ເອຢິບຈັດງານສະແດງນິເທດສະການຄັ້ງໃຫຍ່ໃຫ້ກັບປະຊາຊົນເຂົ້າເບິ່ງວັດຖຸບູຮານທີ່ຄົ້ນພົບໃນບໍ່ດົນມານີ້ ປະກອບມີມຳມີ່ 250 ພ້ອມດ້ວຍຮູບປັ້ນ ແລະ ເຄື່ອງໃຊ້ຂອງຟາໂຣອາຍຸເກົ່າແກ່ຫຼາຍກວ່າ 2.500 ປີ.

ໃນວັນທີ 30 ພຶດສະພາ 2022 ຊີບີເອສ ໄດ້ລາຍງານວ່າ: ທາງການເອຢິບ ໄດ້ນຳວັດຖຸບູຮານຈຳນວນໜຶ່ງທີ່ຫາກໍຄົ້ນພົບບໍລິເວນສຸສານບູຮານແຫ່ງ ຊັກຄາຣາ ອອກມາສະແດງໃຫ້ກັບປະຊາຊົນໄດ້ເບິ່ງປະກອບມີ ໂຮງສົບ 250 ອັນ ທີ່ມີການຂຽນລວດລາຍຕົບແຕ່ງງາມ ພາຍໃນນັ້ນມີ ມຳມີ່ທີ່ສະພາບສົມບູນຢູ່, ນອກຈາກນີ້ຍັງມີຮູບປັ້ນທອງແດງ 150 ອັນ ເປັນຮູບເທບພະເຈົ້າຂອງເອຢິບ ແລະ ເຄື່ອງໃຊ້ຂອງຟາໂຣ ອາຍຸເກົ່າແກ່ກວ່າ 2.500 ປີ.

ນິເທດສະການນີ້ຈັດຂຶ້ນບໍລິເວນໜ້າພິລາມິດຂັ້ນບັນໄດໂຈເຊີ ໃນເມືອງຊັກຄາຣາ ໂດຍມຳມີ່ ແລະ ວັດຖຸບູຮານຖືກຂຸດເຫັນໃນບໍລິເວນສຸສານບູຮານແຫ່ງຊັກຄາຣາ.

ການຈັດສະແດງໃນເທື່ອນີ້ ເພື່ອເປັນການໃຫ້ປະຊາຊົນໄດ້ທ່ຽວຊົມ ກ່ອນທີ່ຈະມີການຂົນຍ້າຍໄປຕັ້ງສະແດງແບບຖາວອນທີ່ ພິພິຕະພັນ “ແກຣນ ເອຢິບ” ພິພິຕະພັນບູຮານວັດຖຸແຫ່ງໃໝ່ທີ່ຢູ່ຊານກຸງໄຄໂຣ.