ອີງຕາມການລາຍງານຂ່າວຈາກແຂວງສາລະວັນ ໃຫ້ຮູ້ວ່າ: ວັນທີ 9 ພຶດສະພາ ຜ່ານມາ ເມືອງຄົງເຊໂດນ ຈັດພິທີມອບ-ຮັບ ໂຮງໝໍຫລັງໃໝ່ ຢ່າງເປັນທາງການ ພາຍໃຕ້ໂຄງການຊ່ວຍເຫລືອລ້າ ດ້ານມະນຸດສະທຳ ຂອງກອງບັນຊາການ ກອງທັບສະຫະລັດອາເມລິກາ ປະຈຳພາກພື້ນອິນໂດປາຊີຟິກ ໂດຍການລົງນາມມອບ-ຮັບ ລະຫວ່າງ ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ ຜູ້ຊີ້ນໍາວຽກງານເສດຖະກິດ ແລະ ທ່ານ ປີເຕີ ເຮມອນ ເອກອັກຄະລັດຖະທູດ ສະຫະລັດອາເມລິກາ ປະຈຳລາວ, ມີບັນດາຜູ້ຕາງໜ້າຈາກກະຊວງການຕ່າງປະເທດ, ພະແນກເອຣົບ-ອາເມລິກາ, ກົມພົວການຕ່າງປະເທດ ກະຊວງປ້ອງກັນປະເທດ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ດຣ ອາຄົມ ລ່ຳວິຈິດ ຫົວໜ້າພະແນກສາທາລະນະສຸກ ແຂວງສາລະວັນ ໄດ້ໃຫ້ຮູ້ວ່າ: ການກໍ່ສ້າງໂຮງໝໍ ຫລັງໃໝ່ ໄດ້ເລີ່ມລົງມືກໍ່ ສ້າງນັບແຕ່ເດືອນເມສາ 2021 ຈົນເຖິງປັດຈຸບັນ ສຳເລັດ 100% ມູນຄ່າການກໍ່ສ້າງ 783.000 ໂດລາສະຫະລັດ ເປັນອາຄານຍົກສູງຈາກ ລະດັບນໍ້າຖ້ວມສູງ 1 ແມັດ ຫລື 2,40 ແມັດ ຈາກໜ້າດິນ, ຄວາມຍາວ 46 ແມັດ, ກວ້າງ 10.5 ແມັດ, ມີທັງໝົດ 21 ຫ້ອງຄື: ຫ້ອງນ້ຳຄົນພິການ, ຫ້ອງນ້ຳພະນັກງານ, ຫ້ອງລໍຖ້າເກີດລູກ, ຫ້ອງເກີດລູກ, ຫ້ອງພັກຟື້ນເກີດລູກ, ຫ້ອງສຸກເສີນ, ຫ້ອງລ້ຽງເດັກ, ຫ້ອງປົວແຂ້ວ, ຫ້ອງຜ່າຕັດ, ຫ້ອງທົດລອງ, ຫ້ອງນ້ຳ, ຫ້ອງອາບນ້ຳ, ຫ້ອງເກັບເຄື່ອງ, ຫ້ອງນອນຄົນເຈັບ, ຫ້ອງພັກຟື້ນຜ່າຕັດ, ຫ້ອງຜູ້ປ່ວຍພາຍນອກ, ຫ້ອງຈ່າຍຢາ, ຫ້ອງຕ້ອນຮັບ-ການເງິນ, ຫ້ອງປະຊຸມ-ບໍລິຫານ, ຫ້ອງອຳນວຍການ, ຫ້ອງແມ່ແລະເດັກ.
ນອກຈາກມີອຸປະກອນການແພດ, ເຄື່ອງເຟີນີເຈີໃນຫ້ອງການ, ຕິດຕັ້ງໝໍ້ແປງ 1 ໜ່ວຍ, ກໍ່ສ້າງອ່າງນໍ້າສູງ, ເຕົາເຜົາຂີ້ເຫຍື້ອ ແລະ ອື່ນໆ ໂດຍແມ່ນ ບໍລິສັດແອວຈີທີ່ປືກສາ ແລະ ກໍ່ສ້າງຈຳກັດ ເປັນຜູ້ຮັບເໝົາກໍ່ສ້າງ.
ທ່ານ ປີເຕີ ເຮມອນ ໄດ້ກ່າວວ່າ: ການສ້າງໂຮງໝໍຫລັງໃໝ່ນີ້, ເປັນການຊ່ວຍເຫລືອ ເພື່ອປັບປຸງດ້ານການເຂົ້າເຖິງການປິ່ນປົ່ວສຸຂະພາບ ແກ່ປະຊາຊົນເມືອງຄົງເຊໂດນ ແລະ ແຂວງສາລະວັນ ໃຫ້ມີຄວາມສະດວກສະບາຍຍິ່ງຂຶ້ນ, ປະກອບສ່ວນເຂົ້າໃນການພັດທະນາວຽກງານສາທາລະນະສຸກຂອງ ສປປ ລາວ ເຊິ່ງນອນຢູ່ໃນເປົ້າໝາຍຂອງການພັດທະນາແບບຍືນຍົງ (ສຸຂະພາບທີ່ດີ ແລະ ຊີວິດການເປັນຢູ່ທີດີ), ມີຄວາມກ້າວໜ້າ ແລະ ມີການບໍລິການດ້ານການແພດ ນັບມື້ນັບດີຂຶ້ນ, ວ່ອງໄວ, ທັນສະໄໝ ແລະ ມີປະສິດທິພາບ ຕໍ່ກັບການບໍລິການເບິ່ງແຍງປິ່ນປົວ ປະຊາຊົນ ກໍຄື ຄົນເຈັບ.
ຂ່າວ-ພາບ: ວິໄລວອນ ສິດທິໄຊ