ເຈົ້າໜ້າທີ່ ກູ້ໄພ ບຣາຊິລ ເລັ່ງຊອກຫາຮ່າງຜູ້ເສຍຊີວິດ ແລະ ຜູ້ຫາຍສາບສູນ ຈາກເຫດ ການນ້ຳຖ້ວມ-ດິນຖະລົ່ມ ທີ່ເມືອງເປໂທໂພລິສ ຊຶ່ງເປັນພຶ້ນທີ່ຜູ້ເຂົາ ທີ່ຕັ້ງຢູ່ທາງຕອນເໜືອ ຂອງນະຄອນ ຣີໂອ ເດຈາເນໂຣ ຂອງ ບຣາຊິລ ຫລັງເກີດຝົນຕົກໜັກທີ່ສຸດໃນຮອບ 90 ປີ.
ຫຼ້າສຸດ ຍອດຜູ້ເສຍຊີວິດເພີ່ມຂຶ້ນຢ່າງນ້ອຍ 113 ຄົນ ແລະ ຜູ້ສູນຫາຍ 134 ຄົນ ໂດຍການຄົ້ນຫາເປັນໄປຢ່າງຍາກລຳບາກ ເນື່ອງຈາກເຕັມໄປດ້ວຍຂີ້ຕົ່ມ ແລະ ເສດຊາກສິ່ງຂອງທີ່ເປເພ ທາງເຈົ້າໜ້າທີ່ຕ້ອງນຳລົດ, ເຮລິຄັອບເຕີ ແລະ ໝາດົມກິ່ນຕາມຫາຜູ້ປະສົບໄພ.
ຂະນະທີ່ຜູ້ທີ່ໄດ້ຮັບຜົນກະທົບຫຼາຍກວ່າ 400 ຄົນ ບໍ່ມີບ່ອນຢູ່ຕ້ອງໄດ້ຢູ່ຕາມສູນພັກພິງຊົ່ວຄາວ ຕາມໂຮງຮຽນຕ່າງໆ ດ້ານເຈົ້າໜ້າທີ່ປະກາດຂໍຮັບບໍລິຈາກທີ່ນອນ ອາຫານ, ນ້ຳ, ເສື້ອຜ້າ ແລະ ໜ້າກາກອະນາໄມ ເພື່ອໃຫ້ຄວາມຊ່ວຍເຫຼືອແກ່ຜູ້ທີ່ໄດ້ຮັບຜົນກະທົບ.