ສໍານັກຂ່າວ ຣອຍເຕີ ລາຍງານວ່າ ຜູ້ຕ້ອງສົງໄສມືວາງລະເບີດປິດຊີບລາຍໜຶ່ງໄດ້ສັງຫານຄູສອນຊາວຈີນ 3 ຄົນ ທີ່ເມືອງກາຣາຈີໃນວັນອັງຄານທີ່ຜ່ານມາ.
ຕໍາຫຼວດ ແລະ ເຈົ້າໜ້າທີ່ກ່າວວ່າ ທັງສາມຄົນແມ່ນລວມຢູ່ໃນບັນດາຜູ້ໂດຍສານໃນລົດເມທີ່ເດີນທາງກັບໄປມະຫາວິທະຍາໄລກາຣາຈີຫລັງຈາກທີ່ກິນອາຫານທ່ຽງ ເມື່ອລະເບີດແຕກຂຶ້ນທີ່ທາງເຂົ້າສະຖາບັນຂົງຈື້ຂອງມະຫາວິທະຍາໄລເຮັດໃຫ້ຄູສອນຊາວຈີນ 3 ຄົນ ແລະ ຊາວປາກີສະຖານຄົນໜຶ່ງເສຍຊີວິດ.
ກຸ່ມແບ່ງແຍກດິນແດນ, ກອງທັບປົດປ່ອຍບາລູຈິສ໌ (BLA) ທີ່ຕັ້ງຢູ່ແຂວງບາລູຈິສ໌ທາງພາກຕາເວັນຕົກສຽງໃຕ້ຕິດກັບອັຟການິສຖານ ແລະ ອີຣ່ານ ໄດ້ອ້າງເອົາຄວາມຮັບຜິດຊອບໃນເຫດການໂຈມຕີດ້ວຍລະເບີດດັ່ງກ່າວ ໂດຍກ່າວໃນອີມິວເຖິງສໍານັກງານຣອຍເຕີວ່າ ການໂຈມຕີດັ່ງກ່າວແມ່ນໄດ້ດຳເນີນການໂດຍມືວາງລະເບີດຍິງລາຍໜຶ່ງ. ຜູ້ບັນຊາການຕຳຫຼວດເມືອງກາຣາຈີກ່າວວ່າ “ຈາກລາຍງານທີ່ພວກເຮົາໄດ້ຮັບບອກໃຫ້ຮູ້ວ່າພວກເຂົາເປັນຄົນຈີນ.” ທ່ານກ່າວຕື່ມວ່າພວກເຂົາເປັນຄູສອນຢູ່ສະຖາບັນຂົງຈື້ ເຊິ່ງເປັນສູນພາສາ ແລະ ວັດທະນະທໍາຈີນ. ທ່ານກ່າວຕໍ່ Geo News TV ວ່າ “ຂໍ້ມູນທີ່ພວກເຮົາໄດ້ຮັບແມ່ນຜູ້ວາງລະເບີດອາດຈະເປັນນັກສຶກສາຢູ່ໃນມະຫາວິທະຍາໄລ.
ກະຊວງການຕ່າງປະເທດຈີນກ່າວປະນາມຢ່າງຮຸນແຮງຕໍ່ການໂຈມຕີດັ່ງກ່າວ ແລະ ຮຽກຮ້ອງໃຫ້ປາກີສະຖານລົງໂທດຜູ້ກະທຳຄວາມຜິດ, ປົກປ້ອງພົນລະເມືອງຈີນ ແລະ ປ້ອງກັນບໍ່ໃຫ້ເຫດການດັ່ງກ່າວເກີດຂຶ້ນອີກ. ເຫດການວາງລະເບີດຄັ້ງນີ້ເປັນການໂຈມຕີຄັ້ງໃຫຍ່ຄັ້ງທຳອິດຕໍ່ຊາວຈີນຢູ່ໃນປາກີສະຖານນັບຕັ້ງແຕ່ເດືອນກໍລະກົດປີທີ່ຜ່ານມາ ເມື່ອມີມືລະເບີດວາງລະເບີດລົດເມໂດຍສານໃນພາກເໜືອຂອງປາກີສະຖານເຮັດໃຫ້ມີຜູ້ເສຍຊີວິດ 13 ຄົນ ລວມທັງຊາວຈີນ 9 ຄົນ ທີ່ເຮັດວຽກໃນໂຮງງານໄຟຟ້າພະລັງງານນໍ້າ.
ເຫດການດັ່ງກ່າວໄດ້ສ້າງຄວາມທ້າທາຍອັນໃຫຍ່ຫຼວງໃຫ້ແກ່ນາຍົກລັດຖະມົນຕີ ປາກິີສະຖານ ທ່ານ ເຊບາຊ໌ ຊາຣີຟ ທີ່ຫາກໍ່ໄດ້ຮັບເລືອກຕັ້ງເປັນນາຍົກລັດຖະມົນຕີຄົນໃໝ່ຂອງປາກີສະຖານໃນເດືອນນີ້. ລາວໄດ້ປະນາມຕໍ່ເຫດການດັ່ງກ່າວທີ່ເກີດຂື້ນວ່າ ການກໍ່ການຮ້າຍທີ່ຂີ້ຂາດ. ທ່ານ ເຊບາຊ໌ ຊາຣີຟ ນາຍົກລັດຖະມົນຕີຄົນໃໝ່ຂອງປາກີສະຖານ ກ່າວໃນຖະແຫຼງການວ່າ “ຂ້າພະເຈົ້າຂໍສະແດງຄວາມເສຍໃຈອັນສຸດຊື້ງຕໍ່ການສູນເສຍຊີວິດອັນລໍ້າຄ່າ ລວມທັງເພື່ອນມິດຊາວຈີນຂອງພວກເຮົາໃນການໂຈມຕີຄັ້ງຮ້າຍແຮງໃນກາຣາຈີໃນຄັ້ງນີ້.”