ ໃນສະຖານບໍລິການສຸຂະພາບໃກ້ບ້ານທ່ານ.
ແຫລ່ງຂ່າວ: ວຽງຈັນໃໝ່