ສໍານັກຂ່າວ VnExpress International ລາຍງານວ່າ ເກີດເຫດການມີຊາຍຄົນໜຶ່ງຂັບລົດໄປຕໍາຜູ້ຕ້ອງສົງໄສລັກໝາສອງຄົນ ຢູ່ແຂວງດັກລັກທາງຕອນກາງຂອງໄຮແລນ ເຮັດໃຫ້ໜຶ່ງໃນນັ້ນມີຜູ້ເສຍຊີວິດ.
ທ້າວ ແລຫວງແອງ ອາຍຸ 23 ປີ ແລະ ໝູ່ຂອງລາວອີກ 2 ຄົນ ຖືກຕຳຫຼວດນະຄອນດັກລັກ ຄວບຄຸມໂຕໃນວັນອັງຄານທີ່ຜ່ານມາ ເພື່ອລໍຖ້າການສືບສວນກ່ຽວກັບການຄາດຕະກຳດັ່ງກ່າວ.
ໃນວັນທີ 23 ເມສາ ທ້າວ ແອງ ແລະ ໝູ່ຂອງລາວຢູ່ຮ້ານອາຫານແຫ່ງໜຶ່ງ ເມື່ອພວກເຂົາເຫັນ ທ້າວ ດຸຍ ອາຍຸ 19 ປີ ແລະ ທ້າວ ລອງ ອາຍຸ 22 ປີ ຂີ່ລົດຈັກ ໂດຍມີຄົນຮ້ອງໃສ່ໃກ້ໆວ່າໝາຖືກລັກ. ທ້າວ ແອງ ເລີຍຕັດສິນໃຈຂີ່ລົດຈັກນໍາ. ທ້າວ ແອງ ໄດ້ຂີ່ລົດຕຳລົດຈັກຄັນດັ່ງກ່າວຈາກດ້ານຫຼັງ ເຮັດໃຫ້ ທ້າວ ດຸຍ ແລະ ທ້າວ ລອງ ເສຍຫຼັກ. ທ້າວ ດຸຍ ເສຍຊີວິດຢູ່ບ່ອນເກີດເຫດ ແລະ ທ້າວ ລອງ ໄດ້ຮັບບາດເຈັບ. ລົດຈັກກໍ່ໄດ້ຮັບຄວາມເສຍຫາຍຫຼາຍພໍສົມຄວນ.
ທ້າວ ລອງ ຍອມຮັບວ່າລາວ ແລະ ທ້າວ ດຸຍ ໄດ້ພະຍາຍາມລັກຫມາ ແລະ ແມວໃນຄືນນັ້ນ. ພວກເຂົາຖືກໄລ່ ແລະ ການເສຍຊີວິດໄດ້ເກີດຂື້ນຫລັງຈາກທີ່ທັງສອງສາມາດລັກເອົາແມວໄດ້ສາມໂຕ. ທ່ານ ແອງ ກ່າວວ່າ ລາວເສຍໃຈທີ່ການກະທຳຂອງຕົນໄດ້ເຮັດໃຫ້ມີຄົນເສຍຊີວິດໂດຍບໍ່ຕັ້ງໃຈ. ລາວກ່າວວ່າ “ຂ້ອຍພຽງແຕ່ວາງແຜນທີ່ຈະຂີ່ລົດຕໍາພວກເຂົາ ເພື່ອເຮັດໃຫ້ຕໍາຫຼວດຈັບຜູ້ຕ້ອງສົງໄສດັ່ງກ່າວໄດ້, ຂ້ອຍບໍ່ໄດ້ຄາດຫວັງວ່າມັນຈະເປັນການຂ້າຄົນ.”
ຫວຽດນາມບໍລິໂພກໝາປະມານ 5 ລ້ານໂຕຕໍ່ປີ, ຮອງຈາກຈີນພຽງ 20 ລ້ານໂຕເທົ່ານັ້ນ. ລາຍງານກ່າວວ່າ ໝາຈໍານວນຫຼາຍທີ່ຖືກເສີບໃນຮ້ານອາຫານ ເປັນສັດລ້ຽງທີ່ຖືກລັກເອົາໄປຂາຍໃຫ້ໂຮງຂ້າສັດຂະໜາດນ້ອຍທີ່ບໍ່ໄດ້ຮັບການຄວບຄຸມ. ການລັກໝາໄດ້ກາຍເປັນເລື່ອງປົກກະຕິທີ່ປະຊາຊົນຈໍານວນຫຼາຍຈະຫັນມາປ່ຽນຕົນເອງມາເປັນສານເຕ້ຍ.