ໃນວັນພະຫັດ ຂຶ້ນ 15 ຄ່ຳ ເດືອນ 12 ປີມະເມຍ ກົງກັບວັນທີ 6 ພະຈິກ 2014 ປີ ພສ 2557 (ຄສ 2014) ເຊິ່ງເປັນ
ມື້ສຸດທ້າຍຂອງງານບຸນນະມັດສະການພະທາດຫຼວງ ປະຈຳປີ 2014 ເລີ່ມແຕ່ເຊົ້າ ບັນດາການນຳພັກ-ລັດ ແລະ
ຊາວພຸດທະສາສະນິກະຊົນທັງຫຼາຍ ໄດ້ເຂົ້າຮ່ວມພິທີໃສ່ບາດຖວາຍສັງຄະທານ ໃຫ້ພະສົງສາມະເນນ ຈຳນວນ
6.000 ອົງ ທີ່ເປັນຈຳນວນຫຼາຍສົມຄວນທຽບໃສ່ປີຜ່ານໆມາ.
ເປັນກຽດເຂົ້າຮ່ວມພິທີໃສ່ບາດຄັ້ງນີ້ ນຳໂດຍທ່ານ ຈູມມາລີ ໄຊຍະສອນ ປະທານປະເທດ ພ້ອມພັນລະຍາ ບັນດາ
ການນຳພັກ-ລັດການນຳນະຄອນຫຼວງວຽງຈັນ ບັນດາທູຕານຸທູດ ອົງການຈັດຕັ້ງສາກົນ ປະຈຳລາວ ພະນັກງານ
ການນຳອາວຸໂສບຳນານ ເຖົ້າແກ່ແນວໂຮມ ອົງການຈັດຕັ້ງມະຫາຊົນ ແລະ ຊາວພຸດທະສາສະນິກະຊົນທັງຫຼາຍ
ເພື່ອພ້ອມກັນເຮັດບຸນສິນກິນທານ ແຜ່ເມດຕາໄປຫາດວງວິນຍານຂອງບັນດາວິລະກະສັດ ນັກຮົບວິລະຊົນຜູ້ມີ
ຄຸນງາມຄວາມດີຕໍ່ປະເທດຊາດ ແລະ ປະຊາຊົນຜູ້ທີ່ລ່ວງລັບໄປແລ້ວນັ້ນ ແລະ ທັງເປັນການສ້າງບຸນກຸສົນຮ່ວມ
ກັນ ເສີມດວງສະຕາບ້ານເມືອງໃຫ້ຢູ່ເຢັນເປັນສຸກ ຈະເລີນກ້າວໜ້າ ແລະ ວັດທະນາຖາວອນ.
ສ່ວນຕອນບ່າຍ ເລີ່ມແຕ່ເວລາ 13:30 ມີພິທີແຫ່ລູກຄີອອກຈາກວັດທາດຫຼວງໃຕ້ ເຂົ້າສູ່ກົມມະລຽນດ້ານໃນພະ
ທາດຫຼວງ ໃນນັ້ນ ຂະບວນແຫ່ປະກອບມີຂະບວນທັ່ງບັ້ງ ຂະບວນດົນຕີພື້ນເມືອງ ແລະ ຂະບວນຟ້ອນລຳແຫ່
ອອກມາຕາມຫຼັງ ເຊິ່ງອີງໃສ່ປະຫວັດເຖົ້າແກ່ບູຮານເລົ່າຂານກັນມາວ່າ: ການຕີຄີໄດ້ແບ່ງອອກເປັນສອງຝ່າຍລະ
ຫວ່າງຝ່າຍປະຊາຊົນ ແລະ ຂ້າລາຊະການ (ພະນັກງານລັດ) ເຊິ່ງຜົນການແຂ່ງຂັນກີລາຕີຄີປາກົດວ່າ ຝ່າຍປະຊາ
ຊົນເປັນຜູ້ຊະນະຝ່າຍພະນັກງານ 5-4 ແລະ ການແຂ່ງຂັນກີລາຕີຄີປີນີ້ກໍ່ເຫັນວ່າ ເປັນຂະບວນຟົດຟື້ນມ່ວນຊື່ນ
ໄດ້ທັງຮີດຄອງປະເພນີ ແລະ ໄດ້ທັງຄວາມສາມັກຄີລະຫວ່າງພະນັກງານກັບປະຊາຊົນ ມີປະຊາຊົນລາວບັນດາເຜົ່າ
ທົ່ວປະເທດ ເຂົ້າຮ່ວມຊົມຮ່ວມເຊຍເປັນຈຳນວນຫຼາຍພັນຄົນ ແລະ ສ້າງຄວາມສົນໃຈໃຫ້ແກ່ຊາວຕ່າງປະເທດທີ່
ເຂົ້າມາທ່ອງທ່ຽວນະຄອນຫຼວງວຽງຈັນ.
ສ່ວນຕອນຄ່ຳຄືນສຸດທ້າຍຂອງງານບຸນພະທາດຫຼວງ ປະຈຳປີ 2014 ເລີ່ມແຕ່ເວລາ 19:30 ມີພິທີວຽນທຽນ ຈູດທູບ
ທຽນບູຊາອ້ອມພະທາດຫຼວງ 3 ຮອບ ແລະ ຈູດບັ້ງໄຟສັກກາລະບູຊາພະທາດຫຼວງ ເພື່ອເປັນສິລິມຸງຄຸນ ທັງເປັນການ
ສ້າງສີສັນອັນງົດງາມ ດ້ວຍແສງສີ ແລະ ຄົບງັນຕາມປະເພນີທີ່ເຄີຍປະຕິບັດກັນມາ ຈົນເຖິງເວລາ 23:00 ໂມງກາງ
ຄືນ ຈາກນັ້ນ ບຸນກໍ່ໄດ້ປິດລົງດ້ວຍຜົນສຳເລັດອັນຈົບງາມ ສ້າງຄວາມປະທັບໃຈໃຫ້ແກ່ຜູ້ທີ່ມາທ່ຽວຊົມ.
ແຫລ່ງຂ່າວ: ວຽງຈັນໃໝ່