ກອງທັບຣັດເຊຍບຸກເຂົ້າເມືອງໃຫຍ່ສຸດຂອງຢູເຄຣນ ທີ່ຢູເຄຣນຍັງຄອບຄອງຢູ່ໃນພູມີພາກດອນບາສ ແລະ ຍັງພະຍາຍາມຍຶດພາກຕະເວັນອອກຂອງຢູເຄຣນ.
ສຳນັກຂ່າວ ເດິກາດຽນ ໄດ້ລາຍງານວ່າ: ກອງທັບຣັດເຊຍໄດ້ບຸກເຂົ້າເມືອງ ຊີວີໂຣໂດເນສ ເມືອງທີ່ໃຫຍ່ທີ່ສຸດໃນພູມີພາກດອນບາສ ທີ່ຍັງຢູ່ພາຍໃຕ້ການຄວບຄຸມຂອງລັດຖະບານຢູເຄຣນແລ້ວໃນວັນຈັນ ທີ່ 30 ພຶດສະພາ ທີ່ຜ່ານມານີ້ ຫຼັງຈາກທີ່ຍິງຖະລົ່ມຢ່າງໜັກໃນຊ່ວງຫຼາຍມື້ທີ່ຜ່ານມາ.
ເຈົ້າເມືອງຊີວີໂຣໂດເນສ ໄດ້ຢືນຢັນວ່າ: ຣັດເຊຍບຸກເຂົ້າມາໃຈກາງເມືອງ ແລະ ຢູເຄຣນໄດ້ໃຊ້ກຳລັງຍູ້ໃຫ້ກອງທັບຣັດເຊຍກັບໄປ ຈຶ່ງເຮັດໃຫ້ມີການສູ້ກັນໃນຫົນທາງ ຂະນະທີ່ຍັງມີປະຊາຊົນມີ່ຍັງເຫຼືອຢູ່ໃນເມືອງ 12,000-13,000 ຄົນ ຈາກແຕ່ກ່ອນທີ່ມີເປັນແສນຄົນ ຍັງລົບລີ້ຢູ່ຕາມຊັ້ນໃຕ້ດິນ ແລະ ຂຸມລົບໄພຕ່າງໆ, ຈາກການໂຈມຕີທີ່ຜ່ານມາມີປະຊາຊົນເສຍຊີວິດຫຼາຍກວ່າ 1.500 ຄົນ ດ້ວຍສາເຫດຕ່າງໆ ລວມເຖິງການຂາດແຄນຢາ ແລະ ຕຶກອາຄານທີ່ຖືກທຳລາຍໄປ 90% ລະບົບໄຟຟ້າ ແລະ ການສື່ສານສ່ວນໃຫຍ່ຖືກຕັດຂາດ.
ແລ້ວກ່ອນໜ້ານີ້ມີລາຍງານວ່າ ນັກຂ່າວຈາກປະເທດຝຣັ່ງໄດ້ເສຍຊີວິດ ຍ້ອນລົດຫຸ້ມເກາະສຳລັບອົບພະຍົບປະຊາຊົນທີ່ລາວໂດຍສານຢູ່ ຖືກສະເກັດລະເບີດຈາກການໂຈມຕີຂອງຣັດເຊຍ ແລະ ຍັງມີເດັກນ້ອຍເສຍຊີວິດ ຍ້ອນລູກປືນຣັດເຊຍໄດ້ຕົກໃສ່ອາຄານທີ່ຢູ່ອາໄສ.
ຢ່າງໄດກໍຕາມທາງຢູເຄຣນໄດ້ຢືນຢັນວ່າ ທັງສອງເມືອງຊີວີໂຣໂດເນສ ແລະ ລິຊິຄານ ຍັງຢູ່ພາຍໃຕ້ການຄວບຄຸມຂອງຢູເຄຣນຢູ່ ແລະ ບໍ່ໄດ້ຖືກປິດກັ້ນໂດຍກອງທັບຂອງພວກເຂົາຍັງຍັງພະຍາຍາມທີ່ຈະບໍ່ໃຫ້ຣັດເຊຍປິດລ້ອມໂດຍສົມບູນໄດ້.