ມະຫາເສດຖີຊາວປາກີສະຖານ ໂມຮຳມັດ ຊາຮໍ (Mohammad Zahoor) ໄດ້ມອບເຮືອບິນສູ້ຮົບໃຫ້ກັບຢູເຄຣນ ເພື່ອຊ່ວຍໃນການປະຕິບັດການພິດເສດທາງການທະຫານ ໃນຂະນະທີ່ການຄວາມຂັດແຍ່ງລະຫວ່າງຣັດເຊຍ ແລະ ຢູເຄຣນພາຍໃນປະເທດຍັງສືບຕໍ່.
ໃນວັນພຸດທີ່ຜ່ານມານີ້ ແຫຼ່ງຂ່າວທີເອສເອັນ ໄດ້ລາຍງານວ່າ ຊາຮໍ ແລະ ໝູ່ ໄດ້ຊ່ວຍຢູເຄຣນໃນການປະຕິບັດການທາງການທະຫານກັບຣັດເຊຍແບບມິດງຽບ ແລະ ໄດ້ຊື້ເຮືອບິນສູ້ຮົບໃຫ້ກັບຢູເຄຣນເຖິງ 2 ລຳ.
ນັບຕັ້ງແຕ່ຄວາມຂັດແຍ່ງລະຫວ່າງຣັດເຊຍ – ຢູເຄຣນໃນທ້າຍເດືອນກຸມພາ, ຊາຮໍ ເຄີຍອາໄສຢູ່ໃນຢູເຄຣນ ແລະ ເປັນອະດີດເຈົ້າຂອງໜັງສືພິມ Kyiv Post ຂອງຢູເຄຣນ, ໄດ້ຊຸກຍູ້ເພື່ອຮັບປະກັນການອົບພະຍົບພົນລະເມືອງຂອງຢູເຄຣນໃຫ້ປອດໄພ, ອີງຕາມການລາຍງານຂອງ Khaleej Times.
ຕາມການລາຍງານໄດ້ກ່າວວ່າ ມະຫາເສດຖີໄດ້ເກີດທີ່ເມືອງກາລາຈີ ແລະ ໄດ້ພະຍາຍາມລະດົມທຶນ ເພື່ອຊ່ວຍອົບພະຍົບຄົນອອກໄປເຂດອື່ນໆຂອງເອີຣົບ. ທ່ານ ຊາຮໍ ໄດ້ສືບຕໍ່ພົບປະກັບ ປະມຸກລັດ ແລະ ຜູ້ມີອິດທິພົນອື່ນໆ ເພື່ອຮັບປະກັນການເດີນທາງຢ່າງປອດໄພໃຫ້ແກ່ຊາວຢູເຄຣນ.
ພວດເຂົາຍັງຮຽກຮ້ອງໃຫ້ທົ່ວໂລກເຂົ້າຂ້າງ ແລະ ຊ່ວຍເຫຼືອຢູເຄຣນ ໃນຂະນະທີ່ຄວາມຂັດແຍ່ງຍັງບໍ່ມີທ່າທີ່ຈະຫຼຸດລົງ.
ແຫຼ່ງຂ່າວຈາກສຳນັກຂ່າວຕ່າງປະເທດ