ໃນວັນຈັນທີ 9 ພຶດສະພານີ້, ທ່ານ ໂຈໄບເດັນ ປະທານາທິບໍດີສະຫະລັດອາເມຣິກາ ໄດ້ລົງນາມໃຫ້ລັດຖະບານມອບອາວຸດໄປຍັງຢູເຄຣນ ເພື່ອຊ່ວຍເຫຼືອໃນການສູ້ກັບຣັດເຊຍ ໂດຍມາດຕະການນີ້ເກີດແຕ່ສະໄໝສົງຄາມໂລກຄັ້ງທີ 2 ທີ່ເຄີຍສະໜັບສະໜູນພັນທະມິດຂອງສະຫະລັດອາເມຣິກາ ສູ້ກັບນາຊີເຢຍລະມັນ.

ທ່ານ ໄບເດັນ ລົງນາມຮ່າງກົດໝາຍໃຫ້ຢືມ-ເຊົ່າ  (Lend-Lease Act of 2022) ພ້ອມທັງລະບຸວ່າ ສະຫະລັດ ສະໜັບສະໜູນຢູເຄຣນ “ຕໍ່ສູ້ເພື່ອປົກປ້ອປະເທດ ແລະ ປະຊາທິປະໄຕຂອງພວກເຂົາ ຈາກສົງຄາມອັນໂຫດຮ້າຍປ່າເຖື່ອນຂອງປູຕິນ” ນອກຈາກນີ້ທ່ານໄບເດັນ ໄດ້ຂໍງົບປະມານຊ່ວຍເຫຼືອຢູເຄຣນເພີ່ມອີກ 33.000 ລ້ານໂດລາ.

ເຖິງວ່າສະຫະລັດຈະໄດ້ຈ່າຍເງິນໄປຫຼາຍພັນລ້ານໂດລາໃນສົງຄາມລະຫວ່າງຢູເຄຣນ ແລະ ຣັດເຊຍ ແຕ່ທ່ານ ໄບເດັນ ໄດ້ກ່າວວ່າ “ການຍອມຈຳນົນຕໍ່ຜູ້ຮຸກຮານ ຈະຕ້ອງຊົດໃຊ້ໃນລາຄາທີ່ແພງກວ່ານີ້”.