ເກີດເຫດລົດໄຟໂດຍສານຕົກລາງ ໃນເມືອງທະເລຊາຍຂອງອີຣານ ສົ່ງຜົນໃຫ້ມີຜູ້ໂດຍສານເສຍຊີວິດຫຼາຍກວ່າ 17 ຄົນ ນອກຈາກນີ້ຍັງມີຄົນບາດເຈັບອີກ 50 ຄົນ.

ໃນວັນທີ 8 ມິຖຸນາ ຈາກສຳນັກຂ່າວ ອາລຈາຊີຣາ ລາຍງານວ່າ: ເກີດເຫດລົດໄຟຕົກລາງ ໃນເມືອງທະເລຊາຍທາບາສ ທາງຕະເວັນອອກຂອງປະເທດ ຫ່າງຈາກກຸງເຕຫະຣານ ໄປທາງຕະເວັນອອກສຽງໃຕ້ປະມານ 550 ກິໂລແມັດ, ເຈົ້າໜ້າທີ່ກູ້ໄພໄດ້ຮີບຊ່ວຍເຫຼືອຄົນທີ່ຕິດຢູ່ໃນລົດໄຟອອກມາ ແລະ ເຄື່ອນຍ້າຍຜູ້ບາດເຈັບຫຼາຍກວ່າ 50 ຄົນໄປສົ່ງໂຮງໝໍໃກ້ຄຽງ ຂະນະທີ່ພົບເຫັນຜູ້ເສຍຊີວິດໃນລົດໄຟຢ່າງໜ້ອຍ 17 ຄົນ ແລະ ຈະມີຫຼາຍກວ່ານີ້ຍ້ອນວ່າຜູ້ບາດເຈັບຈຳນວນຫຼາຍມີອາການສາຫັດ.

ສື່ທ້ອງຖິ່ນໄດ້ລາຍງານວ່າ ເສັ້ນທາງລົດໄຟນີ້ເຊື່ອມຕໍ່ລະຫວ່າງ ເມືອງທາບາສ ກັບ ເມືອງຢາສ ທີ່ຢູ່ທາງພາກກາງຂອງປະເທດ, ຂະນະທີ່ເກີດເຫດນັ້ນ ມີຜູ້ໂດຍສານໃນລົດໄຟປະມານ 350 ຄົນ ຈາກການກວດສອບເບື້ອງຕົ້ນພົບວ່າສາເຫດອາດຈະມາຈາກ ລົດໄຟໄດ້ແລ່ນຊົນກັບ ລົດຂຸດດິນຄັນໜຶ່ງທີ່ຈອດຢູ່ດ້ານຂ້າງຂອງລາງລົດໄຟ ເນື່ອງຈາກບໍລິເວນນີ້ເປັນຈຸດທີ່ຢູ່ລະຫວ່າງການສ້ອມແປງທາງ ຢ່າງໃດກໍຕາມ ຈະໄດ້ກວດສອບເພີ່ມເພື່ອຄວາມຊັດເຈນ.